ອົງການອາຫານໂລກ ປະຈໍາ ສປປ.ລາວ ໄດ້ໃຫ້ທຶນສະໜັບສະໜູນກະຊວງສາທາລະນະສຸກ ເພື່ອຈັດຕັ້ງປະຕິບັດວຽກງານໂພຊະນາການເພື່ອແມ່ ແລະ ເດັກໃນ ສປປ.ລາວ ໂດຍສະເພາະແມ່ນເນັ້ນໃສ່ການຂາດສານອາຫານຊໍາເຮື້ອໃນເດັກອາຍຸຕໍ່າກວ່າ 2 ປີ ຂອງຍຸດທະສາດ ແລະ ຂອບແຜນງານສໍາລັບການບໍລິການແບບເຊື່ອມສານສຸຂະພາບແມ່ ແລະ ເດັກເກີດໃໝ່ ເຊິ່ງມີໄລຍະປະຕິບັດ 1 ປີ ຮວມມູນຄ່າທັງໝົດ 8 ລ້ານໂດລາສະຫະລັດ.
ພິທີເຊັນບົດບັນທຶກຄວາມເຂົ້າໃຈໃນການໃຫ້ທຶນສະໜັບສະໜູນກະຊວງສາທາລະນະສຸກ ເພື່ອຈັດຕັ້ງປະຕິບັດວຽກງານໂພຊະນາການເພື່ອແມ່ ແລະ ເດັກໃນ ສປປ.ລາວ ໄດ້ຈັດຂຶ້ນໃນຕອນບ່າຍວັນທີ 01 ມິຖຸນາ 2016 ທີ່ກະຊວງສາທາລະນະສຸກ ເຊິ່ງຕາງໜ້າລັດຖະບານ ສປປ.ລາວ ກໍຄືກະຊວງສາທາລະນະສຸກ ຮ່ວມລົງນາມໂດຍທ່ານ ຮສ.ດຣ.ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານນາງ ຊາຣາ ກໍດອນ-ກິບສັນ ຜູ້ຕາງໜ້າອົງການອາຫານໂລກ ປະຈໍາ ສປປ.ລາວ ມີຫົວໜ້າກົມ ພະນັກງານວິຊາການທີ່ກ່ຽວຂ້ອງສອງຝ່າຍເຂົ້າຮ່ວມເປັນສັກຂີພະຍານ.
ລັດຖະມົນຕີກະຊວງສາທາລະນະສຸກ ຍັງໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ການສະໜັບສະໜູນຈາກອົງການອາຫານໂລກ ຖືເປັນການປະກອບສ່ວນໃຫ້ແກ່ລັດຖະບານລາວ ເພື່ອບັນລຸເປົ້າໝາຍການພັດທະນາແບບຍືນຍົງ ໂດຍສະເພາະແມ່ນເປົ້າໝາຍທີ 2 ກໍຄືການປັບປຸງສະພາບໂພຊະນາການ ເນັ້ນໜັກໃສ່ໂພຊະນາການຂອງແມ່ ແລະ ເດັກ ເຊິ່ງເປັນບູລິມະສິດຂອງລັດຖະບານທີ່ພວມເອົາໃຈໃສ່ ແລະ ຫວັງຢ່າງຍິ່ງວ່າ ອົງການອາຫານໂລກຈະສືບຕໍ່ໃຫ້ການສະໜັບສະໜູນເພີ່ມເຕີມດ້ານວິຊາການ ແລະ ຮ່ວມມືກັບກະຊວງສາທາລະນະສຸກ ໃນການຈັດຕັ້ງປະຕິບັດແຜນງານດັ່ງກ່າວໃຫ້ມີປະສິດທິຜົນ.
ຂະນະທີ່ຜູ້ຕາງໜ້າອົງການອາຫານໂລກປະຈໍາລາວ ກໍໄດ້ສະແດງຄວາມຊົມເຊີຍມາຍັງພາກສ່ວນທີ່ກ່ຽວຂ້ອງ ທີ່ເຮັດໃຫ້ການຈັດຕັ້ງປະຕິບັດກິດຈະກໍາຕ່າງໆຂອງແຜນງານໃນໄລຍະຜ່ານມາມີຜົນສໍາເລັດ ແລະ ສະແດງໃຫ້ເຫັນການຊ່ອຍເຫຼືອໄປເຖິງຜູ້ໄດ້ຮັບຜົນປະໂຫຽດຢ່າງແທ້ຈິງ ພ້ອມກັນນີ້ ອົງການອາຫານໂລກກໍມີຄວາມຍິນດີທີ່ມີໂອກາດເປັນສ່ວນນຶ່ງໃນການປະກອບສ່ວນເພື່ອໃຫ້ຄວາມພະຍາຍາມຂອງລັດຖະບານໃນການບັນລຸເປົ້າໝາຍການພັດທະນາແບບຍືນຍົງ ບັນລຸຜົນສໍາເລັດໃນປີ 2030.
ຂ່າວ/ພາບ: ເທບພະວົງ