ເຮືອບິນໂດຍສານຂະໜາດນ້ອຍຂອງຈີນ ນຳສື່ມວນຊົນບິນຊົມເສັ້ນທາງທ່ອງທ່ຽວໝູ່ເກາະນອກແຄມຝັ່ງຕົກຕໍາກັບຂົວທາງຫຼວງ ນອກເມືອງຊຽງໄຮ້ໃນວັນທີ 20 ກໍລະກົດທີ່ຜ່ານມາ ເຮັດໃຫ້ມີຜູ້ເສຍຊີວິດ 5 ຄົນ ແລະ ໄດ້ຮັບບາດເຈັບ 5 ຄົນ ເບື້ອງຕົ້ນຍັງບໍ່ຮູ້ສາເຫດ.
ສຳນັກຂ່າວຕ່າງປະເທດລາຍງານວ່າ ເກີດອຸບັດເຫດເຮືອບິນຂະໜາດນ້ອຍແບບສະເທືອນນ້ຳສະເທືອນບົກ ເຊສນາ 208 ບີຕົກຕຳກັບຂົວທາງຫຼວງນອກເມືອງຊຽງໄຮ້ທາງພາກຕາເວັນອອກຕອນກາງຂອງຈີນໃນວັນທີ 20 ກໍລະກົດທີ່ຜ່ານມາ ເຮັດໃຫ້ຜູ້ທີ່ຢູ່ເທິງເຮືອບິນເສຍຊີວິດ 5 ຄົນ ແລະ ໄດ້ຮັບບາດເຈັບ 5 ຄົນ ຊຶ່ງເຮືອບິນດັ່ງກ່າວເປັນຂອງບໍລິສັດ ຈອຍເຈເນີຣັລ ເອວິເອຊັນ ທີ່ໃຫ້ບໍລິການເຮືອບິນເຊົ່າເໝົາລຳ ອອກເດີນທາງຈາກເຂດຈິ້ນຊານ ນອກເມືອງຊຽງໄຮ້ ມຸ່ງໜ້າສູ່ເກາະໂຈວຊານ ຫ່າງອອກໄປທາງໃຕ້ປະມານ 75 ກິໂລແມັດ ເພື່ອເປີດເສັ້ນທາງທ່ອງທ່ຽວສູ່ໝູ່ເກາະດ້ວຍບໍລິການເຮືອບິນນ້ອຍໃນຖ້ຽວບິນນີ້ມີນັກບິນ 1 ຄົນ ນັກບິນຜູ້ຊ່ວຍ 1 ຄົນ ແລະ ຜູ້ໂດຍສານແຂກຮັບເຊີນ 8 ຄົນ ສ່ວນຫຼາຍເປັນສື່ມວນຊົນ.
ເຮືອບິນຕົກຕໍາກັບຂົວ ຫຼັງຈາກອອກເດີນທາງໄດ້ພຽງບໍ່ດົນ ໜ່ວຍກູ້ໄພພົບຜູ້ເສຍຊີວິດໃນທີ່ເກີດເຫດ 5 ຄົນ ແລະ ໄດ້ຮັບບາດເຈັບອີກ 5 ຄົນ ນຳຕົວສົ່ງໂຮງໝໍ ເບື້ອງຕົ້ນເຈົ້າໜ້າທີ່ຍັງບໍ່ຮູ້ສາຍເຫດ ຊຶ່ງຈະເລັ່ງສືບສວນຕໍ່ໄປ.