ງານວາງສະແດງສິນຄ້າລາວ-ຫວຽດນາມປະຈຳປີ 2016 ໄດ້ເປີດຂຶ້ນຢ່າງເປັນທາງການ ເມື່ອວັນທີ 7 ກໍລະກົດຜ່ານມາທີ່ສູນການຄ້າລາວ-ໄອເຕັກນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າ ສປປ ລາວ, ທ່ານ ຫງຽນເກີມ ຕູ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ສສ ຫວຽດນາມ, ພ້ອມດຽວກັນນີ້ ກໍມີບັນດາຫົວໜ່ວຍທຸລະກິດຈາກພາກລັດ ແລະ ເອກະຊົນທັງສອງປະເທດລາວ-ຫວຽດນາມເຂົ້າຮ່ວມ.
ທ່ານ ສົມຈິດ ອິນທະມິດ ໄດ້ກ່າວ: ຈຸດປະສົ່ງຂອງການຈັດງານວາງສະແດງສີນຄ້າໃນຄັ້ງນີ້ ກໍເພື່ອເປັນການສົ່ງເສີມການຮ່ວມມືທາງດ້ານການຄ້າ ແລະການລົງທຶນຂອງສອງປະເທດ ເປັນເວທີໜຶ່ງທີ່ສ້າງໂອກາດໃຫ້ພາກທຸລະກິດຂອງສອງປະເທດໄດ້ແລກປ່ຽນຂໍ້ມູນຂ່າວສານ ເພື່ອຍົກລະດັບຄຸນນະພາບສິນຄ້າຂອງພາກທຸລະກິດທັງສອງປະເທດ ແລະສ້າງເງື່ອນໄຂໃຫ້ນັກທຸລະກິດຊອກຫາຄູ່ຄ້າຮ່ວມກັນ ເພື່ອສ້າງຖານການຄ້າໃຫ້ນັບມືກວ້າງຂວາງຂຶ້ນ.
ສຳລັບຫົວໜ່ວຍທຸລະກິດທີ່ເຂົ້າຮ່ວມງານວາງສະແດງສິນຄ້າໃນຄັ້ງນີ້ແມ່ນມີທັງໝົດ 400 ຫ້ອງ ໃນນັ້ນ ທຸລະກິດລາວມີຈຳນວນ 280 ຫ້ອງ ແລະທຸລະກິດຫວຽດນາມມີຈຳນວນ 120 ຫ້ອງ, ພ້ອມດ້ວຍບໍລິສັດ ສປປ ລາວ ແລະຫວຽດນາມ ຫຼາຍກວ່າ 200 ບໍລິສັດ, ສ່ວນສິນຄ້າທີ່ທັງສອງປະເທດນຳມາວາງສະແດງແມ່ນ ເຄື່ອງໄຟຟ້າ, ເຄື່ອງຢາງ, ເຄື່ອງມືກະສິກຳ, ອາຫານທະເລ, ເຟີນີເຈີ, ເຄື່ອງຫັດຖະກຳ, ກະສິກຳປຸງແຕ່ງ,ສີນຄ້າໂອດັອບ ແລະສິນຄ້າອື່ນໆໂດຍງານວາງສະແດງສິນຄ້າໃນຄັ້ງນີ້ແມ່ນເລີ່ມ ແຕ່ວັນທີ 7-11 ກໍລະກົດ 2016.
ແນວໃດກໍດີ ໃນໄລຍະຜ່ານມາການຮ່ວມດ້ານເສດຖະກິດ-ການຄ້າລະຫວ່າງລາວ ແລະຫວຽດນາມ ໄດ້ມີການຂະຫຍາຍຕົວຢ່າງຕໍ່ເນື່ອງ ໂດຍນັບແຕ່ປີ 2011-2015 ມູນຄ່າການຄ້າຂອງສອງປະເທດ ໄດ້ບັນລຸມູນຄ່າເກືອບ 40 ພັນຕື້ກວ່າກີບ ຫຼື ປະມານ 4,84 ຕື້ໂດລາ ຂະນະທີ່ໃນອີກ 5 ປີຕໍ່ໜ້ານັບແຕ່ປີ 2016-2020 ລັດຖະບານສອງປະເທດໄດ້ວາງເປົ້າໝາຍຈະສູ້ຊົນໃຫ້ມູນຄ່າການນຳເຂົ້າ ແລະສົ່ງອອກສິນຄ້າລະຫວ່າງກັນໃຫ້ທະລຸ 5 ຕື້ໂດລາສະຫະລັດ.
ທີ່ມາ: ເສດຖະກິດ-ສັງຄົມ