ເພື່ອເປັນການພັດທະນາເມືອງລະມາມໃຫ້ເປັນເມືອງທີ່ມີຄວາມໜັກແໜ້ນທາງດ້ານການເມືອງ, ສັງຄົມມີຄວາມສະຫງົບໜ້າຢູ່, ປະຊາຊົນມີຄວາມສາມັກຄີປອງດອງ ແລະມີຊີວິດການເປັນຢູ່ທີ່ດີຂຶ້ນເທື່ອລະກ້າວ ສະນັ້ນ ການນຳເມືອງລະມາມ ຈິ່ງໄດ້ວາງຄາດໝາຍສູ້ຊົນໃນ ແຜນພັດທະນາ ເສດຖະກິດ-ສັງຄົມ 5 ປີຕໍ່ໜ້າແຕ່ລະຂົງເຂດ ໂດຍຄາດຈະດຶງດູດການລົງທຶນໃຫ້ໄດ້ 200 ກວ່າ ໂຄງການ.
ຕາມການຕອບສຳພາດຂອງ ທ່ານ ແພງສີ ສີລາວີ ເຈົ້າເມືອງໆລະມາມໃນວັນທີ 6 ກໍລະກົດ 2016 ວ່າ: ເພື່ອສ້າງເມືອງໃຫ້ເປັນເມືອງທີ່ເຂັ້ມແຂງຮອບດ້ານຕາມມະຕິ 3 ຂອງກົມການເມືອງສູນກາງພັກ, ທັງມີຄວາມສະຫງົບໜ້າຢູ່, ສະອາດສີຂຽວ, ປະຊາຊົນມີຄວາມສາມັກຄີປອງດອງ,ສ້າງໂຄງປະກອບເສດຖະກິດຕາມທິດ ຫັນເປັນອຸດສາຫະກຳ ແລະທັນສະໄໝ, ສົ່ງເສີມການຂະຫຍາຍວິສາຫະກິດຂະໜາດນ້ອຍ-ກາງໃຫ້ຫຼາຍຂຶ້ນ, ຍູ້ແຮງເສດຖະກິດຮ່ວມມືຂອງປະຊາຊົນໃຫ້ມີການຂະຫຍາຍຕົວ, ສ້າງໃຫ້ໄດ້ສິນຄ້າຕົວແບບ ແລະສິນຄ້າ ປາຍແຫຼມຢູ່ທ້ອງຖິ່ນທີ່ເປັນເອກະລັກ.
ພ້ອມດຽວກັນນີ້ ກໍເພື່ອເຮັດໃຫ້ຄາດໝາຍສູ້ຊົນແຕ່ປີ 2014-2019 ໃຫ້ລວມຍອດຜະລິດຕະພັນພາຍໃນເພີ່ມຂຶ້ນ 16% ຕໍ່ປີ ແລະຮອດປີ 2019 ສະເລ່ຍ GDP ຕໍ່ຫົວຄົນໃຫ້ ໄດ້ 19,86 ລ້ານກີບ ຫຼື ປະມານ 2.483 ໂດລາສະຫະລັດຕໍ່ຄົນຕໍ່ປີ, ໃນນີ້ຂະແໜງກະສິກຳເພີ່ມຂຶ້ນ 11,15 ກວມເອົາ 32,40%; ອຸດສາຫະກຳ-ຫັດຖະກຳເພີ່ມຂຶ້ນ 16,05% ກວມເອົາ14,57% ແລະ ການບໍລິການເພີ່ມ ຂຶ້ນ 21,10 ກວມເອົາ 53,03%, ນອກນັ້ນຂະແໜງການເງິນຕ້ອງໄດ້ສືບຕໍ່ສູ້ຊົນເກັບລາຍຮັບເຂົ້າງົບປະມານໃຫ້ລື່ນແຜນການຕາມການເພີ່ມຂຶ້ນສະເລ່ຍ 18-19% ຕໍ່ປີ, ຄາດຮອດ ປີ 2019 ລາຍຮັບໃຫ້ບັນລຸ 23,20 ຕື້ກີບ ແລະລາຍຈ່າຍບໍ່ກາຍ 341,97 ຕື້ກີບ.
ສຳລັບແຜນການລົງທຶນໃນ 5 ປີຕໍ່ໜ້າທ່ານເຈົ້າເມືອງໆລະມາມ ໃຫ້ຮູ້ວ່າ: ຈະສູ້ຊົນປະຕິບັດ ໂຄງການລົງທຶນໃຫ້ໄດ້ 212 ໂຄງການມີມູນຄ່າ 2.270 ຕື້ກີບ, ໃນນັ້ນ ການລົງທຶນຂອງລັດ ກວມເອົາ 10%; ການລົງທຶນເອກະຊົນ 70% ແລະທຶນສິນເຊື່ອທະນາຄານ 20% ໂດຍການລົງ ທຶນຂອງລັດແມ່ນເນັ້ນສຸມໃສ່ການພັດທະນາພື້ນຖານໂຄງລ່າງ, ຈັດຕັ້ງໂຄງການບູລິມະສິດຂອງ ລັດຖະບານ, ພັດທະນາຊົນນະບົດ, ແກ້ໄຂຄວາມທຸກຍາກ, ສົ່ງເສີມການສ້າງວຽກເຮັດງານທຳ ແລະຮັກສາວັດທະນະທຳຮີດຄອງປະເພນີອັນດີງາມຂອງເຜົ່າ ແລະຂອງຊາດ.
ຂະນະທີ່ວຽກງານໂຍທາທິການ ແລະຂົນສົ່ງຈະປຸກລະດົມປະຊາຊົນເຂົ້າຮ່ວມໃນການກໍ່ ສ້າງ-ປັບປຸງ ແລະປົກປັກຮັກສາເສັ້ນ ທາງໃຫ້ມີຄວາມສະອາດໃຊ້ໄດ້ ຍາວນານ, ສືບຕໍ່ກໍ່ສ້າງ ເສັ້ນທາງ ແບບມີສ່ວນຮ່ວມລະຫວ່າງລັດກັບປະຊາຊົນ, ເສັ້ນທາງຫຼວງແຫ່ງຊາດແຂວງ-ເມືອງ ໃຫ້ໄດ້ 25 ເສັ້ນ, ມູນຄ່າ 23 ຕື້ກີບ, ພ້ອມທັງສືບຕໍ່ຄຸ້ມຄອງສິ່ງປຸກສ້າງ, ການສ້ອມແປງຕໍ່ເຕີມ, ການຕິດຕັ້ງປ້າຍ ໂຄສະນາ ແລະການຖົມດິນໃຫ້ຖືກ ຕ້ອງຕາມລະບຽບຜັງເມືອງຢ່າງເຂັ້ມງວດ.
ນອກນີ້ ເມືອງຍັງມີແຜນສູ້ຊົນພັດທະນາການສຶກສາໃຫ້ນັບມື້ມີຄຸນນະພາບສູງຂຶ້ນເລີ່ມຈາກຂະຫຍາຍໂຮງຮຽນອະນຸບານ ແລະຫ້ອງປໍກຽມໃຫ້ສາມາດເຂົ້າຮຽນເພີ່ມຂຶ້ນ ໂດຍອັດຕາການເຂົ້າຮຽນສຸດທິຂອງນັກຮຽນຊັ້ນປະຖົມໃຫ້ໄດ້ 99%, ອັດຕາລອດເຫຼືອໃນຊັ້ນປະຖົມ 95% ຫຼຸດ ຜ່ອນອັດຕາປະລະ, ຄ້າງຫ້ອງຊັ້ນປະຖົມໃຫ້ເຫຼືອ 1%, ອັດຕາເຂົ້າຮຽນຊັ້ນມັດທະຍົມຕອນຕົ້ນ 100% ແລະອັດຕາເຂົ້າຮຽນຊັ້ນມັດທະຍົມຕອນປາຍ 75%.
ທີ່ມາ: ເສດຖະກິດ-ສັງຄົມ