ກອງ ປະຊຸມໃຫຍ່ຄັ້ງທຳອິດເພື່ອປະກາດ ສ້າງຕັ້ງສະມາຄົມ ສິລະປິນການສະແດງຂື້ນຢ່າງເປັນທາງການ ໃນວັນທີ 30 ມິ ຖຸນານີ້, ຢູ່ນະຄອນຫລວງວຽງຈັນ, ໂດຍກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ ພາຍໃຕ້ການເປັນປະທານຂອງທ່ານ ສຈ. ດຣ ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ, ມີບັນ ດາລັດຖະມົນຕີວ່າການ, ຊ່ວຍວ່າການຈາກກະຊວງຕ່າງໆ ແລະ ຜູ້ຕາງໜ້າສະຖານທູດຈາກປະເທດເພື່ອນມິດອ້ອມຂ້າງເຂົ້າຮ່ວມຢ່າງ ຫລວງຫລາຍ.
ໃນວາລະກອງປະຊຸມ ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຂຶ້ນຜ່ານບົດລາຍງານການເຄື່ອນໄຫວຂອງສະມາ ຄົມສິລະປິນການສະແດງໃນໄລ ຍະຜ່ານມາ ແລະ ທິດທາງແຜນ ການວຽກງານໃນຕໍ່ໜ້າ ແລະ ຈາກນັ້ນກໍໄດ້ດຳເນີນການປ່ອນບັດຄັດເລືອກເອົາຄະນະບໍລິຫານງານ ສະມາຄົມສິລະປິນ ການສະແດງ ໂດຍທ່ານ ບົວເງິນ ຊາພູວົງ ໄດ້ຖືກເລືອກຕັ້ງເປັນປະ ທານສະມາຄົມດັ່ງກ່າວ, ມີຮອງປະທານສະມາຄົມທັງໝົດ 6 ທ່ານ ແລະ ຄະນະກຳມະການ ສະມາຄົມສິລະປິນການສະແດງ ທັງໝົດ 17 ທ່ານ.
ໃນກອງປະຊຸມຄັ້ງນີ້ ທ່ານ ສຈ. ດຣ ບໍ່ແສງຄຳ ວົງດາລາ ໄດ້ມີຄຳເຫັນໃນກອງປະຊຸມວ່າ: ວຽກງານວັດທະນະທຳ ແລະ ສິ ລະປະການສະແດງຂອງລາວ ມັນມີຄວາມໝາຍສຳຄັນຍິ່ງ ນອກຈາກບົ່ງບອກເຖິງເອກະລັກຂອງຄວາມເປັນຊາດ, ເປັນຮາກຖານຂອງການສ້າງຄວາມສາ ມັກຄີ ແລະ ຄວາມໝັ້ນຄົງຍືນຍົງຂອງຊາດ, ເປັນສິ່ງສະແດງເຖິງກຽດສັກສີ, ຄວາມພາກພູມໃຈຮ່ວມກັນຂອງປະຊາຊົນລາວບັນ ດາເຜົ່າ, ເປັນປັດໄຈໃຫ້ຄົນທັງຊາດປະພຶດໃນທາງທີ່ດີງາມ, ມີຄຸນນະທຳ ເພື່ອພັດທະນາຕົນເອງພັດທະນາສັງຄົມ ແລະ ປະເທດຊາດ. ທ່ານລັດຖະມົນຕີ ກ່າວວ່າ: ຊາດລາວເຮົາແມ່ນຊາດທີ່ມີອະລິຍະທຳ ແລະ ມີວັດ ທະນະທຳອັນດີງາມມາແຕ່ດົນນານ, ປະກອບດ້ວຍຫລາຍຊົນເຜົ່າ ແລະ ແຕ່ລະຊົນເຜົ່າລ້ວນແຕ່ມີຂະນົບທຳນຽມ, ປະເພນີ, ມູນເຊື້ອວັດທະນະທຳ ແລະ ສິລະປະການສະແດງທີ່ເປັນເອກະລັກຂອງຕົນ, ເຊິ່ງໂຮມເຂົ້າເປັນວັດ ທະນະທຳ ແລະ ສິລະປະການສະແດງຂອງວົງຄະນາຍາດແຫ່ງຊາດ, ອັນນັ້ນແມ່ນມູນມໍລະດົກວັດທະນະທຳອັນລ້ຳຄ່າ, ເປັນພື້ນຖານດ້ານຈິດໃຈຂອງສັງຄົມ ແລະ ເປັນປັດໄຈສຳຄັນຄ້ຳປະ ກັນຄວາມຍືນຍົງຄົງຕົວຂອງຊາດລາວເຮົາ ແລະ ເວລາໃດກໍມີຄວາມເອກອ້າງທະນົງໃຈ ແລະ ຫວງແຫນວັດທະນະທຳ ແລະ ສິ ລະປະການສະແດງປະຈຳຊາດ, ໄດ້ປົກປັກຮັກສາ ແລະ ເສີມຂະ ຫຍາຍມັນໃຫ້ຄົງຢູ່ຄູ່ຊາດລາວມາຈົນເຖິງທຸກວັນນີ້. ໂດຍເຫັນ ແຈ້ງຄຸນຄ່າ ແລະ ຄວາມສຳຄັນຂອງວັດທະນະທຳ ກໍຄືສິລະປະ ການສະແດງ, ພັກເຮົາຈຶ່ງໄດ້ເອົາໃຈໃສ່ຕໍ່ຂົງເຂດດັ່ງກ່າວ, ໄດ້ວາງແຜນນະໂຍບາຍປົກປັກຮັກ ສາ, ກໍ່ສ້າງ ແລະ ສົ່ງເສີມວັດທະ ນະທຳ ແລະ ສິລະປະການສະແດງຂອງຊາດຢ່າງສອດຄ່ອງກັບແຕ່ລະໄລຍະ ທັງໄດ້ເອົາໃຈໃສ່ຈັດຕັ້ງ, ນຳພາ ແລະ ຊີ້ນຳຕົວຈິງ. ໂດຍເລີ່ມຕົ້ນແຕ່ໄລຍະຊຸມປີແຫ່ງການຕໍ່ສູ້ປົດປ່ອຍຊາດ, ວັດ ທະນະທຳທີ່ມີລັກສະນະຊາດ, ລັກສະນະປະຊາຊົນ ແລະ ລັກສະນະກ້າວໜ້າກໍໄດ້ຮັບການສ້າງຕັ້ງຂຶ້ນບົນພື້ນຖານການສືບທອດ, ເສີມຂະຫຍາຍຄຸນຄ່າຂອງວັດທະນະທຳແຫ່ງຊາດ, ສົມ ທົບກັບການຮັບເອົາຄຸນຄ່າວັດທະນະທຳອັນດີງາມຂອງມວນມະນຸດຢ່າງມີ ການເລືອກເຟັ້ນ ແລະ ເວົ້າສະເພາະສິລະປະການສະແດງກໍໄດ້ມີບົດບາດອັນສຳຄັ້ນໃນການ ປຸກລະດົມນ້ຳໃຈຮັກຊາດ, ຄຽດແຄ້ນສັດຕູ ແລະ ສາມັກຄີຕໍ່ສູ້, ເດັດດ່ຽວອາດຫານຂອງພະນັກງານນັກຮົບ ແລະ ປະຊາຊົນເຜົ່າຕ່າງໆ ຈົນສາມາດເຮັດສຳເລັດພະລະກຳປະຫວັດສາດແຫ່ງການປົດປ່ອຍຊາດ ສືບທອດມາເທົ່າທຸກວັນນີ້.
ທ່ານ ລັດຖະມົນຕີຍັງໄດ້ຖືໂອກາດດັ່ງກ່າວ ສະແດງຄວາມຊົມເຊີຍ ຕໍ່ຄະນະບໍລິຫານງານສະມາຄົມສິລະປິນການສະແດງທີ່ຖືກປະກາດສ້າງຕັ້ງ ຂຶ້ນຢ່າງເປັນທາງການ ແລະ ເຊື່ອໝັ້ນວ່າ ບັນດາທ່ານທີ່ໄດ້ຮັບກຽດຖືກເລືອກເປັນປະທານ, ຮອງປະ ທານສະມາຄົມໃນຄັ້ງນີ້ ຈົ່ງໄດ້ພາກັນເຊີດຊູບົດບາດການນຳພາໃນການປົກປັກຮັກສາຜົນງານ ແລະ ຄຸນງາມຄວາມດີຂອງເຫລົ່າສິລະປິນເອົາໄວ້ຕັ້ງໜ້າໃນການຄົ້ນຄິດຈັດຕັ້ງ ນຳພາສະ ມາຄົມໃຫ້ດຳເນີນວຽກງານຕາມພາລະບົດບາດ ເພື່ອກາຍເປັນແບບຢ່າງ ແລະ ແວ່ນແຍງອັນໃສແຈ້ງ ໃຫ້ແກ່ສິລະປິນລຸ້ນລູກຫລານໄດ້ສືບທອດ ແລະ ຄົ້ນຄ້ວາຮ່ຳຮຽນ ພ້ອມນີ້ ກໍໍໃຫ້ສືບຕໍ່ປະກອບສ່ວນປະດິດຄິດແຕ່ງ ແລະ ສ້າງຜົນງານເຂົ້າໃນສວນອຸດທິຍານ ແລະ ຄັງສາງທາງດ້ານວັດທະນະທຳການສະແດງຂອງຊາດເຮົາໃຫ້ນັບມື້ອຸດົມຮັ່ງ ມີ ແລະ ຮຸ່ງເຮືອງສວຍງາມຍິ່ງໆ ຂຶ້ນ.
ຂອບໃຈຂ່າວຈາກ ລາວພັດທະນາ