ການຊ່ວຍເຫຼືອ ນາງກາບແກ້ວ ສາວລາວ ອະດີດລູກຈ້າງທີ່ຖືກນາງມົນຕີ ຫຍົກລັດຕະນະການ ຫຼື ຫຍິງໄກ່ ແຈ້ງຄວາມລັກຊັບປະມານ 5 ລ້ານບາດ ຫຼັງຈາກນາງກາບແກ້ວໜີກັບບ້ານ. ວານນີ້ພົນໂທ ສານິດ ມະຫະຖາວອນ ຮັກສາການຜູ້ບັນຊາການຕຳຫຼວດນະຄອນບານ (ໄທ) ມອບໝາຍໃຫ້ ພົນຕຳຫຼວດຕີ ຈາຣຸວັດ ໄວສະຍະ ຮອງຜູ້ບັນຊາການຕຳຫຼວດນະຄອນບານ (ໄທ) ໄດ້ເດິນທາງມາຮັບໂຕນາງກາບແກ້ວ ທີ່ສະຖານີຕຳຫຼວດອຳເພີຊຽງແສນ ຈັງຫວັດຊຽງຮາຍ ແລະກຽມຫຼັກຊັບ ຈາກກອງທຶນຍຸດຕິທຳໄວ້ປະກັນໂຕທັນທີ່ ແຕ່ເມື່ອນາງກາບແກ້ວໄດ້ເຂົ້າປຶກສາກັບເຈົ້າໜ້າທີ່ຕຳຫຼວດເມືອງຕົ້ນເຜິ້ງ ແຂວງບໍ່ແກ້ວ ແລ້ວ ທາງການບໍ່ອະນຸຍາດໃຫ້ນາງກາບແກ້ວຂ້າມຝັ່ງໄປພົບເຈົ້າໜ້າທີ່ໄທໄດ້ ຍ້ອນວ່ານາງກາບແກ້ວເຄີຍໄດ້ແຈ້ງຄວາມເອົາໄວ້ທີ່ ແຂວງສະຫວັນນະເຂດ ຕອນໜີມາຈາກປະເທດໄທ.
ກ່ອນໜ້ານີ້ພົນໂທ ສານິດ ເຫັນວ່າ ເພື່ອໃຫ້ຄວາມເປັນທຳກັບສາວລາວທັງ 2 ຄົນ ແລະເພື່ອສອບສວນເອົາຄຳໃຫ້ການປະກອບການດຳເນີນຄະດີກັບນາງ ມົນຕາ ຫຼື ນາງໄກ່ ໃນຂໍ້ຫາແຈ້ງຄວາມບໍ່ຈິງ, ຄ້າມະນຸດ ແລະຄະດີໝິ່ນປະໝາດລາຊະວົງຂອງໄທ ເຊິ່ງເຫັນວ່າ ຍິງສາວຊາວລາວທັງ 2 ຄົນ ອາດຈະເປັນເຫຍື່ອຂອງນາງໄກ່ເຊັ່ນດຽວກັນກັບຜູ້ອື່ນໆ. ກອງບັນຊາການຕຳຫຼວດນະຄອນບານ ເຊິ່ງເປັນຜູ້ຮັບຜິດຊອບຄະດີ ຈຶ່ງອຳນວຍຄວາມສະດວກດ້ວຍການໃຫ້ພະນັກງານສອບສວນພ້ອມຜູ້ກ່ຽວຂ້ອງເດິນທາງ ໄປດຳເນີນການປະກັນໂຕໃຫ້ທັນທີ ຈະໄດ້ບໍ່ຕ້ອງຫລົບໜີຄະດີໝາຍຈັບອີກຕໍ່ໄປ. ແຕ່ປາກົດວ່າຍາດພີ່ນ້ອງຂອງນາງກາບແກ້ວກໍບໍ່ເຫັນດີໃຫ້ຂ້າມແດນໄປຍັງປະເທດໄທ ເນື່ອງຈາກຢ້ານຖືກຈັບຕາມໝາຍຈັບທີ່ມີຢູ່.
ຈາກນັ້ນຫົວໜ້າຫ້ອງການອຳເພີຊຽງແສນ ຈັງຫວັດຊຽງຮາຍ ຝ່າຍຄວາມໝັ້ນຄົງ ພ້ອມດ້ວຍຕຳຫຼວດກວດຄົນເຂົ້າເມືອງ ໜ່ວຍຮັກສາຄວາມສະຫງົບຮຽບຮ້ອຍແຄມຝັ່ງແມ່ນ້ຳຂອງ ແລະທີມນັກຂ່າວຈາກຊ່ອງສາມ ທີ່ເຄີຍປະສານງານກັບນາງກາບແກ້ວກ່ອນໜ້ານັ້ນ ຈຶ່ງໄດ້ເດິນທາງມາພົບກັບຕຳຫຼວດສັນຕິບານ ທີ່ເມືອງຕົ້ນເຜິ້ງ ແຂວງບໍ່ແກ້ວ ເພື່ອສ້າງຄວາມເຂົ້າໃຈ ເຊິ່ງເຈົ້າໜ້າທີ່ລາວກໍໄດ້ອະທິບາຍວ່າ ນາງກາບແກ້ວເຄີຍແຈ້ງຄວາມໄວ້ທີ່ແຂວງສະຫວັນນະເຂດ ຫຼັງຈາກທີ່ໜີກັບມາໂດຍບໍ່ມີໜັງສືສະແດງການເຂົ້າ-ອອກ ຈຶ່ງແຈ້ງຄວາມວ່າ ທີ່ໜີກັບມາເພາະຖືກນາຍຈ້າງຄົນໄທໃສ່ຮ້າຍ ເຮັດໃຫ້ຂະນະນີ້ເມືອງຕົ້ນເຜິ້ງ ບໍ່ມີອຳນາດທີ່ຈະສົ່ງໂຕນາງກາບແກ້ວ ກັບໄປໃຫ້ຕຳຫຼວດໄທສອບປາກຄຳໄດ້ທັນທີ.
ທ່ານ ໄຊສະຖຽນ ຫຼຽນສັກ ຮອງເຈົ້າເມືອງເມືອງຕົ້ນເຜິ້ງ ແຂວງບໍ່ແກ້ວ ໄດ້ສະແດງຄວາມຂອບໃຈຕໍ່ເຈົ້າໜ້າທີ່ໄທທຸກໜ່ວຍ ພ້ອມທີມຂ່າວຊ່ອງສາມ ທີ່ໄດ້ພະຍາຍາມໃຫ້ຄວາມເປັນທຳກັບນາງກາບແກ້ວ ແຕ່ຄະດີນີ້ເປັນທີ່ສົນໃຈຂອງປະຊາຊົນທັງ 2 ປະເທດ ຈຶ່ງຕ້ອງການໃຫ້ທາງການໄທສົ່ງຄຳຮ້ອງຂໍສອບປາກຄຳນາງກາບແກ້ວ ໄປທີ່ສະຫວັນນະເຂດ ຫຼືສະຖານທູດລາວ ເພື່ອເອົາໄປປະກອບການດຳເນີນຄະດີກັບນາງໄກ່ ແລ້ວຫາກຜົນຄະດີສິ້ນສຸດວ່າ ນາງກາບແກ້ວ ບໍ່ໄດ້ກະທຳຄວາມຜິດກໍຈະນຳໄປສູ່ການຂໍຖອນໝາຍຈັບຕໍ່ໄປ ເຊິ່ງໄດ້ເອີ້ນນາງກາບແກ້ວ ເຂົ້າຮ່ວມຮັບຟັງນຳ ເຊິ່ງກໍພໍໃຈກັບການປະສານຄວາມຊ່ວຍເຫຼືອຂອງເຈົ້າໜ້າທີ່ທັງສອງປະເທດ ລວມທັງຜູ້ໃຫ້ກຳລັງໃຈ.
ແນວໃດກໍຕາມ, ອີງຕາມຂໍ້ມູນທີ່ບໍ່ເປັນທາງການນັ້ນ ນາງກາບແກ້ວຈະຖືກຊ່ວຍເຫຼືອຈາກເຈົ້າໜ້າທີ່ທາງການໄທ ໂດຍຈະໃຊ້ເງິນກອງທຶນຍຸດຕິທຳຂອງໄທ ປະກັນໂຕນາງກາບແກ້ວທັນທີທີີ່ເດິນທາງເຂົ້າພົບເຈົ້າໜ້າທີ່ໃນປະເທດໄທ ໃນວັນຈັນວັນທີ່ 25 ກໍລະກົດ ນີ້ ເຊິ່ງຄວາມຄືບໜ້າຈະເປັນແນວໃດນັ້ນ ທີມຂ່າວລາວໂພສຕ໌ ຈະຕິດຕາມມາລາຍງານຕໍ່ໄປ.
ອ້າງອີງຂ່າວ: ຄອບຄົວຂ່າວສາມ