ທ່ານ ໂດນັລດ໌ ທຣັມປ໌ ກ່າວຊື່ນຊົມ ທ່ານ ຊັດດຳ ຮຸສເຊນ ອະດີດຜູ້ນຳອີຣັກ ທີ່ຖືກກອງທັບສະຫະລັດສັງຫານ ເຖິງເລື່ອງການປາບປາມຜູ້ກໍ່ການຮ້າຍ
ທ່ານ ໂດນັລດ໌ ທຣັມປ໌ ຜູ້ສະໝັກຊິງຕຳແໜ່ງປະທານາທິບໍດີ ສະຫະລັດອາເມລິກາ ຈາກພັກຣີພັບລິກັນ ສ້າງຄວາມຮືຮາໃຫ້ກັບໂຕເອງອີກເທື່ອໃໝ່ ຈາກການຫາສຽງຄັ້ງຫຼ້າສຸດທີ່ລັດນອດແຄໂຣໄລນາ ໂດຍກ່າວຊື່ນຊົມຜົນງານສັງຫານຜູ້ກໍ່ການຮ້າຍຂອງ ທ່ານ ຊັດດຳ ຮຸສເຊນ ອະດີດຜູ້ນຳອີຣັກ ທີ່ຖືກກອງທັບສະຫະລັດສັງຫານ ແລະບອກວ່າປັດຈຸບັນອີຣັກກາຍເປັນສະຖາບັນເຝິກກໍ່ການຮ້າຍໂດຍປຽບທຽບໃສ່ກັບມະຫາວິທະຍາໄລ ຮາວາດຂອງສະຫະລັດ.
“ຊັດດຳ ຮຸສເຊນ ເປັນຄົນຊົ່ວແມ່ນບໍ? ແມ່ນຢູ່ວ່າຫຼາຍຄົນຄິດວ່າເຂົາເປັນຄົນຊົ່ວ ແຕ່ບັນດາທ່ານຮູ້ບໍວ່າ ຊັດດຳ ເຄີຍເຮັດຫຍັງໄວ້ແດ່ ເຂົາສັງຫານຜູ້ກໍ່ການຮ້າຍໄປຈຳນວນຫຼວງຫຼາຍ ແລະເຮັດໄດ້ດີອີກພ້ອມ ພວກກອງທັບສະຫະລັດບໍ່ອ່ານສິດໃຫ້ເຂົາຟັງ ບໍ່ແມ່ນແຕ່ການເຈລະຈາ”
“ຊູ່ມື້ນີ້ ອີຣັກ ກາຍເປັນມະຫາວິທະຍາໄລຮາວາດ ສຳລັບການກໍ່ການຮ້າຍໄປແລ້ວ ຖ້າທ່ານຢາກໄປເປັນຜູ້ກໍ່ການຮ້າຍ ກໍໄປເຝິກທີ່ອີຣັກໄດ້ເລີຍ”
“ສົງຄາມເປັນຄວາມຜິດພາດ ດັ່ງທີ່ຂ້າພະເຈົ້າໄດ້ກ່າວແຕ່ຂັ້ນເລີ້ມຕົ້ນ. ທ່ານ Bush ແລະ ທ່ານ Obama ຄວນທີ່ຈະຂໍຂະມາໂທດ”
ນອກຈາກນີ້, ທ່ານ ທຣັມປ໌ ຍັງໄດ້ກ່າວກັບກຸ່ມຜູ້ສະໜັບສະໜຸນວ່າ ສະຫະລັດບໍ່ຄວນເຂົ້າໄປທຳລາຍຄວາມໝັ້ນຄົງໃນອີຣັກ ເຊິ່ງປັດຈຸບັນໄດ້ກາຍເປັນແຫຼ່ງຊ່ອນໂຕຂອງກຸ່ມກໍ່ການຮ້າຍ ໄອເອັດ ໄປແລ້ວ ຫຼັງຈາກທີ່ສະຫະລັດເອົາກຳລັງເຂົ້າບຸກໂຈມຕີອີຣັກ.
ນັບແຕ່ເດືອນຕຸລາປີກາຍເປັນຕົ້ນມາ ທ່ານ ທຣັມປ໌ ໄດ້ກ່າວຫຼາຍເທື່ອວ່າ ຕາເວັນອອກກາງຈະມີສະຖຽນລະພາບກວ່າທຸກມື້ນີ້ ຖ້າຫາກຜູ້ນຳທີ່ຖືືກສັງຫານ ທັງ ທ່ານ ຊັດດຳ ຮຸສເຊນ ຜູ້ນຳອີຣັກ ແລະ ມູອຳມາ ກັດດາຟີ ຜູ້ນຳລິເບຍ ຍັງຄົງຢູ່ໃນອຳນາດ ແລະວ່າຂະນະນີ້ການລະເມີດສິດທິມະນຸດຊົນທັງສອງປະເທດຍິ່ງໜັກໜ່ວງຂຶ້ນຕື່ມ.