ມີສອງບໍລິສັດຂອງ Israel ທີ່ກ່າວວ່າ ພວກເຂົາເຈົ້າໃຊ້ເຄື່ອງພິມ 3 ມິຕິ ເພື່ອໃຫ້ເກີດສະພາບແວດລ້ອມທີ່ stem cells ສາມາດຈະກັບກາຍເປັນເນື້ອເຫຍື່ອສະເພາະແນວໃດແນວໜຶ່ງ ໃນອະນາຄົດອັນໃກ້ນີ້ ເທັກໂນໂລຢີໃໝ່ນີ້ ຈະສາມາດນຳມາໃຊ້ ເພື່ອທົດລອງຢາຊະນິດໃໝ່ ທັງຍັງສາມາດເປີດໂອກາດໃຫ້ມີຄວາມເປັນໄປໄດ້ວ່າ ຈະເຮັດອະໄວຍະວະໃໝ່ຂຶ້ນມາ ເພື່ອທຳການສັບປ່ຽນ.ອະໄວຍະວະຕ່າງໆ
ໃນປີ 2006 ນັກວິທະຍາສາດຊາວຍີ່ປຸ່ນ ທ່ານ Shinya Yamanaka ແລະ ຄະນະຂອງເພິ່ນ ໄດ້ຄົ້ນພົບວ່າ ແຊລທຳມະດາສາມັນຂອງມວນມະນຸດເຮົາ ເຊັ່ນແຊລຂອງຜີວໜັງ ກໍອາດຈະສາມາດປ່ຽນມາເປັນສແຕມແຊລກໍໄດ້ ເຊຶ່ງໃນເມື່ອກ່ອນໄດ້ເກັບກູ້ມາຈາກເດັກອ່ອນທີ່ຫາກໍຈໍ່ໂຕຂຶ້ນມານັ້ນ. ຍ້ອນຄວາມເປັນຫ່ວງໃນທາງຈັນຍາບັນໃນການເກັບເອົາສແຕມແຊລອອກມາ ພວກນັກວິໄຈທັງຫຼາຍໃນທົ່ວໂລກ ຈຶ່ງໄດ້ພາກັນທົດລອງຫາທາງ ສ້າງເນື້ອເຫຍື່ອຂຶ້ນມາໃໝ່.
ແຊລທີ່ເອີ້ນວ່າ Induced pluripotent ສແຕມແຊລ ຫຼື IPS ແຊລ ປະຈຸບັນນີ້ ແມ່ນນຳມາໃຊ້ທົດແທນເນື້ອເຫຍື່ອໃນຮ່າງກາຍມະນຸດເຮົາທີ່ສູນເສຍໄປຍ້ອນພະຍາດ ຫຼື ບາດເຈັບ. ຂັ້ນຕອນການປະຕິບັດງານນີ້ ຍັງຊັກຊ້າຢູ່ ແຕ່ວ່າ ບໍລິສັດເຄື່ອງພິມ 3 ມິຕິ Nano Dimension ແລະ Accellta ທີ່ສ້າງ IPS ແຊລ ກ່າວວ່າ ດຽວນີ້ ພວກເຂົາເຈົ້າໄດ້ທົດລອງ ເຄື່ອງພິມ 3 ມິຕິ ແລ້ວ ແລະ ສາມາດຜະລິດ stem cells ມະນຸດໄດ້ໄວຂຶ້ນ.
ແຫລ່ງຂ່າວຈາກ: ສຳນັກຂ່າວ VOA Lao