ສຳນັກຂ່າວຊິນຮວາ​ຂອງ​ທາງ​ການ​ຈີນ​ລາຍ​ງານ​ວ່າ ຈີນ​ໄດ້​ນຳ​ເຮືອບິນ​ລຳ​ລຽງ​ທາງ​ທະຫານ​ທີ່​ຜະລິດ​ເອງ​ຮຸ່ນ​ຫລ້າ​ສຸດ​ອອກ​ໃຊ້​ວຽກ​ແລ້ວ​ໃນ​ມື້​ນີ້.

ຊິນ​ຮວາ​ລາຍ​ງານ​ວ່າ ​ Y-20 ເປັນ​ເຮືອບິນ​ລຳ​ລຽງ​ທາງ​ທະຫານ​ທີ່​ຈີນ​ຜະລິດ​ເອງ ​ແລະ ມີ​ຂະໜາດ​ໃຫຍ່​ທີ່​ສຸດ​ຂອງ​ປະ​ເທດ ສ້າງ​ຂຶ້ນ​ເພື່ອລຳລຽງ​ກຳລັງ​ພົນ ​ແລະ ຍຸດ​ໂທ​ປະກອນ​ໄປ​ຍັງ​ພື້ນ​ທີ່​ໄກໆ​ທີ່​ມີ​ສະພາບ​ອາ​ກາດ​ແຕກ​ຕ່າງ​ກັນ ຊິນ​ຮວາ​ອ້າງ​ໂຄສົກ​ກອງທັບ​ອາກາດ​ຂອງ​ກອງທັບ​ປົດ​ປ່ອຍປະ​ຊາ​ຊົນ​ຈີນ​ວ່າ ການ​ນຳ​ເຮືອບິນ​ນີ້​ອອກ​​ນຳ​ໃຊ້​ຖື​ເປັນ​ກ້າວ​ສຳຄັນ​ຂອງ​ກອງທັບ​ອາກາດ​ທີ່​ຈະ​ປັບປຸງ​ສັກກະ​ຍະ​ພາບ​ໃນ​ການສະ​ແດງອຳນາດ​ທາງ​ຍຸດ​ທະ​ສາດ​ເພາະ​ຈະ​ໃຊ້​ປົກ​ປ້ອງ​ຄວາມ​ປອດ​ໄພ​ໃນ​ປະ​ເທດ ​ແລະ​ປະຕິບັດ​ກາ​ນຄົ້ນ​ຫາ ​ແລະ ກູ້​ໄພ​ທັງ​ໃນ ​ແລະ ຕ່າງປະ​ເທດ ​ໂດຍ​ເຮືອບິນ​ Y-20  ສາມາດ​ບັນທຸກ​ໄດ້​ເຕັມ​ກຳລັງ 66 ​ໂຕນ ​ແລະ ​ບິນ​ໄດ້​ໄກ 4.400 ກິ​ໂລ​​ແມັດຕາມ​ການ​ລາຍ​ງານ​ຂອງ​ສື່​ຈີນ.