ເມື່ອກ້າວສູ່ເດືອນມິຖຸນາຂອງແຕ່ລະປີ ທົ່ວພັກ ທົ່ວລັດ ທົ່ວກອງທັບ ແລະ ທົ່ວປວງຊົນລາວໃນທົ່ວປະເທດ ໄດ້ພ້ອມພຽງກັນໄປປູກຕົ້ນໄມ້ ເພື່ອຟື້ນຟູປ່າທີ່ຖືກທຳລາຍ ຄືນຄວາມອຸດົມສົມບູນໃຫ້ແກ່ຊັບພະຍາກອນທຳມະຊາດ ປົກປັກຮັກສາສິ່ງແວດລ້ອມ ແລະ ຊີວະນາໆພັນໃຫ້ຍືນຍົງ ແຕ່ໃນຂະນະດຽວກັນ ຍັງມີກຸ່ມຄົນບໍ່ດີຈຳນວນໜຶ່ງ ທີ່ເຫັນແກ່ຜົນປະໂຫຍດສ່ວນຕົວ ໄດ້ເຄື່ອນໄຫວລັກຕັດໄມ້ ແລະ ຂົນສົ່ງໄມ້ທີ່ຜິດກົດໝາຍ ດັ່ງຄະດີຂອງທ້າວ ເອກ ມະນີວັນ ຖືກເຈົ້າໜ້າທີ່ກັກຕົວພ້ອມຂອງກາງໄມ້ດູ່ ຈຳນວນ 206 ຕັບ.
ເຈົ້າໜ້າທີ່ພະແນກຕຳຫຼວດເສດຖະກິດ ປກສ ແຂວງຄຳມ່ວນ ໄດ້ກັກລົດບັນທຸກ 10 ລໍ້ ໝາຍເລກທະບຽນ ບກ 1293 ຄຳມ່ວນ ທີ່ບັນທຸກໄມ້ດູ່ຈຳນວນ 206 ຕັບ ໂດຍບໍ່ມີເອກະສານຢູ່ເສັ້ນທາງ 13 ໃຕ້ ໃນວັນທີ 22 ພຶດສະພາ 2014 ແລະ ກັກຕົວເຈົ້າຂອງລົດຄື: ທ້າວ ເອກ ມະນີວັນ ປະຊາຊົນຢູ່ບ້ານເວີນ ເມືອງໄຊບູລີ ແຂວງສະຫວັນນະເຂດ.
ຕາມແຫຼ່ງຂ່າວໃຫ້ຮູ້ວ່າ: ພາຍຫຼັງໄດ້ຮັບລາຍງານຈາກພົນລະເມືອງດີວ່າ ຈະມີກຸ່ມພໍ່ຄ້າຈຳນວນໜຶ່ງ ຂົນສົ່ງໄມ້ທີ່ຜິດກົດໝາຍຈາກແຂວງສະຫວັນນະເຂດ ເພື່ອຈະມຸ່ງໜ້າເຂົ້າມາແຂວງຄຳມ່ວນ ຕາມເສັ້ນທາງ 13 ໃຕ້ ເຈົ້າໜ້າທີ່ ປກສ ແຂວງຄຳມ່ວນ ກໍ່ຮີບຟ້າວນຳກຳລັງລົງຕັ້ງດ່ານກວດກາຢູ່ຕາມເສັ້ນທາງ 13 ໃຕ້ ໃນເຂດເທສະບານເມືອງທ່າແຂກ ພໍຮອດເວລາ 19:30 ໂມງຂອງວັນດຽວກັນ ກໍ່ໄດ້ເຫັນລົດ 10 ລໍ້ ສີຂາວ ຍີ່ຫໍ້ອີຊູຊູ ໝາຍເລກທະບຽນ ບກ 1293 ຄຳມ່ວນ ຂັບຂີ່ໂດຍທ້າວ ເອກ ມະນີວັນ ປະຊາຊົນຢູ່ບ້ານເວີນ ເມືອງໄຊບູລີ ແຂວງສະຫວັນນະເຂດ ກຳລັງມຸ່ງໜ້າເຂົ້າມາຕົວເມືອງທ່າແຂກ ຈຶ່ງໄດ້ທຳການກວດກາລົດຄັນດັ່ງກ່າວ ແລະ ໄດ້ພົບເຫັນໄມ້ດູ່ຈຳນວນ 206 ຕັບ ເທົ່າກັບ 9,517 ແມັດກ້ອນ ລວມມູນຄ່າ 200 ລ້ານກວ່າກີບ.
ຂອບໃຈຂ່າວຈາກ: ໜັງສືພິມວຽງຈັນໃໝ່