ພິທີປູກໄມ້ຕິ້ວຜະລິດເປັນສິນຄ້າສົ່ງອອກທາງພາຍໃນ ແລະ ຕ່າງປະເທດຂອງໂຮງງານຜະລິດຖ່ານຂາວ ຢູ່ບ້ານນາມອນ ເມືອງໄຊຍະບູລີ ແຂວງໄຊຍະບູລີ ໄດ້ຈັດຂຶ້ນໃນຕອນເຊົ້າວັນທີ 1 ກໍລະກົດຜ່ານມາທີ່ໂຮງງານດັ່ງກ່າວ ໂດຍການໃຫ້ກຽດເຂົ້າຮ່ວມຂອງ ທ່ານ ບຸນເສັງ ວົງສະນິດ ຄະນະປະຈຳພັກເມືອງ, ຮອງເຈົ້າເມືອງໄຊຍະບູລີ, ຜູ້ຊີ້ ນຳວຽກງານເສດຖະກິດ, ທ່ານ ບຸນວຽນ ສີບຸນທຽນ ຜູ້ອຳນວຍການໂຮງງານທັງເປັນເຈົ້າຂອງໂຮງງານຜະລິດຖ່ານຂາວ, ມີຫົວໜ້າ, ຮອງຫົວໜ້າພະແນກການ, ອຳນາດການປົກຄອງບ້ານອ້ອມຂ້າງ, ນ້ອງນ້ອຍເຍົາວະຊົນ-ນັກຮຽນ, ພໍ່ແມ່ປະຊາຊົນຕະຫຼອດຮອດກຳມະກອນພາຍໃນໂຮງງານດັ່ງກ່າວເຂົ້າຮ່ວມ.
ໃນພິທີ ທ່ານ ບຸນວຽນ ສີບຸນທຽນ ກ່າວວ່າ: ໂຮງງານຜະລິດຖ່ານຂາວ ແມ່ນໄດ້ຮັບການອະນຸຍາດສ້າງຕັ້ງຂຶ້ນ ໃນວັນທີ 9 ເມສາ 2014 ເປັນຕົ້ນມາ ຊຶ່ງຕະຫຼອດໄລຍະຜ່ານມາໂຮງງານດັ່ງກ່າວກໍໄດ້ປູກໄມ້ຕິ້ວໃສ່ດິນໃນໂຮງງານ 1 ເຮັກຕາ, ປູກເສີມໃສ່ເພີ່ມສຳປະທານໄດ້ຮັບອະນຸຍາດ 100 ເຮັກຕາ ໃນແຕ່ລະປີປູກໄດ້ 5 ເຮັກຕາຂຶ້ນໄປນອກຈາກນັ້ນໂຮງງານຍັງໄດ້ສ້າງບົດບັນທຶກສັນຍາການປູກໄມ້ຕິ້ວຂອງປະຊາຊົນ ໃນຈຳນວນ 9 ຄອບຄົວ, ແຜນຕໍ່ໜ້າຈະສ້າງໃຫ້ໄດ້ອີກ 5-10 ຄອບຄົວ, ປີ 2015 ໂຮງງານຜະລິດຖ່ານຂາວສາມາດສົ່ງອອກໄດ້ປະມານ 25 ໂຕນ, ລວມຍອດລາຍຮັບສະເລ່ຍໄດ້ທັງໝົດຫຼາຍກ່ວາ 150 ລ້ານກີບ, ແຜນການປີ 2016 ນີ້ ຈະຜະລິດສົ່ງອອກໃຫ້ໄດ້ 30-40 ໂຕນ. ສຳລັບປີນິ້ໂຮງງານສາມາດສ້າງແນວພັນໄມ້ຕິ້ວໄດ້ 2250 ເບ້ຍ, ໃນນີ້ຈະປູກ 1500 ເບ້ຍໃສ່ໃນ ເນື້ອທີ່ 3 ເຮັກຕາ, ສ່ວນທີ່ເຫຼືອແມ່ນຈະເອົາໄປປູກເສີມໃສ່ໃນເຂດສຳປະທານ, ແຜນການປີ 2017 ຈະສ້າງແນວພັນໃຫ້ ໄດ້ 3-5 ພັນເບ້ຍ ແລະຈະຂະຫຍາຍ ເນື້ອທີ່ປູກໃຫ້ໄດ້ 4-5 ເຮັກຕາ.
ໂອກາດດຽວກັນ ທ່ານ ບຸນເສັງ ວົງສະນິດ ຮອງເຈົ້າເມືອງໄຊຍະບູລີກໍ ໄດ້ໃຫ້ກຽດໂອ້ລົມຕໍ່ພິທີດັ່ງກ່າວ ຊຶ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ກັບຜົນງານທີ່ໂຮງງານຜະລິດຖ່ານຂາວຍາດມາໄດ້ຕະຫຼອດໄລຍະຜ່ານມາ ແລະທ່ານຍັງຮຽກຮ້ອງໃຫ້ເຈົ້າຂອງໂຮງງານຈົ່ງສືບຕໍ່ຊີ້ນຳໆພາຈັດຕັ້ງປະຕິບັດໃນການຜະລິດຖ່ານຂາວ ເພື່ອເປັນສິນ ຄ້າສົ່ງອອກທາງພາຍໃນ ແລະຕ່າງປະເທດໃຫ້ຫຼາຍຂຶ້ນກວ່າເກົ່າ ແລະຊຸກຍູ້ໃຫ້ພໍ່ແມ່ປະຊາຊົນບັນດາເຜົ່າ ຢູ່ພາຍໃນບ້ານກໍຄືຊາວເມືອງໄຊຍະບູລີ ຈົ່ງຮັບຮູ້ເຂົ້າໃຈພ້ອມກັນນຳພາໃນການປູກໄມ້ ຕິ້ວເປັນສິນຄ້າສົ່ງອອກ ເພື່ອເປັນການສ້າງເສດຖະກິດຄອບຄົວໃຫ້ມີຢູ່ມີກິນຕະຫຼອດໄປ.
ທີ່ມາ: ເສດຖະກິດ-ສັງຄົມ