ບັນຍາກາດການບໍລິຫານປະເທດ ຂອງທ່ານນາຍົກ ທອງລຸນ ສີສຸລິດ ນັບມື້ມີບັນຍາກາດອັນຟົດຟື້ນ ຖ້າມີໜ່່ວຍງານວິໄຈສຳຫຼວດຄວາມສຸກຂອງປະຊົນ ຄົງຈະເຫັນໄດ້ຢ່າງຈະແຈ້ງວ່າ ຄວາມສຸກຂອງປະຊາຊົນເລິ່ມຫຼາຍຂຶ້ນ ເມື່ອທ່ານ ປອ. ທອງລຸນ ສີສຸລິດ ໄດ້ເຂົ້າຮັບຕຳແໜ່ງ ນາຍົກລັດຖະມົນຕີລາວ ໃນເດືອນ ເມສາ 2016 ເປັນຕົ້ນມາ.
ການອອກດຳລັດເລກທີ 15 ວ່າດ້ວຍການຫ້າມສົ່ງໄມ້ທ່ອນອອກຕ່າງປະເທດ, ແຜນການຫັນການຈ່າຍອາກອນດ້ວຍເງິນສົດ ມາຈ່າຍຜ່ານທະນາຄານ, ການເດິນທາງລົງທ້ອງຖິ່ນ ແລະການເຄື່ອນໄຫວຢ້ຽມຢາມປະເທດເພື່ອນມິດ ລ້ວນແຕ່ສົ່ງຜົນຕໍ່ຄວາມຮູ້ສຶກຂອງປະຊາຊົນ ເຮັດໃຫ້ປະຊາຊົນຮູ້ສຶກດີ ແລະມີຄວາມເຊື່ອໝັ້ນຕໍ່ການນຳພາຂອງລັດຖະບານຊຸດປັດຈຸບັນເປັນຢ່າງຍິ່ງ.
ຫຼ້າສຸດ ທ່ານ ນາຍົກ ໄດ້ເພິ່ມຄວາມສຸກແກ່ປະຊາຊົນ ດ້ວຍການຕົກລົງປັບປຸງເບ້ຍລ້ຽງ ນັກຮຽນ-ນັກສຶກສາ ຂອງຂະແໜງການສຶກສາແລະກິລາ ຂຶ້ນເປັນ 3 ເທົ່າຂອງເບ້ຍລ້ຽງທີ່ໄດ້ຮັບໃນໄລຍະທີ່ຜ່ານມາ ໂດຍອີງຕາມສະພາບເສດຖະກິດ-ສັງຄົມຂອງປະເທດເຮົາ ເຊິ່ງຂໍ້ຕົກລົງດັ່ງກ່າວໄດ້ຖືກອະນຸມັດ ວັນທີ 24 ມິຖຸນາ 2016 ທີ່ຜ່ານມາ.
ໃນນັ້ນ:
– ນັກຮຽນຊັ້ນຕົ້ນ ຈາກ 60,000 ກີບ/ເດືອນ ຂຶ້ນມາເປັນ 200,000 ກີບ/ເດືອນ
– ນັກຮຽນຊັ້ນກາງ ຈາກ 60,000 ກີບ/ເດືອນ ຂຶ້ນມາເປັນ 200,000 ກີບ/ເດືອນ
– ນັກຮຽນຊັ້ນສູງ ຈາກ 70,000 ກີບ/ເດືອນ ຂຶ້ນມາເປັນ 200,000 ກີບ/ເດືອນ
– ນັກສຶກສາປະລິນຍາຕີ ຈາກ 70,000 ກີບ/ເດືອນ ຂຶ້ນມາເປັນ 200,000 ກີບ/ເດືອນ
ຈາກການປັບອັດຕາເບ້ຍລ້ຽງຂຶ້ນຄືດັ່ງກ່າວ ເຊິ່ງຖ້າທຽບໃສ່ສະພາບເສດຖະກິດ-ສັງຄົມແລ້ວ ອາດຈະຍັງບໍ່ພຽງພໍ ແຕ່ກໍສາມາດແບ່ງເບົາພາລະຂອງນັກຮຽນ-ນັກສຶກສາ ທີ່ມາຈາກທ້ອງຖິ່ນຫ່າງໄກສອກຫຼີກໄດ້ຫຼາຍສົມຄວນ ໂດຍສະເພາະແມ່ນຜູ້ທີ່ມາຈາກຄອບຄົວທີ່ມີຖານະທາງດ້ານການເງິນບໍ່ຄ່ອຍດີ.
