ໂດຍປະຕິບັດ ຕາມນະໂຍບາຍຂອງນະຄອນຫຼວງວຽງຈັນ ທີ່ມີຕໍ່ຊາວຄ້າຂາຍທີ່ໄດ້ຮັບຄວາມເສຍຫາຍຈາກອັກຄີໄພທີ່ເກີດ ຂຶ້ນຢູ່ຕະຫຼາດທົ່ງຂັນຄຳໃນຕົ້ນປີນີ້ນະຄອນຫຼວງໄດ້ມອບໝາຍໃຫ້ ບໍລິສັດລາວເວີນເປັນຜູ້ຊ່ວຍສະໜັບສະໜູນດ້ານທຶນຮອນສະຖານທີ່ ແລະ ການປຸກສ້າງ ແລະ ມອບໝາຍໃຫ້ພະ ແນກອຸດສາຫະກຳການຄ້າ ສົມທົບກັບ ພາກສ່ວນກ່ຽວຂ້ອງເປັນຜູ້ຄຸ້ມຄອງ, ຈັດ ສັນ ເພື່ອຮອງຮັບ ແລະ ອຳນວຍຄວາມສະດວກໃຫ້ຊາວຄ້າຂາຍຈາກຕະຫຼາດ ທົ່ງຂັນຄຳໄດ້ດຳເນີນການຄ້າຂາຍຢູ່ຕະຫຼາດຊົ່ວຄາວລາວໄອເຕັກແຫ່ງ ນີ້ຈົນກວ່າການປຸກສ້າງສູນການຄ້າຕະຫຼາດ ທົ່ງຂັນຄຳຫຼັງໃໝ່ສຳເລັດ ຫຼື ປະມານ ປີກວ່າແລ້ວຈິ່ງຍົກຍ້າຍຊາວຄ້າຂາຍກັບຄືນ ແລະ ຢຸດເຊົາຕະຫຼາດຊົ່ວຄາວແຫ່ງນີ້.
ມາຮອດປະຈຸບັນການປຸກສ້າງແມ່ນ ສຳເລັດໂດຍພື້ນຖານປະກອບມີຫ້ອງ ຂາຍທັງໝົດຈຳນວນ 432 ລ໋ອກ (ຂະໜາດ 2,5×2,5 ແມັດ, ແຕ່ລະລ໋ອກປະກອບໂຕະໃຫ້ 1 ໜ່ວຍ, ດອກໄຟ 1 ຫຼອດ, ປັກສຽບ 1 ອັນ), ໄດ້ຈັດອອກ ເປັນ 6 ເຂດຄື: ເຂດເຄື່ອງນຸ່ງຫົ່ມ, ເຂດເຄື່ອງໃຊ້ໄຟຟາ ແລະ ເຄື່ອງໃຊ້ສອຍທົ່ວໄປ, ເຂດເຄື່ອງແຫ້ງຕ່າງໆ, ເຂດຂາຍຊີ້ນ, ປາ, ຜັກ ແລະ ໝາກໄມ້ ແລະ ອື່ນໆມີຫ້ອງນ້ຳຈຳນວນ 20 ຫ້ອງ, ມີເດີ່ນ ຈອດລົດໃຫຍ່ໄດ້ປະມານ 475 ຄັນ, ມີບ່ອນຈອດລົດຈັກ, ມີນ້ຳ, ມີໄຟຟ້າ.
ຖືວ່າມາຮອດປະຈຸບັນນີ້ແມ່ນພ້ອມໃຫ້ຊາວຄ້າຂາຍຈາກຕະຫຼາດທົ່ງ ຂັນຄຳເຂົ້າມາຄ້າຂາຍໄດ້ເລີ່ມແຕ່ວັນທີ 5 ມິຖຸນາເປັນຕົ້ນໄປ.
ສຳລັບນະໂຍບາຍຕໍ່ຊາວຄ້າຂາຍຄ່າເຊົ່າສະຖານທີ່ບໍ່ໄດ້ເສຍຄ່າ, ສຳລັບຄ່ານ້ຳ, ຄ່າໄຟຟ້າກໍບໍ່ໄດ້ເສຍເຊັ່ນກັນ ແຕ່ກໍຕ້ອງໄດ້ຊ່ວຍກັນປະຢັດ, ບໍ່ຟຸມເຟືອຍ ພ້ອມກັນປົກປັກຮັກສາ ແລະ ຮັບປະກັນຄວາມສະອາດ, ຄວາມປອດໄພ ແລະ ເຕັກນິກດ້ານໄຟຟ້າ
ເພື່ອເປັນການປະກອບສ່ວນໃນການປ້ອງກັນຄວາມສະຫງົບ, ປອດໄພ ແລະ ຄວາມສະອາດຢູ່ໃນບໍລິເວນຕະຫຼາດນັ້ນ, ຊາວຄ້າຂາຍຈະໄດ້ຈ່າຍຄ່າປ້ອງກັນເວນຍາມ, ຄ່າອະນາໄມ, ຄ່າບໍລິການດັ່ງກ່າວນີ້ຈະບໍ່ສູງກວ່າຄ່າບໍລິການໃນຕະຫຼາດອື່ນໆ ຢູ່ນະຄອນຫຼວງວຽງຈັນ.
ທ່ານ ວິສັນ ນະລົງສັກ ຜູ້ອຳນວຍການບໍລິສັດລາວເວີນມະຫາຊົນເປີດເຜີຍໃຫ້ຮູ້ແລງວັນທີ 5 ມິຖຸນານີ້ວ່າ: ຮອດປະຈຸບັນມີແມ່ຄ້າຈາກຕະຫຼາດທົ່ງຂັນຄຳມາຈັບຈອງແລ້ວ 71 ຄົນຈາກຜູ້ທີ່ໄດ້ຮັບຜົນກະທົບທັງໝົດ 243 ຄົນ.
ຂອບໃຈຂ່າວຈາກ: ໜັງສືພິມເສດຖະກິດ-ສັງຄົມ www.sedthakid.la