ທຸກໆຄົນທີ່ເກີດມາໃນໂລກນີ້ ແນ່ນອນຢູ່ແລ້ວວ່າ ໃຜໆກໍຕ້ອງການເງິນທອງ ກາຍເປັນຄົນລ້ຳລວຍກັນທັງນັ້ນ ແຕ່ວ່າມີສິ່ງໜຶ່ງທີ່ສຳຄັນກວ່າສິ່ງອື່ນໃດ ທີ່ຢູ່ສູງສຸດນັ້ນກໍຄື “ຄວາມສຸກ” ຖ້າມີເງິນທອງ ແຕ່ວ່າຮ່າງ ກາຍແລະຈິດໃຈ ບໍ່ມີຄວາມສຸກ ຊີວິດກໍສູນເປົ່າ.
ຂຶ້ນຊື່ວ່າ “ຄວາມສຸກ”ນັ້ນ ເຮົາອາດຈະນິຍາມ ຫລືຂະຫຍາຍຄວາມໝາຍໄປໄດ້ຫລາຍຢ່າງ ເປັນຕົ້ນວ່າ : ຄວາມສະບາຍກາຍສະບາຍໃຈ, ຄວາມສົດຊື່ນແຈ່ມໃສ, ຮ່າງກາຍມີຄວາມສຸກສົມບູນ, ຢູ່ດີກິນດີ ແລະອື່ນໆ. ເຊິ່ງຄວາມສຸກໃນທີ່ນີ້ ຈະຂໍນຳເອົາມາເວົ້າ ມີຢູ່ 15 ຢ່າງຄື :
- ອາຫານ : ຕ້ອງກິນອາຫານທີ່ມີປະໂຫຍດ ມີຄຸນຄ່າທາງໂພຊະນາການ ຂາດບໍ່ໄດ້ກໍແມ່ນຈຳພວກອາຫານ 5 ໝູ່ຫັ້ນແຫລະ!.
- ອາກາດ : ຫາຍໃຈເອົາອາກາດສົດ ຮ່າງກາຍແລະຈິດໃຈຈະໄດ້ສົດຊື່ນແຈ່ມໃສ.
- ອາລົມ : ຕ້ອງຮູ້ຈັກສ້າງໃຫ້ຕົນເອງມີອາລົມຫົວຂວັນ, ຍິ້ມຫົວມ່ວນຊື່ນລື່ນເລີງຢູ່ຕະຫລອດເວລາ.
- ອອກກຳລັງກາຍ : ຮ່າງກາຍຊິແຂງແຮງໄດ້ ກໍມີສາເຫດມາຈາກການອອກກຳລັງກາຍຢ່າງສະໝໍ່າສະເໝີ ດັ່ງນັ້ນກໍຄວນເຝິກໃຫ້ກາຍເປັນນິດໄສ.
- ອຸດຈາລະ : ຄວນຮູ້ຈັກຖ່າຍເທໃຫ້ເປັນເວລາ ໂດຍສະເພາະຕອນເຊົ້າ ເພາະວ່າກ່ອນກິນອາຫານໃໝ່ ກໍຄວນປະຖິ້ມອາຫານເກົ່າ ເຂົ້າຫ້ອງນ້ຳ ຖ່າຍໜັກ-ຖ່າຍເບົາ ອາບນ້ຳໃຫ້ຮ່າງກາຍມີຄວາມສົດຊື່ນແຈ່ມໃສ ເພື່ອຈະໄດ້ເພີ່ມເຕີມສິ່ງໃໝ່ໆເຂົ້າສູ່ຮ່າງກາຍ.
- ອະນາໄມ : ສະພາບແວດລ້ອມໃນການໃຊ້ຊີວິດກໍຄວນເຮັດໃຫ້ມັນສະອາດ ເພາະວ່າສຸຂະພາບທີ່ດີມີສາເຫດມາຈາກ ການກິນສະອາດ, ຢູ່ສະອາດ ແລະບ່ອນນອນສະອາດ…
- ເສື້ອຜ້າ : ມະນຸດຄືສັດປະເສີດ ທີ່ມີຫົວຄິດປະດິດສ້າງ ບໍ່ໄດ້ປະເປືອຍຄືສັດເດຍລະສານ ມີສິ່ງຂອງປົກປິດຮ່າງກາຍ ເພື່ອປ້ອງກັນໄພຕ່າງໆ ເຊັ່ນ ຄວາມຮ້ອນຄວາມໜາວ, ພະຍາດບາດເຍົາ…. ດັ່ງນັ້ນ ເສື້ອຜ້າອາພອນເປັນປັດໄຈໜຶ່ງທີ່ເຮັດໃຫ້ມະນຸດພິເສດກວ່າສັດສາຍພັນຊະນິດອື່ນ ຄວນໃສ່ເສື້ອຜ້າໃຫ້ຮູ້ຈັກກາລະເວລາ ແລະສະຖານທີ່.
- ປະຢັດ : ຄົນທີ່ຈະລ້ຳລວຍໄດ້ ຂໍ້ທີ່ສຳຄັນກໍແມ່ນມາຈາກການປະຢັດອົດອອມ ຄົນທີ່ມັກໃຊ້ຈ່າຍ ຟຸມເຟືອຍເກີນຖານະຕົນເອງ ທຸກຈົນຢ່າງສົມບູນແບບທັງນັ້ນ.
- ສ້າງສັນສິ່ງທີ່ມັກ : ທຸກໆຄົນແມ່ນມີສິ່ງໃດສິ່ງໜຶ່ງທີ່ຕົນເອງມັກ (ບໍ່ຜິດກົດໝາຍບ້ານເມືອງ) ດັ່ງນັ້ນ ກໍຄວນສ້າງສັນໃນສິ່ງທີ່ເຮົາມັກຢູ່ເລື້ອຍໆ ເພື່ອໃຫ້ຕົນເອງມີຄວາມສຸກ ຄວບຄູ່ໄປກັບອາຊີບວຽກງານທີ່ຕົນເອງເຮັດ (ອາດຈະບໍ່ໄດ້ມັກ).
- ນ້ຳດື່ມ : ຄົນໃດທີ່ມີຜິວພັນ ແລະໜ້າຕາແຈ່ມໃສ ເບື້ອງຫລັງທີ່ເປັນແນວນີ້ ກໍຍ້ອນເປັນຄົນມັກດື່ມນ້ຳຫລາຍ ມີຫລາຍສຳນັກຂ່າວເຄີຍບອກໄວ້ວ່າ ຄົນເຮົາດື່ມນ້ຳມື້ໜຶ່ງ ບໍ່ຄວນຫລຸດ 8 ຈອກ ເພາະຈະເຮັດໃຫ້ຮ່າງກາຍຫລ່າເຫລືອງ ແລະມີອັນຕະລາຍໄດ້.
- ຟັງທັມມະ : ໃນຍຸກໂລກາພິວັດນີ້ ໂລກຈັ່ງແມ່ນສັບສົນວຸ່ນວາຍ ຜູ້ຄົນມີແຕ່ຕັ້ງໜ້າຕັ້ງຕາຫາເງິນໆ ເພື່ອວ່າຊີວິດຈະໄດ້ດີຂຶ້ນ ແຕ່ກົງກັນຂ້າມຊ້ຳພັດເຮັດໃຫ້ຈິດໃຈໝົ່ນໝອງ ບໍ່ມີຄວາມສຸກ ດັ່ງນັ້ນ ກໍຄວນຊອກຫາອາຫານໃຈມາບຳລຸງເລື້ອຍໆ ນັ້ນກໍຄືທັມມະ ມີຢູ່ເຕັມຕາມອິນເຕີເນັດ : ເຟດບຸກ, ຢູທູບ….. ຫລືອາດຈະເຂົ້າໄປຫາຕາມວັດວາ ຫລືຄົ້ນຄວ້າຕາມຄຳພີດີກາຂອງສາສະໜາຕ່າງໆກໍໄດ້.
- ອະໄພ : ການໃຫ້ອະໄພຄືທີ່ມາຂອງຄວາມສຸກ ດັ່ງນັ້ນ ເມື່ອມີຄວາມໂກດແຄ້ນເກີດຂຶ້ນພາຍໃນຈິດໃຈ ກໍຄວນປ່ອຍປະລະວາງ ເພາະສິ່ງນີ້ມັນເປັນມະເຮັງທີ່ທຳລາຍຄວາມສຸກໂດຍສະເພາະ.
- ນອນຫລັບ : ຄວນສ້າງນິດໄສນອນຫລັບໃຫ້ກັບຕົນເອງ ການນອນຫລັບໃຫ້ພຽງພໍຄືຜົນພອຍຂອງການມີສຸຂະພາບທີ່ດີ.
- ຫລີກເວັ້ນອະບາຍຍະມຸກ : ການດື່ມນ້ຳເມົາ, ທ່ຽວກາງຄືນ, ພົວພັນກັບສິ່ງເສບຕິດ, ຂີ້ລັກມັກຈົກ… ສິ່ງເຫລົ່ານີ້ຄືຫົນທາງແຫ່ງຄວາມຈິບຫາຍ ຄວນຫລີກເວັ້ນໃຫ້ໄກທີ່ສຸດ.
- ອຸດົມຄະຕິ : ຄົນທີ່ປະສົບຜົນສຳເລັດພາຍໃນໂລກນີ້ ຕ່າງກໍມີອຸດົມຄະຕິກັນທັງນັ້ນ ເວົ້າງ່າຍໆກໍແມ່ນເປົ້າໝາຍຂອງຊີວິດນັ້ນເອງ ທີ່ຢາກກາຍເປັນແບບນັ້ນແບບນີ້ໃນອະນາຄົດ “ຊີວິດຈະດີໄດ້ ຕ້ອງມີເປົ້າໝາຍ”.
ຂໍ້ມູນອ້າງອີງຈາກ : ປຶ້ມພິກຊີວິດສູ່ຄວາມສຳເລັດ