ສິງກະໂປປະກາດແຜນການທີ່ຈະກໍ່ສ້າງອາຄານຜູ້ໂດຍສານແຫ່ງໃໝ່ແຫ່ງທີ່ 5 ຂອງສະໜາມບິນຊາງງິ ໃຫ້ສູງກວ່າອາຄານໃດໆທີ່ມີຢູ່ ແລະ ຍັງຈະສ້າງຜາກັ້ນນ້ຳຂຶ້ນຕະຫຼອດແຄມຝັ່ງ ຊຶ່ງເປັນບັນຫາໜຶ່ງໃນມາດຕະການຕໍ່ສູ້ກັບບັນຫາການປ່ຽນແປງສະພາບອາກາດທີ່ຖືເປັນບັນຫາທ້າທາຍໜຶ່ງຂອງສິງກະໂປ.
ສຳນັກຂ່າວຕ່າງປະເທດລາຍງານວ່າ ຕາມການລາຍງານການປ່ຽນແປງສະພາບອາກາດຂອງລັດຖະບານສິງກະໂປທີ່ເປີດເຜີຍອອກມາໃນທ້າຍອາທິດທີ່ຜ່ານມາລະບຸວ່າ ອາຄານຜູ້ໂດຍສານແຫ່ງໃໝ່ຂອງສະໜາມບິນຊາງງິຈະສ້າງຂຶ້ນໃຫ້ສູງກວ່າລະດັບນ້ຳທະເລ 5,5 ແມັດ ຂະນະທີ່ໃນປີ 2011 ລັດຖະບານສິງກະໂປກຳນົດໃຫ້ການປັບຖົມທີ່ດິນຈະຕ້ອງມີຄວາມສູງກວ່າລະດັບນ້ຳທະເລຢ່າງໜ້ອຍ 4 ແມັດ ຊຶ່ງເພີ່ມຂຶ້ນຈາກເດີມທີ່ກົດໝາຍກຳນົດກ່ອນໜ້ານີ້ຢູ່ທີ່ 3 ແມັດ.
ທັງນີ້ ການປັບປຸງຂໍ້ກຳນົດດັ່ງກ່າວມີຂຶ້ນເນື່ອງຈາກສິງກະໂປມີຄວາມສ່ຽງທີ່ຈະໄດ້ຮັບຜົນກະທົບຈາກການປ່ຽນແປງ ແລະ ປ່ຽນແປງຂອງສະພາບອາກາດ ເນື່ອງຈາກສິງກະໂປເປັນເກາະເຂດຮ້ອນທີ່ຕັ້ງຢູ່ພື້ນທີ່ລຸ່ມຕໍ່າ ບັນຫາການປ່ຽນແປງຂອງສະພາບອາກາດໂລກໄດ້ສ້າງຄວາມທ້າທາຍທີ່ຍາກລ້ຳບາກຫຼາຍຂຶ້ນ ຂະນະທີ່ສະໜາມບິນຊາງງິ ຊຶ່ງເປັນສະໜາມບິນນານາຊາດຂອງສິງກະໂປ ຕ້ອງປະເຊີນກັບຄວາມສ່ຽງໄພຢູ່ແລ້ວ ຈາກໄພນ້ຳຖ້ວມເນື່ອງຈາກຝົນຕົກໜັກ ແລະ ລະດັບນ້ຳທະເລເພີ່ມສູງຂຶ້ນ.