ຂປລ. ເພື່ອໃຫ້ບັນດາສື່ມວນຊົນລາວ ໄດ້ເຂົ້າໃຈເລິກເຊິ່ງ ແລະ ຂຽນຂ່າວໄດ້ຢ່າງຖືກຕ້ອງຊັດເຈນ ໃນໄລຍະທີ່ ສປປ ລາວ ເປັນປະທານອາຊຽນ ແລະ ເປັນປີທຳອິດທີ່ອາຊຽນ ກ້າວເຂົ້າສູ່ການເປັນປະຊາຄົມ, ເປັນປີທຳອິດທີ່ຈັດຕັ້ງປະຕິບັດວິໄສທັດອາຊຽນ ແລະ ແຜນແມ່ບົດຂອງ 3 ເສົາຄ້ຳ ຄວາມໝັ້ນຄົງທາງດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ. ໃນວັນທີ 5 ກໍລະກົດ 2016 ນີ້ ທີ່ຫ້ອງການໜັງສືພິມພາສາຕ່າງປະເທດ ໄດ້ຈັດການສຳມະນາຂຶ້ນ ເຊິ່ງມີ 2 ຫົວຂໍ້ຄື: ການຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ ແລະ ການພົວພັນການຄ້າກັບສາກົນ ຂອງ ສປປ ລາວໃນໄລຍະໃໝ່.
ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວໃນການສຳມະນາດັ່ງກ່າວວ່າ: 2 ຫົວຂໍ້ ທີ່ນຳມາສະເໜີໃນການສຳມະນາໃນຄັ້ງນີ້ ແມ່ນມີຄວາມສຳຄັນຫລາຍ ແລະ ກ່ຽວຂ້ອງກັບສະພາວະຄວາມເປັນຈິງໃນປັດຈຸບັນ ເນື່ອງຈາກວ່າປີນີ້ ສປປ ລາວ ໄດ້ຮັບກຽດເປັນປະທານອາຊຽນ ແລະ ຫລາຍໆກອງປະຊຸມທີ່ກ່ຽວຂ້ອງກັບອາຊຽນ ໄດ້ຈັດຂຶ້ນໃນ ສປປ ລາວ ລວມທັງກອງປະຊຸມລະດັບປະມຸກລັດຂອງປະເທດອາຊຽນ ແລະ ປະເທດຄູ່ຮ່ວມຂອງປະເທດອາຊຽນ ກໍຄື ກອງປະຊຸມສຸດຍອດອາຊຽນ ທີ່ຈະໄດ້ຈັດຂຶ້ນໃນເດືອນກັນຍາ ທີ່ຈະມາເຖິງນີ້ ຢູ່ນະຄອນຫລວງວຽງຈັນ. ສະນັ້ນ, ການສຳມະນາໃນຄັ້ງນີ້ ຈະເຮັດໃຫ້ບັນດານັກຂ່າວຂອງສື່ຕ່າງໆເຂົ້າໃຈແຈ້ງກ່ຽວກັບວຽກງານ ດັ່ງກ່າວ ແລະ ຈະໄດ້ຮຽນຮູ້ເພີ່ມຕື່ມອີກ ເພື່ອຈະໄດ້ນຳເອົາຂໍ້ມູນດັ່ງກ່າວ ໄປເຜີຍແຜ່ ແລະ ສະໜອງໃຫ້ສັງຄົມໄດ້ຢ່າງແຈ່ມແຈ້ງ ແລະ ຊັດເຈນ, ທ່ານຮອງລັດຖະມົນຕີ ຍັງໃຫ້ຮູ້ຕື່ມວ່າ ສື່ຂອງລາວ ເປັນກະບອກສຽງຂອງພັກ-ລັດ ແລະ ເປັນເວທີຂອງມະຫາຊົນ ສະນັ້ນ ນັກຂ່າວຕ້ອງຮຽນຮູ້ຮອບດ້ານ, ຢຶດໝັ້ນຈັນຍາບັນຂອງຕົນ, ໝາຍຄວາມວ່າ ຂ່າວທີ່ຈະກະຈາຍອອກໄປນັ້ນ ຕ້ອງເລິກແລບແນບນຽນ, ແຫລມຄົມ, ມີຂໍ້ມູນ ຈາກຫລາຍແຫ ລ່ງທີ່ຖືກຕ້ອງ, ຊັດເຈນ, ເປັນທຳ ແລະ ທັນກັບເຫດການ, ພ້ອມນັ້ນ ຂ່າວຕ້ອງມີລັກສະນະຕົວຈິງ, ລັກສະນະຕໍ່ສູ້, ສຶກສາອົບຮົມ ແລະ ຊີ້ນຳ-ນຳພາຢ່າງຖືກຕ້ອງ.
ການສຳມະນາໃນຄັ້ງນີ້ ເປັນກຽດເຂົ້າຮ່ວມ ມີ ທ່ານ ພົງສະຫວັນ ສີສຸລາດ ຫົວໜ້າກົມອາຊຽນ ກະຊວງການຕ່າງປະເທດສະເໜີຫົວຂໍ້ “ການ ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ແລະ ທ່ານ ໄຊຊະນະ ໄຊຍະກອນ ຫົວໜ້າກົມການຄ້າ ກະຊວງອຸດສາຫະ ກຳ ແລະ ການຄ້າ ສະເໜີຫົວຂໍ້ “ການພົວພັນການຄ້າກັບສາກົນ ຂອງ ສປປ ລາວ ໃນໄລຍະໃໝ່” ເຊິ່ງເປັນຜູ້ທີ່ມີຄວາມຮູ້ຄວາມສາມາດ ແລະ ໄດ້ເຮັດວຽກກ່ຽວກັບວຽກງານດັ່ງກ່າວ ທັງຢູ່ລາວ ແລະ ຕ່າງປະເທດ ມາເປັນເວລາຫລາຍປີ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!