ລັດຖະບານກູເວດກຳນົດອັດຕາຄ່າຈ້າງແຮງງານຂັ້ນຕໍ່າ ສຳລັບແຮງງານແມ່ບ້ານຕ່າງຊາດຫຼາຍແສນຄົນ ສ່ວນໃຫຍ່ເປັນແມ່ຍິງຄົນອາຊີ ນັບເປັນປະເທດທຳອິດໃນກຸ່ມປະເທດອ່າວເປີເຊຍ.
ສຳນັກຂ່າວຕ່າງປະເທດລາຍງານວ່າ: ທ່ານ ໂມຮຳໝັດ ຄາຫຼິດ ອັລ-ຊາບາ ລັດຖະມົນຕີວ່າການກະຊວງພາຍໃນກູເວດ ກຳນົດອັດຕາຄ່າແຮງງານຂັ້ນຕໍ່າໄວ້ຢູ່ທີ່ 60 ດີນາຫຼືປະມານ 200 ໂດລາສະຫະລັດຕໍ່ເດືອນ ແລະ ຍັງໃຫ້ແຮງງານຜູ້ຊ່ວຍແມ່ບ້ານໄດ້ສິດທິພິເສດອື່ນໆຈຳນວນຫຼາຍ ຊຶ່ງກູເວດເປັນປະເທດທຳອິດໃນພາກພື້ນອ່າວເປີເຊຍ ທີ່ກຳນົດລະບຽບສະພາບການການເຮັດວຽກຂອງແຮງງານຄົນໃຊ້ ຂະນະທີ່ກຸ່ມຮີວແມນ ໄຣ ວອດ ແລະ ແນວຮ່ວມຮຽກຮ້ອງໃຫ້ປະເທດອື່ນໆດຳເນີນຮອຍຕາມ ເພື່ອແກ້ໄຂບັນຫາການເອົາປຽບທີ່ມີຢູ່ແພ່ຫຼາຍ, ກົດສະດີກາທີ່ຜ່ານການອະນຸມັດຈາກກອງປະຊຸມລັດຖະສະພາກູເວດໃນປີທີ່ຜ່ານມາ ຍັງກຳນົດໃຫ້ນາຍຈ້າງຕ້ອງຈ່າຍເງິນເພີ່ມຖ້າຫາກຄົນໃຊ້ເຮັດວຽກເກີນກຳນົດເວລາ ລວມທັງແຮງງານມີສິດທິໄດ້ພັກປະຈຳອາທິດ ແລະ ລາພັກຜ່ອນປະຈຳປີ 30 ມື້ ໂດຍໄດ້ຮັບຄ່າຈ້າງເຮັດວຽກມື້ລະ 12 ຊົ່ວໂມງລວມທັງໄລຍະພັກ ແລະ ໄດ້ຮັບເງິນເພີ່ມພິເສດ 1 ເດືອນ ເມື່ອສິ້ນສຸດສັນຍາ.
ປະຈຸບັນ ແຮງງານຄົນໃຊ້ຢູ່ໃນກູເວດປະມານ 6 ແສນຄົນ ຊຶ່ງເປັນສ່ວນໜຶ່ງຂອງກອງທັບແຮງງານ 2,4 ລ້ານຄົນ ທີ່ກະຈາຍຢູ່ທົ່ວຕາເວັນອອກກາງ ແລະ ກຸ່ມຄົນເຫຼົ່ານີ້ບໍ່ໄດ້ຮັບຄວາມຄຸ້ມຄອງຈາກກົດໝາຍແຮງງານ ແລະ ກຸ່ມເຄື່ອນໄຫວດ້ານສິດທິມະນຸດອື່ນໆ ເຮັດໃຫ້ການບັນທຶກການລະເມີດສິດທິຂອງແຮງງານແພ່ຫຼາຍຂຶ້ນ ຊຶ່ງລວມທັງບໍ່ໄດ້ຮັບຄ່າຈ້າງ, ເຮັດວຽກດົນກວ່າກຳນົດໃນແຕ່ລະມື້ໂດຍບໍ່ມີວັນພັກ, ຖືກທຳຮ້າຍຮ່າງກາຍ, ບໍ່ມີຊ່ອງທາງຈະແຈ້ງໃນການຮັບການຊ່ວຍເຫຼືອຫຼືເງິນຊົດເຊີຍ.