ສຳນັກຂ່າວ AFP ລາຍງານວ່າ ໃນພິທີຖະແຫລງຂ່າວ ກ່ຽວກັບສາເຫດການຕາຍຂອງປາ ຈຳນວນມະຫາສານ ຕາມຊາຍຝັ່ງທະເລທາງພາກກາງຂອງຫວຽດນາມ ຊຶ່ງຈັດຂຶ້ນໃນວັນທີ 30 ມິຖຸນາຜ່ານມານີ້ ທີ່ນະຄອນຫລວງຮ່າໂນ້ຍ ໄດ້ລະບຸວ່າ ຈາກກໍລະນີຂອງປາຕາຍຈຳນວນຫລາຍໂຕນ ເມື່ອເດືອນເມສາຜ່ານມາ ແລະ ພາຍຫລັງການສືບສວນຂອງເຈົ້າໜ້າທີ່ຫວຽດນາມ ໄດ້ຮູ້ວ່າ ບໍລິສັດ ຟໍໂມຊາ ຮ່າຕິງ ສະຕີວ ຄໍປໍເຣຊັ່ນ ຊຶ່ງເປັນກຸ່ມທຸລະກິດຂອງຊາວຈີນໄຕ້ຫວັນ ທີ່ກຳລັງກໍ່ສ້າງໂຮງງານເຫລັກ ມູນຄ່າຫລາຍຕື້ໂດລາ ພາຍໃນພື້ນທີ່ເກີດເຫດປາຕາຍ ເປັນຜູ້ລະເມີດມາດຕະຖານດ້ານສິ່ງແວດລ້ອມ ແລະ ເປັນສາເຫດຂອງຄວາມເສຍຫາຍດັ່ງກ່າວ. ແນວໃດກໍຕາມ, ບໍລິສັດດັ່ງກ່າວ ໄດ້ກ່າວຄຳຂໍໂທດ ແລະ ຕົກລົງທີ່ຈະຈ່າຍເງິນ 500 ລ້ານໂດລາ ເພື່ອຊົດເຊີຍຕໍ່ເຫດການທີ່ເກີດຂຶ້ນ ຊຶ່ງສົ່ງຜົນເສຍຫາຍຕໍ່ກັບ ອຸດສາຫະກຳອາຫານທະເລໃນທ້ອງຖິ່ນ ແລະ ສ້າງຄວາມບໍ່ເພິ່ງພໍໃຈໃຫ້ແກ່ຊາວຫວຽດນາມ.
ດ້ານທາງການຫວຽດນາມ ກໍໄດ້ເນັ້ນຢ້ຳອີກວ່າ ນັກລົງທຶນຕ່າງປະເທດ ຕ້ອງບໍ່ເຂົ້າມາດຳເນີນການຢູ່ຫວຽດນາມ ໂດຍທີ່ບໍ່ມີການຄວບຄຸມ ຊຶ່ງທ່ານ ດັ່ງຮີດົງ ຮອງລັດຖະມົນຕີກະຊວງແຜນການ ແລະ ການລົງທຶນຫວຽດນາມ ໄດ້ກ່າວວ່າ ” ຂ້າພະເຈົ້າຂໍຢືນຢັນອີກເທື່ອໜຶ່ງວ່າ ເຮົາຈະບໍ່ຍອມແລກສິ່ງແວດລ້ອມ ພຽງເພື່ອດຶງດູດການລົງທຶນ ຈາກຕ່າງປະເທດ. ”
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!