ສຳນັກຂ່າວຣອຍເຕີ້ ລາຍງານໃນວັນທີ 6 ກໍລະກົດນີ້ວ່າ ໃນມື້ວານນີ້ (5 ກໍລະກົດ 2016) ເວລາ 17:30 ໂມງ ຕາມເວລາໃນທ້ອງຖິ່ນ ຊຶ່ງກົງກັບເວລາ 21:30 ໂມງ ຕາມເວລາໃນປະເທດລາວ ໄດ້ເກີດເຫດເຮລິຄອບເຕີ້ທະຫານ ຂອງກອງທັບຕວກກີລຳໜຶ່ງ ຊຶ່ງບັນທຸກຜູ້ໂດຍສານ 15 ຄົນ ປະສົບອຸບັດເຫດຕົກ ທາງພາກຕາເວັນອອກສຽງເໜືອ ຂອງປະເທດຕວກກີ ສົ່ງຜົນເຮັດໃຫ້ມີຜູ້ເສຍຊີວິດແລ້ວ ຢ່າງໜ້ອຍ 7 ຄົນ.
ແຫລ່ງຂ່າວໄດ້ລະບຸວ່າ ໃນຈຳນວນຜູ້ໂດຍສານທັງໝົດ ແມ່ນມີນາຍທະຫານລະດັບສູງ ຂອງກອງທັບຕວກກີ ຊຶ່ງລວມມີຊັ້ນພົນຈັດຕະວາ 1 ຄົນ, ພັນເອກ 1 ຄົນ ແລະ ພັນຕີອີກ 2 ຄົນ, ນອກນັ້ນແມ່ນເປັນຍາດຕິພີ່ນ້ອງ ຂອງພວກກ່ຽວ ໂດຍຍັງບໍ່ທັນມີລາຍງານຊັດເຈນວ່າ ມີໃຜແດ່ທີ່ເສຍຊີວິດຈາກອຸບັດເຫດຄັ້ງນີ້.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!