ຫ້ອງວ່າການປົກຄອງເມືອງຈັນທະບູລີ ຮ່ວມກັບຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ອພບ.ນວ) ຈັດກອງປະຊຸມປຶກສາຫາລືກ່ຽວກັບການບໍລິການຂົນສົ່ງຂີ້ເຫຍື້ອ ເພື່ອແນໃສ່ເຮັດໃຫ້ການບໍລິການເກັບມ້ຽນຂີ້ເຫຍື້ອເຂົ້າສູ່ລະບົບ ສ້າງຄວາມເປັນລະບຽບຮຽບຮ້ອຍໃຫ້ຕົວເມືອງ ຕ້ານພະຍາດຕ່າງໆ ພ້ອມທັງການນຳຂີ້ເຫຍື້ອທີ່ຜ່ານການແຍກ ແລະ ດັດແປງມານຳໃຊ້ຄືນ ເພື່ອເປັນການຄວບຄຸມ ແລະ ຫຼຸດຜ່ອນຂີ້ເຫຍື້ອໃຫ້ນັບມື້ໜ້ອຍລົງ ເນື່ອງຈາກປັດຈຸບັນ ອັດຕາການຜະລິດຂີ້ເຫຍື້ອແມ່ນມີທ່າອຽງເພີ່ມຂຶ້ນເລື້ອຍໆ ແລະ ຕ້ອງໃຊ້ເວລາເພື່ອແກ້ໄຂບັນຫານີ້ໃຫ້ໝົດໄປ.
ກອງປະຊຸມຄັ້ງນີ້ ໄດ້ຈັດຂຶ້ນວັນທີ 27 ກໍລະກົດ 2016 ຢູ່ຫ້ອງວ່າການປົກຄອງເມືອງຈັນທະບູລີ ໂດຍເປັນປະທານຂອງທ່ານ ເພັດສະໄໝ ນັດຜາສຸກ ຮອງເຈົ້າເມືອງຈັນທະບູລີ ມີທ່ານນາງ ວິໄລວອນ ຈັນທະລາຕີ ຫົວໜ້າ ອພບ.ນວ ພ້ອມດ້ວຍຮອງຫົວໜ້າ ອພບ.ນວ ບັນດາຫ້ອງການ ເລຂາພັກບ້ານ ນາຍບ້ານອ້ອມຂ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.
ເມືອງຈັນທະບູລີ ມີເນື້ອທີ່ປະມານ 29 ກິໂລແມັດມົນທົນ ມີ 30 ບ້ານ 13.364 ຄອບຄົວ ປະຊາກອນ 73.459 ຄົນ (ຕາມສະຖິຕິສົກປີ 2013-2014) ໄດ້ມອບໃຫ້ 3 ພາກສ່ວນຮັບຜິດຊອບບໍລິການຂົນສົ່ງເກັບມ້ຽນຂີ້ເຫຍື້ອ ຄື: ກອງບໍລິການຂົນສົ່ງເກັບມ້ຽນຂີ້ເຫຍື້ອ ອພບ ຮັບຜິດຊອບ 19 ບ້ານ 9.779 ຄອບຄົວ ມີຄອບຄົວໃຊ້ບໍລິການ 4.675 ຄອບຄົວ ເທົ່າກັບ 47,81% ບໍລິສັດ ອະນາໄມຈັນທະບູລີ ຈຳກັດຜູ້ດຽວ ຮັບຜິດຊອບ 9 ບ້ານ ມີ 2.557 ຄອບ ຄົວ ມີຄອບຄົວໃຊ້ບໍລິການ 2.334 ຄອບຄົວ ເທົ່າກັບ 91,23% ແລະ ໜ່ວຍບໍລິການ ອພບ ເມືອງຈັນທະບູລີ ຮັບຜິດຊອບ 2 ບ້ານ 1.028 ຄອບຄົວ ມີຄອບຄົວໃຊ້ບໍລິການ 606 ຄອບຄົວ ເທົ່າກັບ 58,95% ສະເລ່ຍການໃຊ້ບໍລິການທົ່ວເມືອງ 65,68% ເຊິ່ງເຫັນວ່າຕົວເລກການໃຊ້ບໍລິການຍັງຕ່ຳ ທຽບໃສ່ການຜະລິດຂີ້ເຫຍື້ອທີ່ນັບມື້ເພີ່ມຂຶ້ນ.
ຂ່າວຈາກ: 