ທ່ານ ແກ້ວລະຄອນ ວໍລະສານ ຮັກສາການຫົວໜ້າຫ້ອງການພັດທະນາຊົນນະບົດ ແລະ ລົບລ້າງຄວາມທຸກຍາກແຂວງຄຳມ່ວນໄດ້ກ່າວຕໍ່ກອງປະຊຸມເປີດກວ້າງຄົບຄະນະບໍລິຫານງານພັກແຂວງຄັ້ງທີ 3 ສະໄໝທີ IX ກ່ຽວກັບວຽກງານພັດທະນາຊົນນະບົດຕິດພັນກັບຂົງເຂດວັດທະນະທຳສັງຄົມຢູ່ແຂວງຄຳມ່ວນໃນໄລຍະ 5 ປີຜ່ານມານັບແຕ່ປີ 2011-2015 ໂດຍຖືສຳຄັນການປັບປຸງຄຸນນະພາບ ແລະຂະຫຍາຍຕາໜ່າງການສຶກສາໄປສູ່ຊົນນະບົດເຂດຫ່າງໄກສອກຫຼີກຢ່າງທົ່ວເຖິງ 582 ບ້ານ, ຈຳນວນນັກຮຽນເພີ່ມຂຶ້ນ, ອັດຕາເຂົ້າຮຽນສຸດທິເດັກ 3-5 ປີບັນລຸ 35,4% ທຽບໃສ່ຄາດໝາຍເພີ່ມຂຶ້ນ 15,3%, ເດັກ 6-10 ປີບັນລຸ 98,8% ເພີ່ມຂຶ້ນ 2,6%, ມັດທະຍົມຕອນຕົ້ນບັນລຸ 67% ລື່ນຄາດໝາຍ 14%, ມັດທະຍົມຕອນປາຍບັນລຸ 36,9% ເພີ່ມຂຶ້ນ 7,6%, ປະຊາຊົນໃນເກນອາຍຸ 15-40 ປີໄດ້ຮູ້ອ່ານໜັງສືກວມ 99,01% ທຽບໃສ່ຄາດໝາຍທີ່ວາງໄວ້ຫຼຸດລົງ 0,4%, ສາມາດປະກາດເປັນແຂວງຈົບຊັ້ນ ປະຖົມບຳລຸງ ແລະ 5 ເມືອງຈົບຊັ້ນມັດທະຍົມບຳລຸງ.
ພ້ອມດຽວກັນນັ້ນ ປະຊາຊົນຍັງໄດ້ນຳໃຊ້ນ້ຳສະອາດກວມ 85,61%, ເພີ່ມຂຶ້ນ 5,86%, ຄອບຄົວໃຊ້ວິດຖ່າຍ 56,33% ເພີ່ມຂຶ້ນ 6,66%, ໂຮງຮຽນໃຊ້ວິດຖ່າຍ 66,72% ເພີ່ມຂຶ້ນ 18,87%, ສ້າງບ້ານແບບຢ່າງສາທາລະນະ ສຸກໄດ້ 432 ບ້ານເທົ່າກັບ 74,22% ແລະເພີ່ມຂຶ້ນຢ່າງຕໍ່ເນື່ອງ, ລະບົບ ໂທລະຄົມມະນາຄົມໄດ້ຂະຫຍາຍ ໄປສູ່ຊົນນະບົດການບໍລິການໂທ ລະສັບທົ່ວເຖິງທຸກໆເມືອງມີ 460 ບ້ານ ປະຈຸບັນ ມີຜູ້ນຳໃຊ້ໂທລະສັບທັງໝົດ 265.480 ເລກໝາຍຄິດສະເລ່ຍ 69 ເລກໝາຍຕໍ່ປະຊາກອນ 100 ຄົນ, ແຕ່ລະບ້ານໄດ້ມີໂທລະໂຄ່ງປະຈຳບ້ານກວມ 70%, ແຕ່ ລະເມືອງໄດ້ຂະຫຍາຍ ແລະບູລະ ນະສະຖານທີ່ທ່ອງທ່ຽວ ເພື່ອບໍລິການແຫຼ່ງທ່ອງທ່ຽວທາງທຳມະຊາດ, ປະຫວັດສາດ, ວັດທະນະທຳ ແລະປູສະນິຍະສະຖານຕ່າງໆ ເຊິ່ງສ້າງລາຍຮັບໃຫ້ແກ່ລັດ ແລະ ປະຊາຊົນໃນແຕ່ລະປີເພີ່ມຂຶ້ນ.
ນອກນັ້ນຍັງໄດ້ປະຕິບັດນະໂຍບາຍຕ່າງໆຕໍ່ພະນັກງານລັດຖະກອນ, ຜູ້ມີຜົນງານຄຸນງາມຄວາມດີຕໍ່ການປະຕິບັດຈຳນວນ 599 ຄົນ, ຍິງ 181 ຄົນ, ຄິດເປັນມູນຄ່າວັດຖຸ ແລະເງິນທັງໝົດ 11,9 ຕື້ ກີບ, ໄດ້ຊ່ວຍເຫຼືອຜູ້ດ້ອຍໂອກາດ, ຜູ້ປະສົບໄພພິບັດເປັນມູນຄ່າ 4,44 ຕື້ກີບ, ປະຕິບັດໂຄງການຕ້ານໄພນ້ຳຖ້ວມບັນດາບ້ານທີ່ມີຄວາມສ່ຽງຢູ່ບັນດາເມືອງຄື: ເມືອງທ່າແຂກ, ເມືອງໜອງບົກ, ເມືອງເຊບັ້ງໄຟ, ເມືອງມະຫາໄຊ ແລະ ເມືອງຫີນບູນ, ພັດທະນາສີມືແຮງງານຝຶກອົບຮົມວິຊາຊີບ ເພື່ອສະໜອງແຮງງານພາຍໃນໃຫ້ໂຄງການຕ່າງໆໄດ້ 346 ຄົນ, ການຄຸ້ມຄອງແຮງງານພາຍໃນ ແລະຕ່າງ ປະເທດກໍ່ໄດ້ຮັບການເອົາໃຈໃສ່ຢ່າງຕັ້ງໜ້າ.