ປະຈຸບັນເຖິງແມ່ນສະພາບອາກາດຈະບໍ່ຮ້ອນອົບເອົ້າກໍຕາມ ແຕ່ກໍບໍ່ຄວນປະໝາດກ່ຽວກັບບັນຫາໄຟໄໝ້ ເພາະຫຼ້າສຸດໄດ້ເກີດເຫດໄຟໄໝ້ເຮືອນມໍລະດົກໂລກ ເລກທີ 394 ທີ່ບ້ານໂພນເຮືອງ ເມືອຫຼວງພະບາງ ເສຍຫາຍທັງຫຼັງ.
ຕອນເຊົ້າວັນທີ 11 ກໍລະກົດນີ້ເຈົ້າໜ້າທີ່ມອດໄຟຫຼວງພະບາງ ໄດ້ລະດົມລົດສີດນ້ຳສະກັດຈຳນວນ 6 ຄັນ ພ້ອມ ເຈົ້າໜ້າທີ່ 20 ກວ່າຄົນເຂົ້າສີດນ້ຳສະກັດກັ້ນໄຟໄໝ້ເຮືອນມໍລະດົກໂລກຫຼວງພະບາງ ຫຼັງໄດ້ຮັບແຈ້ງຈາກພົນລະເມືອງ ດີໂດຍໃຊ້ເວລາ 30 ກວ່ານາທີກໍສາມາດຄວບຄຸມໄຟໄວ້ໄດ້.
ທ່ານ ພັັນຕີ ຈັນແພງ ສິງພອນໄຊ ຮັກສາການຫົວໜ້າຕ້ານ ແລະສະກັດກັ້ນອັກ ຄີໄພ ປກສ ແຂວງຫຼວງພະບາງ ໄດ້ໃຫ້ ສຳພາດຕໍ່ທີມຂ່າວພວກເຮົາວ່າ: ຫຼັງຈາກເຈົ້າໜ້າທີ່ມອດໄຟໄດ້ຮັບແຈ້ງຈາກພົນລະເມືອງດີໃນເວລາປະມານ 8:00 ໂມງ ວ່າມີເຫດໄຟໄໝ້ທີ່ບ້ານໂພນເຮືອງ ທາງເຈົ້າໜ້າທີ່ກໍໄດ້ລະດົມລົດສີດນ້ຳຈຳນວນ 6 ຄັນ ພ້ອມເຈົ້າໜ້າທີ່ 20 ກວ່າຄົນ ເຂົ້າສີດນ້ຳສະກັດກັ້ນໄຟໄໝ້ ໂດຍໃຊ້ເວລາ 30 ກວ່ານາທີ ຈິ່ງສາມາດຄວບຄຸມໄຟໄວ້ໄດ້ບໍ່ໃຫ້ໄໝ້ລາມໄປຕໍ່ເຮືອນໃກ້ຄຽງ, ເຫດການຄັ້ງນີ້ໂຊກດີບໍ່ມີໃຜໄດ້ ຮັບບາດເຈັບ ຫຼື ເສຍຊີວິດ, ສ່ວນສາເຫດການເກີດໄຟໄໝ້ແມ່ນຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ ພ້ອມນັ້ນທ່ານຍັງໄດ້ຮຽກຮ້ອງໃຫ້ທຸກຄົນຊ່ວຍເປັນເຈົ້າການນຳກັນເວລາໃຊ້ໄຟທຸກປະເພດຄວນກວດກາເບິ່ງໃຫ້ລະອຽດກ່ອນອອກຈາກເຮືອນ ເພື່ອຮັບປະກັນການເກີດໄຟໄໝ້ແບບນີ້ ອັນຈະນຳມາເຖິງຄວາມສູນເສຍຊັບສິນຢ່າງມະຫາສານຕໍ່ເພື່ອນບ້ານໃກ້ຄຽງກໍຄືຂອງຕົນເອງ ໂດຍບໍ່ຄາດຄິດ ສະນັ້ນ ຈົ່ງພ້ອມກັນຍົກສູງສະຕິຕໍ່ການໃຊ້ໄຟແມ່ນຈະປອດໄພທີ່ສຸດ.
ດ້ານເຈົ້າໜ້າທີ່ຂອງຫ້ອງການມໍລະດົກໂລກໃຫ້ຮູ້ຕື່ມວ່າ: ເຮືອນຫຼັງທີ່ຖືກໄຟໄໝ້ເສຍຫາຍທັງຫຼັງນັ້ນແມ່ນເຮືອນຂອງນາງ ບົວເລືອນ ແລະທ້າວ ໂລ ປະເພດເຮືອນເປັນເຮືອນ 2 ຊັ້ນ, ໂອບຝາຕັອກຊີ(ສີມັງໂອບໄມ້) ໄດ້ຂຶ້ນບັນຊີມໍລະດົກເລກທີ 394 ໃຫ້ເປັນເຮືອນມໍລະດົກໂລກ ຂອງເມືອງຫຼວງພະບາງ ສຳລັບການປຸກສ້າງຄືນໃໝ່ແມ່ນຍັງຢູ່ໃນຂັ້ນຕອນການສຳຫຼວດອອກແບບຂອງເຈົ້າໜ້າທີ່ມໍລະດົກໂລກ.
ທີ່ມາ: ເສດຖະກິດ-ສັງຄົມ