ໄດ້ເອົາໃຈໃສ່ຊີ້ນໍາໆພາ ແລະໃຫ້ການສະໜັບ ໜູນດ້ານທຶນຮອນໃນການອະນຸລັກວັດທະນະທໍາຮີດຄອງປະເພນີອັນດີງາມຂອງຊາດຂອງທ້ອງຖິ່ນໄວ້ຢ່າງແຂງແຮງ, ສະເພາະປີ 2015 ຜ່ານມາ ຫຼວງພະບາງສ້າງບ້ານວັດທະນະທໍາໄດ້ 30 ບ້ານ, ມາຮອດປະຈຸບັນທົ່ວແຂວງ ມີບ້ານວັດທະນະທໍາແລ້ວ 466 ບ້ານ.

ອີງຕາມເອກະສານທີ່ລາຍງານໂດຍທ່ານ ຄໍາໝັ້ນ ຈັນທະລັງສີ ຮອງເຈົ້າແຂວງຫຼວງພະບາງຕໍ່ກອງປະຊຸມ ຖວທ ທົ່ວປະເທດທີ່ຈັດຂຶ້ນຫວ່າງບໍ່ດົນມານີ້ວ່າ: ໃນໄລຍະຜ່ານມາການສົ່ງເສີມ ແລະອະນຸລັກວັດທະນະທໍາອໍານາດການປົກຄອງແຂວງພວກເຮົາໄດ້ເອົາໃຈໃສ່ຊີ້ນໍາໆພາ, ຈັດຕັ້ງປະຕິບັດຢ່າງຕັ້ງໜ້າ ໂດຍໄດ້ຫັນລົງກໍ່ສ້າງຮາກຖານປຸກລະດົມຂະບວນການສ້າງຊິວິດວັດທະນະທໍາໃຫ້ແກ່ປະຊາຊົນບັນດາເຜົ່າຢ່າງແຂງແຮງ ແລະໄດ້ຮັບການປະກອບສ່ວນຂອງທຸກໆພາກສ່ວນກາຍເປັນກິດຈະກໍາຂອງມະຫາຊົນຢ່າງແທ້ຈິງດ້ວຍການກໍານົດເປັນແຜນ ພັດທະນາເສດຖະກິດ-ສັງຄົມຂອງແຂວງ, ເມືອງຊຶ່ງເຫັນວ່າ ໄດ້ກາຍເປັນຂະບວນຟົດຟື້ນ ແລະ ມີການແຂ່ງຂັນກັນຢ່າງຄຶກຄື້ນພໍ ສົມຄວນ, ສະເພາະປີ 2015 ຜ່ານມານີ້ ສາມາດສ້າງບ້ານວັດ ທະນະທໍາໄດ້ຈໍານວນ 30 ບ້ານ, ມາຮອດປະຈຸບັນ ທົ່ວແຂວງມີ ບ້ານວັດທະນະທໍາແລ້ວ 466 ບ້ານ, ມີຄອບຄົວວັດທະນະທໍາ 49 ພັນກວ່າຄອບຄົວ ແລະສ້າງກຸ່ມບ້ານວັດທະນະທໍາໄດ້ 12 ກຸ່ມ.

ສໍາລັບສູນວັດທະນະທໍາເດັກ ກໍໄດ້ມີສ່ວນຮ່ວມໃນການອະນຸລັກຮັກສາວັດທະນະທໍາຂອງຊາດດ້ວຍວິທີການສ້າງໃຫ້ມີກິດຈະກໍາຫຼາຍຢ່າງເຊັ່ນ: ການອະນຸລັກດົນ ຕີພື້ນເມືອງ, ການຟ້ອນລໍາ ແລະອື່ນໆ ປະກອບສ່ວນສະແດງຮັບໃຊ້ ວຽກງານລວມຂອງແຂວງ, ມີກິດຈະກໍາການແຕ້ມ, ປັ້ນ, ຫຼໍ່ ຊຶ່ງທັງໝົດນັ້ນ ລ້ວນແຕ່ເປັນການສ່ອງ ແສງ ແລະກະທົບໃສ່ສັງຄົມໃຫ້ດັດປັບສິ່ງທີ່ຫຍໍ້ທໍ້ກັບກາຍມາເປັນສິ່ງດີມີປະໂຫຍດ ແລະຍັງໄດ້ຂະຫຍາຍຫ້ອງອ່ານຕິດພັນກັບສູນວັນທະນະທໍາເດັກ ແຕ່ລະເມືອງຕື່ມອີກ.

ພວກເຮົາຍັງຮັກສາໄດ້ຊື່ສຽງຮຽງນາມເມືອງມໍລະດົກໂລກໄວ້ເປັນຢ່າງດີ ຊຶ່ງປີກາຍນີ້ກໍໄດ້ຈັດພິທີສະເຫຼີມສະຫຼອງ ຫຼວງພະບາງ ເມືອງມໍລະດົກໂລກຄົບຮອບ 20 ປີ ແລະພວມກະກຽມທຸກເງື່ອນໄຂ ເພື່ອປະກາດຮັບຮອງເອົາເມືອງ ຫຼວງພະບາງ ເປັນເມືອງວັດທະນະທໍາໃນອະນາຄົດອັນໃກ້ນີ້.

ທີ່ມາຈາກ: ເສດຖະກິດ-ສັງຄົມ