ໂຮງໝໍກຸງເທບອຸດອນ(ປະເທດໄທ) ເປີດເຜີຍການຜ່າຕັດເກີດລູກແຝດ 5 ຄົນ ເປັນຊາຍ 2 ຍິງ 3 ສຳເລັດເປັນແມ່ຜູ້ທຳອິດທີ່ແຝດ 5 ຄົນ ຂອງລາວ ແມ່ແລະເດັກສຸຂະພາບສົມບູນ ແຂງແຮງດີ.
ຕອນບ່າຍຂອງວັນທີ 25 ມິຖຸນາ ທີ່ຜ່ານມາ ຢູ່ຫ້ອງປະຊຸມ ໂຮງໝໍກຸງເທບອຸດອນ ພົນໂທ ດຣ ທະວັດໄຊ ສະສິປະພາ ຜູ້ອຳນວຍການໂຮງໝໍ, ພັນເອກ ດຣ ອະພິນັນ ຊັບທອງຄຳ ຮອງຜູ້ອຳນວຍການ ແລະທ່ານໝໍ ພິໄຊໂຊຕິນ ພະຣັດຕະນະພັດ ແພດປະດຸງຄັນ ຜູ້ຊ່ຽວຊານເລື່ອງມີລູກຍາກ ຖະແຫຼງຂ່າວ ກໍລະນີໂຮງໝໍກຸງເທບອຸດອນ ຜ່າຕັດເກີດແຝດ 5 ຜູ້ທຳອິດຂອງລາວສຳເລັດເປັນລາຍທຳອິດ ໂດຍແມ່ແລະລູກນ້ອຍທຸກຄົນ ສຸຂະພາບສົມບູນ ແຂງແຮງ ແລະປອດໄພດີ ເຊິ່ງນັບເປັນກຽດຂອງໂຮງໝໍ.
ໂດຍ ພົນໂທ ດຣ ທະວັດໄຊ ກ່າວວ່າການຖືພາແຝດທາງການແພດຖືວ່າເປັນການຖືພາທີ່ມີຄວາມສ່ຽງສູງ ເພາະມົດລູກມະນຸດເຮົາຖືກອອກແບບມາເພື່ອຮອງຮັບການຖືພາພຽງຄັ້ງລະ 1 ຄົນເທົ່ານັ້ນ ແຕ່ເນື່ອງຈາກປັດຈຸບັນວິທະຍາການທາງການແພດມີຄວາມກ້າວໜ້າຫຼາຍຂຶ້ນ ໂດຍສະເພາະເທັກໂນໂລຢີທີ່ຊ່ວຍດ້ານການຈະເລີນພັນ ການມີລູກຍາກ ເຊັ່ນ ການໃຊ້ຢາກະຕຸ້ນໄຂ່ເຮັດໃຫ້ໄດ້ໄຂ່ທີ່ສຸກພ້ອມກັນຄັ້ງລະຫຼາຍໆໜ່ວຍ ເຮັດໃຫ້ອັດຕາການຖືພາແຝດສູງຂຶ້ນ ໂດຍສະຖິຕິທົ່ວໄປໃນການຖືພາແຝດ 5 ຕາມທຳມະຊາດມີອັດຕາການພົບຢູ່ທີ່ 1 : 48,000,000 ແລະມີອັດຕາການເກີດກ່ອນກຳໜົດສູງຂຶ້ນຫຼາຍກວ່າ 91 ເປີເຊັນ.
ຂ່າວໃຫ້ຮູ້ຕື່ມວ່າ ແມ່ແຝດ 5 ຜູ້ນີ້ ມີຊື່ຫຼິ້ນວ່າ ນາງ ເບະ ເປັນປະຊາຊົນລາວ, ເຊື້ອຊາດ ແລະສັນຊາດລາວ, ບ້ານວຽງຈະເລີນ, ເມືອງໄຊເສດຖາ, ນະຄອນຫຼວງວຽງຈັນ. ອາຍຸ 33 ປີ. ຜ່ານມານາງມີລູກສາວແລ້ວຜູ້ໜຶ່ງ ແຕ່ຢາກໄດ້ເພິ່ມແຕ່ຍ້ອນເປັນຄົນມີລູກຍາກຈຶ່ງໄດ້ປຶກສາໝໍ ແລະໄດ້ເຮັດກຣິບ ຫຼືປະສົມທຽມເອົາ ແລະແລ້ວກໍໄດ້ຜົນເກີນຄາດ ມີເຖິງ 5 ຄົນ ໃນຄັ້ງດຽວ.
ການຜ່າຕັດເກີດຜ່ານພົ້ນໄດ້ວຍດີໂດຍມີຄວາມປອດໄພທັງມານດາ ແລະແຝດທັງ 5 ຄື: 1. ເພດຊາຍນ້ຳໜັກ 1,810 ກະລາມ, 2. ເພດຍິງ ນ້ຳໜັກ 1,820 ກະລາມ, 3. ເພດຊາຍ ນ້ຳໜັກ 1,620 ກະລາມ, 4. ເພດຍິງ ນ້ຳໜັກ 1,650 ກະລາມ, ແລະ 5. ເພດຍິງ ຜູ້ສຸດທ້າຍນ້ຳໜັກ 1,140. ເຊິ່ງເວລາເກີດແມ່ນເລິ່ມແຕ່ 14:37 ຫາ 14:41 ຂອງວັນທີ 25 ມິຖຸນາ 2014 ທີ່ຜ່ານມາ.
ທັງນີ້ ທ່ານໝໍຜູ້ດຳເນີນການປິ່ນປົວ ທີ່ຊ່ວຍໃຫ້ມີການຖືພາແລະເບິ່ງແຍງແມ່ແຝດຜູ້ນີ້ຄື ທ່ານໝໍ ພິໄຊ ໂຊຕິນພະຣັດຕະນະພັດ ແລະຄວາມຮ່ວມມືຈາກທີມແພດພະຍາບານ ໂຮງໝໍກຸງເທບອຸດອນໂຮງໝໍຄ້າຍປະຈັກ ສິລະປາຄົມ ໂຮງໝໍກຸງເທບ ແລະສູນຊູພິເຣຍ ເອອາ ທີ ອຸດອນທານີ.
ຂ່າວຈາກເດລິນິວ