ບ່າຍວັນທີ 13 ກໍລະກົດ 2016 ທີ່ກະຊວງການເງິນນະຄອນຫຼວງວຽງ ຈັນໄດ້ມີພິທີເຊັນສັນຍາເງິນກູ້ຢືມລະຫວ່າງລັດຖະບານລາວກັບທະນາຄານໂລກ ມູນຄ່າ 30 ລ້ານໂດລາ ເພື່ອສືບຕໍ່ ໃສ່ໂຄງການຫຼຸດຜ່ອນຄວາມທຸກຍາກໄລຍະ 3 ແນໃສ່ປັບປຸງລະບົບພື້ນຖານໂຄງລ່າງເຮັດໃຫ້ປະຊາຊົນຢູ່ເຂດຊົນນະບົດຈຳນວນ 10 ແຂວງມີຖະໜົນຫົນທາງ, ລະບົບນ້ຳສະອາດ ແລະຊ່ວຍປັບປຸງຊີ ວິດການເປັນຢູ່ ແລະໂພຊະນາການ.
ໂດຍຮ່ວມລົງນາມໃນສັນຍາໃນຄັ້ງນີ້ຂອງທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ແລະທ່ານ ອຸນຣິກ ຊາກາວ ຜູ້ອຳນວຍການຂອງທະນາຄານໂລກປະຈຳພາກພື້ນອາຊີຕາເວັນອອກສຽງໃຕ້, ມີທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນກວ້າງ ສຸວັນນະພັນ ຜູ້ອຳ ນວຍການກອງທຶນຫຼຸດຜ່ອນຄວາມທຸກ ຍາກຄະນະພັດທະນາຊົນນະບົດ ແລະລົບລ້າງຄວາມທຸກຍາກຂັ້ນສູນກາງຮູ້ວ່າ: ສຳລັບໂຄງການຫຼຸດຜ່ອນຄວາມທຸກ ຍາກໄລຍະ 3 ແມ່ນໂຄງການສຶບຕໍ່ຫຼຸດຜ່ອນຄວາມທຸກຍາກໄລຍະ 1 ຊຶ່ງໄດ້ເລີ່ມມາແຕ່ປີ 2003-2011 ໃນມູນຄ່າ 41 ລ້ານໂດລາ, ໃນໄລຍະ 2 ແຕ່ປີ 2008-2016 ດ້ວຍທຶນຊ່ວຍເຫຼືອຈຳນວນ 83,37 ລ້ານໂດລາ, ພ້ອມນັ້ນກໍຍັງມີ ທຶນຊ່ວຍເຫຼືອຈາກລັດຖະບານ ແລະ ທຶນສົມຈາກພາກສ່ວນສາກົນອື່ນໆອີກ.
ປະຈຸບັນ ທາງໂຄງການໄດ້ຈັດຕັ້ງປະຕິບັດແລ້ວ 1.400 ກວ່າໂຄງການທີ່ສຸມໃສ່ພັດທະນາພື້ນຖານໂຄງລ່າງຕົ້ນຕໍແມ່ນການກໍ່ສ້າງໂຮງຮຽນປະຖົມ, ອະນຸບານ, ສຸກສາລາ, ຝາຍນ້ຳລົ້ນ, ຊົນລະປະທານຂະໜາດນ້ອຍ ແລະທາງເຂົ້າໝູ່ບ້ານໃນແຂວງຫົວພັນ, ຜົ້ງສາລີ, ອຸດົມໄຊ, ຫຼວງນ້ຳທາ, ຫຼວງພະບາງ, ຊຽງຂວາງ, ອັດຕະປື, ເຊກອງ, ສະຫວັນນະເຂດ ແລະສາລະວັນ, ປະຊາຊົນໄດ້ຮັບຜົນປະໂຫຍດທັງໝົດ 7 ແສນກວ່າຄົນ, ນອກຈາກນັ້ນ ຍັງສ້າງຕັ້ງທົດລອງຄອບຄົວຕົວແບບໃນການປັບປຸງຊີວິດການເປັນຢູ່ໂດຍຖືເອົາການຜະລິດເປັນສິນຄ້າ ເພື່ອແກ້ໄຂຄວາມທຸກຍາກ ຊຶ່ງເຮັດໃຫ້ຫຼາຍບ້ານຂອງເມືອງຫ້ຽມ, ເມືອງຊອນ, ເຊໂປນ ແລະເມືອງນອງ ໄດ້ກາຍເປັນບ້ານພົ້ນທຸກ, ພ້ອມທັງກຽມກ້າວເຂົ້າສູ່ບ້ານພັດທະນາຕາມແນວທາງຂອງລັດຖະບານ.
ສຳລັບສັນຍາສືບຕໍ່ໂຄງການໄລຍະ 3 ຄັ້ງນີ້ ເປັນທຶນກູ້ຢືມມູນຄ່າ 30 ລ້ານໂດລາ (ນັບແຕ່ປີ 2016-2020) ເພື່ອຈັດຕັ້ງປະຕິບັດຢູ່ໃນ 10 ແຂວງດັ່ງກ່າວ ນັ້ນມີອາຍຸການຊຳລະ ເພື່ອຊ່ວຍແກ້ໄຂຄວາມທຸກຍາກຢູ່ຊົນນະບົດຂອງ ສປປ ລາວ, ໂດຍຈະສືບຕໍ່ປັບປຸງພື້ນຖານໂຄງລ່າງເພື່ອການເຂົ້າເຖິງເຂດຊົນນບົດຫ່າງໄກສອກຫຼີກເປັນຕົ້ນແມ່ນທາງ ຊົນນະບົດ ແລະລະບົບນ້ຳສະອາດ ຊຶ່ງຈະຊ່ວຍປັບປຸງຊີວິດການເປັນຢູ່ ແລະໂພສະນາການຂອງປະຊາຊົນໃນເຂດຊົນນະບົດຈຳນວນ 150 ຄົວເຮືອນໃຫ້ດີຂຶ້ນ, ພ້ອມດຽວກັນນັ້ນການສະໜັບສະໜູນເທື່ອນີ້ ກໍສອດຄ່ອງກັບແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 ທີ່ຈະປັບປຸງພື້ນຖານໂຄງລ່າງ ເພື່ອ ເຮັດໃຫ້ປະຊາຊົນຢູ່ເຂດຊົນນະບົດມີຖະໜົນຫົນທາງທີ່ສາມາດເຂົ້າເຖິງການສຶກສາຂັ້ນພື້ນຖານ ແລະລະບົບນ້ຳສະອາດ, ຊຶ່ງເປັນປັດໄຈສຳຄັນໃນການແກ້ໄຂຄວາມທຸກຍາກຢູ່ໃນຊົນນະບົດ.
ທີ່ມາ: ເສດຖະກິດ-ສັງຄົມ