ສຳນັກຂ່າວຕ່າງປະເທດ ລາຍງານໃນວັນທີ 5 ກໍລະກົດນີ້ວ່າ ທ່ານ ຫລິງ ຈື້ຫົວ ອະດີດທີ່ປຶກສາລະດັບສູງຂອງ ທ່ານ ຫູ ຈິນເທົາ ອະດີດເລຂາທິການໃຫຍ່ ແລະ ປະທານປະເທດຈີນ ໄດ້ຖືກສານພິພາກສາລົງໂທດ ຕັດອິດສະຫລະພາບຕະຫລອດຊີວິດ ຫລັງຈາກທີ່ຖືກຕັດສິນວ່າ ມີຄວາມຜິແທ້ຈິງໃນຖານຮັບສິນບົນ, ລັກລອບເອົາຄວາມລັບຂອງຊາດ ແລະ ໃຊ້ອຳນາດໜ້າທີ່ໂດຍບໍ່ຖືກຕ້ອງ ໃນລະຫວ່າງປີ 2007-2012 ໂດຍໄອຍະການຈີນໄດ້ກ່າວຫາວ່າ ທ່ານ ຫລິງ ໄດ້ຮັບເງິນສິນບົນ ຫລາຍກວ່າ 77 ລ້ານຢວນ ທັງໂດຍທາງກົງ ແລະ ທາງອ້ອມ ຜ່ານສະມາຊິກໃນຄອບຄົວຂອງທ່ານເອງ ແລະ ຍັງໄດ້ຖືກພິສູດວ່າມີຄວາມຜິແທ້ ໃນການຮັບເອົາຂໍ້ມູນລັບຂອງປະເທດ ຈຳນວນຫລວງຫລາຍຢ່າງຜິດກົດໝາຍ ພ້ອມທັງຍັງໃຊ້ໜ້າທີ່ຕຳແໜ່ງຂອງຕົນ ໃນການຊ່ວຍເຫລືອຜູ້ອື່ນໆ ໃຫ້ໄດ້ຮັບການເລື່ອນຕຳແໜ່ງ ແລະ ເພື່ອໃຫ້ໄດ້ມາຊຶ່ງອະສັງຫາລິມະຊັບ.
ທັງນີ້ ທ່ານ ຫລິງ ຈື້ຫົວ ອາຍຸ 58 ປີ ໄດ້ຖືກເຈົ້າໜ້າທີ່ຈີນຈັບກຸມຕົວ ໃນເດືອນກໍລະກົດປີ 2015 ແລະ ເຂົ້າຮັບການພິຈາລະນາຄະດີແບບປິດລັບ ເມື່ອເດືອນມິຖຸນາຜ່ານມານີ້ ຊຶ່ງທ່ານເອງໄດ້ກ່າວວ່າ ຈະບໍ່ມີການຍື່ນອຸທອນ ແລະ ທ່ານຍອມຮັບທຸກຂໍ້ກ່າວຫາ ພ້ອມທັງຈະປະຕິບັດຕາມຄຳຕັດສິນຂອງສານທຸກປະການ.
ທ່ານ ຫລິງ ຈື້ຫົວ ເປັນໜຶ່ງໃນຈຳນວນການນຳລະດັບສູງຂອງຈີນ ທີ່ໄດ້ຖືກດຳເນີນຄະດີ ແລະ ຕັດສິນລົງໂທດ ຈາກຄວາມຜິດໃນການສໍ້ລາດບັງຫລວງ ຕາມນະໂຍບາຍປາບປາມການສໍ້ລາດບັງຫລວງ ຂອງທ່ານເລຂາທິການໃຫຍ່ ແລະ ປະທານປະເທດຈີນ ສີຈິ້ນຜິງ ຄົນປັດຈຸບັນ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!