ສະຫະພາບເອີຣົບ (ອີຢູ) ເປີດການເຈລະຈາເລື່ອງໃໝ່ກັບຕວັກກີແລ້ວຕາມຂະບວນການຮັບຕວັກກີເຂົ້າເປັນສະມາຊິກ ອັນເປັນເງື່ອນໄຂໃນຂໍ້ຕົກລົງສົ່ງຜູ້ອົບພະຍົມໄປຕວັກກີເພື່ອແກ້ໄຂວິກິດຜູ້ອົບພະຍົມຫຼັ່ງໄຫຼເຂົ້າອີຢູ.

ທ່ານ ເບີດ ຄຸນເດິສ ລັດຖະມົນຕີຕ່າງປະເທດເນເທີແລນເຜີຍຫຼັງເປັນປະທານການພົບຫາລືກັບທ່ານ ເມຟລຸດ ເຊິວູໂຊກລູ ລັດຖະມົນຕີຕ່າງປະເທດຕວັກກີທີ່ນະຄອນຫຼວງບຣຸກແຊລໃນມື້ນີ້ວ່າ ສະມາຊິກອີຢູທຸກປະເທດເຫັນດີທີ່ຈະເປີດການເຈລະຈາເລື່ອງການເງິນ ແລະ ງົບປະມານກັບຕວັກກີ ໂດຍໄດ້ເນັ້ນເຖິງຄວາມສຳຄັນຂອງຄວາມສຳພັນທັງສອງຝ່າຍ ແລະ ການເຮັດວຽກຮ່ວມກັນໃນປະເດັນຕ່າງໆ ລວມເຖິງຜູ້ອົບພະຍົມທີ່ປະຊຸມໄດ້ສະງົບໄວ້ອາໄລໃຫ້ແກ່ຜູ້ເຄາະຮ້າຍຈາກເຫດລະເບີດທີ່ທ່າອາກາດສະຍານອະຕາເຕິກໃນນະຄອນຫຼວງອິສຕັນບູລເມື່ອວັນອັງຄານກ່ອນເປີດການເຈລະຈາ.

ຕວັກກີໄດ້ເຮັດຂໍ້ຕົກລົງເລື່ອງຈະເຂົ້າເປັນສະມາຊິກກັບອີຢູຕັ້ງແຕ່ເມື່ອຄັ້ງເປັນປະຊາຄົມເສດຖະກິດເອີຣົບ (ອີອີຊີ) ໃນປີ 1963 ຕາມດ້ວຍການຍື່ນຂໍເປັນສະມາຊິກອີອີຊີຢ່າງເປັນທາງການໃນປີ 1987 ແລະ ຍື່ນຂໍເປັນສະມາຊິກຢ່າງເປັນທາງການໃນປີ 2005 ຈົນເຖິງຂະນະນີ້ທັງສອງຝ່າຍເປີດການເຈລະຈາໄປແລ້ວ 15 ເລື່ອງຈາກທີ່ຕ້ອງເຈລະຈາທັງໝົດ 35 ເລື່ອງເພື່ອເຂົ້າເປັນສະມາຊິກ ແລະ ຕວັກກີເຮັດສຳເລັດໄປແລ້ວພຽງເລື່ອງດຽວ.