ຫຼ້າສຸດນີ້ບໍລິສັດ Google ໄດ້ປ່ອຍໂຕເລກກ່ຽວກັບຍອດຜູ້ໃຊ້ລວມຂອງລະບົບ Android ໃນແຕ່ລະເວີຊັ່ນ ສຳລັບເດືອນກໍລະກົດອອກມາ. ໂດຍລະບົບໃໝ່ຫຼ້າສຸດແບບ Android 6.0 Marshmallow ກໍມີອຸປະກອນທີ່ໃຊ້ລະບົບດັ່ງກ່າວນີ້ເຖິງ 13.3% ຂອງອຸປະກອນລະບົບ Android ທັງໝົດ, ເຊິ່ງເພີ່ມຂຶ້ນຈາກ 10.1% ນັບຕັ້ງແຕ່ເດືອນມິຖຸນາ.
ສຳລັບເວີຊັ່ນທຳອິດຂອງ Marshmallow ແມ່ນຖືກປ່ອຍອອກມາໃນຊ່ວງເດືອນພະຈິກ ເຊິ່ງໃນຕອນນັ້ນກໍມີສ່ວນແບ່ງພຽງ 0.3% ກ່ອນຈະເພີ່ມຂຶ້ນມາ 0.7% ໃນຊ່ວງເດືອນມັງກອນປີນີ້ ແລະເພີ່ມຂຶ້ນ 13.3% ໃນເດືອນນີ້. ໃນຂະນະທີ່ເວີຊັ່ນທີ່ມີຄົນໃຊ້ຫຼາຍສຸດແບບ Lollipop ກໍຫຼຸດລົງມາເຫຼືອ 35.1% ຈາກ 35.4% ຂອງເດືອນກ່ອນ. ເວີຊັ່ນ KitKat ກໍຫຼຸດລົງຈາກ 31.6% ເປັນ 30.1%, ໃນຂະນະທີ່ Jelly Bean ຫຼຸດລົງມາຫຼາຍທີ່ສຸດຄື 17.8% ຈາກ 18.9%. ສ່ວນເວີຊັ່ນ Ice Cream Sandwich ແລະ Gingerbread ຍັງຄົງຢູ່ທີ່ 1.7% ແລະ 1.9%. ເວີຊັ່ນທີ່ແປກໃຈຫຼາຍທີ່ສຸດກໍຄົງເປັນ Froyo ທີ່ຍັງຄົງມີເປີເຊັນຢູ່ທີ່ 0.1% ຂອງອຸປະກອນແອນດຣອຍທັງໝົດ.
ໂດຍໂຕເລກເຫຼົ່ານີ້ແມ່ນຈະລວບລວມມາຈາກອຸປະກອນ Android ທັງໝົດທີ່ເຂົ້າໃຊ້ງານຮ້ານຄ້າ Play Store ໃນຊ່ວງ 7 ມື້ ກ່ອນທີ່ຈະສິ້ນສຸດລົງວັນທີ 11 ກໍລະກົດ 2016 ນີ້.