(ພາບປະກອບ : ການຂາຍເລກຢູ່ໜ້າຕະຫລາດທ່າງ່ອນ)
ຕາມທັດສະນະຂອງທ່ານ ການຂາຍເລກດີຫລືບໍ່?
(ມີຜູ້ຄົນສົງໄສຢູ່ຫລວງຫລາຍພາຍມາກໃນສັງຄົມປັດຈຸບັນນີ້ ມີຫລາຍຄົນເຄີຍເຂົ້າວັດໄປຖາມພະຖາມສົງມາກ່ອນ ແລ້ວຕາມທັດສະນະຂອງທ່ານນັ້ນ ການຂາຍເລກມັນເປັນຈັ່ງໃດ? ດີຫລືບໍ່ດີ?)
ທຸກມື້ນີ້ ເຮົາຈະສັງເກດເຫັນວ່າ ມີຮ້ານຂາຍເລກເຕັມໄປທົ່ວທຸກບ່ອນ ໂດຍສະເພາະກໍແມ່ນຕອນໃກ້ຄ່ຳຕາມຫົນທາງສາຍສຳຄັນ ເຮົາຈະເຫັນຜູ້ມີອາຍຸນ້ອຍຈົນໄປຮອດຜູ້ມີອາຍຸຫລາຍ ພາກັນນັ່ງຂາຍເລກຢູ່ຢ່າງເອົາໃຈໃສ່ໃນວຽກຂອງຕົນ ມີຜູ້ຄົນໄປຊື້ນຳຢ່າງມາກມາຍຫລວງຫລາຍ ເພື່ອຫວັງໃນໂຊກລາບ 2-3 ໂຕ. ອັນນີ້ກະບໍ່ວ່າກັນເນາະ ຕາມສະພາບສັງຄົມເປັນຢູ່ໃນປັດຈຸບັນ ທຸກຄົນຕ້ອງດິ້ນຮົນໃນການຫາລ້ຽງຊີບ ໃຫ້ຢູ່ອີມກິນອີ່ມ (ຜູ້້ິຂ້າໄດ້ຍິນໄດ້ຟັງມາຈາກຜູ້ມີຄວາມຮູ້ວ່າ ໃນປະເທດທີ່ຈະເລີນແລ້ວ ຮ້ານເລັກຮ້ານນ້ອຍທີ່ຢູ່ຕາມຫົນທາງ ສ່ວນຫລາຍແລ້ວແມ່ນຮ້ານຂາຍເຄື່ອງເລັກໆນ້ອຍໆ ພ້ອມທັງຂາຍໜັງສືພິມຫລືຂາຍປຶ້ມພ້ອມ ອັນນີ້ຊິເປັນຄວາມຈິງຫລືເທັດແນວໃດກະບໍ່ຮູ້?) ມື້ນີ້ຜູ້ຂ້າມີບົດສຳພາດຈາກຜູ້ຂາຍເລກຄົນໜຶ່ງ ເຊິ່ງເປັນເຍົາວະຊົນຢູ່ ເພິ່ນຖືອາຊີບນີ້ໃນການຫາເງິນຫາຄຳ ເພື່ອໃຊ້ເຂົ້າໃນການຮໍ່າຮຽນ ໃນທັດສະນະຂອງນາງນັ້ນເປັນຈັ່ງໃດ? ເຊີນອ່ານໄດ້ລຸ່ມນີ້ :
ແນະນຳ : ນ້ອງຊື່ ນາງແຕງໂມ ສຸກດາລາວັນ ອາຍຸ 14 ປີ ຮຽນຢູ່ມັດທະຍົມປີທີ່ 4 ມສ ທ່າງ່ອນ
ບຸນສົ່ງ : ນ້ອງຂາຍເລກມາດົນປານໃດແລ້ວ ?
ແຕງໂມ : ນ້ອງຂາຍເລກມາໄດ້ປະມານ 2 ປີ
ບຸນສົ່ງ : ເປັນຫຍັງຈຶ່ງມາຂາຍເລກ ?
ແຕງໂມ : ຍ້ອນຢາກຂາຍແດ່ ຫາເງິນເຂົ້າໃຊ້ໃນຊີວິດປະຈຳວັນຂອງຕົນເອງ
ບຸນສົ່ງ : ວຽກອື່ນເດ ມີເຮັດບໍ່ ?
ແຕງໂມ : ບໍ່ ???
ບຸນສົ່ງ : ມີລາຍໄດ້ຫລາຍບໍ່ ?
ແຕງໂມ : ລາຍໄດ້ຈາກການຂາຍເລກແມ່ນ 2,5 %, ຂາຍອາທິດລະ 2 ເທື່ອ ວັນອັງ ຄານ ແລະວັນສຸກ.
ບຸນສົ່ງ : ການຂາຍເລກນີ້ ນ້ອງຂາຍເລກປະເພດໃດ ?
ແຕງໂມ : ຫວຍພັດທະນາ (ອອນລາຍ)
ບຸນສົ່ງ : ໃນການຂາຍເລກ ມີຜົນກະທົບແນວໃດຕໍ່ກັບການຮຽນ ?
ແຕງໂມ : ກະບໍ່ມີປານໃດ ? ເພາະວ່າເຮົາເລີກຮຽນມາ ເຮົາກະມາຂາຍໂດຍອາໄສຕອນແລງ ຕອນສວາຍເຮົາກະເລາະ !
ບຸນສົ່ງ : ຖ້າບໍ່ໄດ້ຂາຍເລກເດ ! ຊິຫາວຽກອັນອື່ນເຮັດແນວໃດ ? ຄິດວ່າຢາກເຮັດວຽກຫຍັງ ?
ແຕງໂມ : ເສີບ
ບຸນສົ່ງ : ເວລາຂາຍເລກໃຊ້ເວລາດົນບໍ່ ?
ແຕງໂມ : ເລີກຮຽນ 4 ໂມງເຄິ່ງ ສົ່ງຫົວເລກ 8 ໂມງຍັງ ເລກອອກ 8 ໂມງເຄິ່ງ ໃຊ້ປະມານ 2 ຊົ່ວໂມງ
ບຸນສົ່ງ : ຄົນທີ່ມາຊື້ມີຖານະແນວໃດ ? ເປັນຄົນແນວໃດ ?
ແຕງໂມ : ທຳມະດາ ຄົນຕາມແຖວບ້ານ ຄົນອ້ອມຂ້າງ
ບຸນສົ່ງ : ນ້ອງມີຄວາມຫວັງແນວໃດບໍ້ໃນອະນາຄົດ ?
ແຕງໂມ : ຂາຍເລກໄປເລື້ອຍໆ ຄັນຮຽນຈົບກະຢາກມີອາຊີບເປັນຂອງຕົນເອງ ຂາຍເລກໄປດົນໆຈົນກວ່າຊິໄດ້ລູກໄດ້ຜົວ
ບຸນສົ່ງ : ການຂາຍເລກ ເຮົາຊິຮູ້ແນວໃດ ? ວ່າມັນອອກ
ແຕງໂມ : ຮູ້ນຳເຂົາເຈົ້າ ! ເອົາຫົວເລກມານຳແມ່ ມັນອອກສະເພາະວັນອັງຄານ ແລະວັນສຸກ ຖ້າວ່າເປັນວັນຊາດຄືຫວ່າງກີ້ນິ ມັນຖືກວັນອັງຄານ ເພິ່ນກະເລື່ອນມາວັນພຸດແທນ.
ບຸນສົ່ງ : ຄິດແນວໃດນໍ້ກ່ຽວກັບອາຊີບນີ້
ແຕງໂມ : ກະດີ ເພາະວ່າເຮົາໄດ້ໃຊ້ເງິນໃນການຂາຍເລກນີ້ມາໝູນໃຊ້ໃນຊີວິດປະຈຳວັນ ໄປໂຮງຮຽນກະຈ່າຍຄ່ານີ້ຄ່ານັ້ນແທນ ປະຢັດເງິນພໍ່ແມ່ໄປ.