ຫ້ອງວ່າການລັດຖະບານໄດ້ອອກແຈ້ງການ ສະບັບເລກທີ 791/ທລບ ເມື່ອວັນທີ 17 ມິຖຸນາ 2014 ເຖິງ ກະຊວງປ້ອງກັນຄວາມສະຫງົບ ເລື່ອງ: ທິດຊີ້ນຳກ່ຽວກັບ ການແກ້ໄຂ ສະພາບຄົນຕ່າງດ້າວ ລັກເດັກນ້ອຍຢູ່ໃນ ສປປລາວ.
ເນື້ອໃຈແຈ້ງການກ່າວວ່າ: ຫ້ອງວ່າການລັດຖະບານຂໍນັບຖືເປັນກຽດຮຽນແຈ້ງຄຳເຫັນຊີ້ນຳຂອງທ່ານ ນາຍົກລັດຖະມົນຕີ ມາຍັງທ່ານຊາບດັ່ງນີ້: “ໃຫ້ກະຊວງປ້ອງກັນຄວາມສະຫງົບຮີບຮ້ອນປຶກສາຫາລື ເພື່ອຫາວິທີການແກ້ໄຂບັນຫາດັ່ງກ່າວເລັ່ງດ່ວນ ເພາະເປັນອາຊະຍາກຳທີ່ຮ້າຍແຮງ. ພ້ອມດຽວກັນນັ້ນ, ກໍໃຫ້ແຈ້ງເຕືອນປະຊາຊົນ ໃຫ້ມີສະຕິລະວັງຕົວ ແລະຮັກສາລູກຫຼານຂອງຕົນໃຫ້ດີ”.
ພາຍຫຼັງໃບແຈ້ງການດັ່ງກ່າວຖືກເຜີຍແຜ່ ທີມງານ Laopost.com ໄດ້ສອບຖາມໄປຍັງກົມປະຊາສຳພັນ ຂອງຫ້ອງວ່າການລັດຖະບານ ແລະໄດ້ຮັບການຢືນຢັນວ່າແຈ້ງການນີ້ແມ່ນຂອງແທ້ ເປັນການແຈ້ງການຊີ້ນຳຂອງທ່ານນາຍົກ.