ການສຳມະນາລະດັບພາກພື້ນ ກ່ຽວກັບການເຊື່ອມສານການຈັດຕັ້ງປະຕິບັດ ວາລະການພັດທະນາແບບຍືນຍົງ ປີ 2030 ແລະ ແຜນດຳເນີນງານອິດສະຕັນບູນລະດັບປະເທດສຳລັບ ປະເທດດ້ອຍພັດທະນາຢູ່ພາກພື້ນອາຊີ-ປາຊີຟິກ, ພ້ອມດ້ວຍການສຳມະນາຂີດຄວາມສາມາດ ກ່ຽວກັບການຈຳລອງຮູບແບບໃນການຈັດຕັ້ງປະຕິບັດ, ການພັດທະນາແບບຍືນຍົງໄດ້ມີຂຶ້ນໃນວັນທີ28-30 ມິຖຸນານີ້ທີ່ນະຄອນຫລວງວຽງຈັນ ເພື່ອປຶກສາຫາລືແລກປ່ຽນບົດຮຽນ,ປະສົບການໃນການປະຕິບັດແຜນດຳເນີນງານດັ່ງກ່າວ ເພື່ອບັນຈຸເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ ຂອງແຕ່ລະປະເທດ.

ທ່ານ ຄຳລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ ປະທານກອງປະຊຸມ ໄດ້ຊີ້ໃຫ້ເຫັນຄວາມຄືບໜ້າ ແລະ ສິ່ງທ້າທາຍໂດຍລວມຂອງປະເທດດ້ອຍພັດທະນາ ໃນການປະ ຕິ

ບັດແຜນດຳເນີນງານອິດສະຕັນບູນ ລວມທັງຄວາມພະຍາຍາມຂອງ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ເພື່ອນຳພາປະເທດຊາດຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020. ນອກນີ້, ຍັງໄດ້ຖືສຳຄັນການເຊື່ອມສານການຈັດຕັ້ງປະຕິບັດ ວາລະການພັດທະນາສາກົນເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະໃຫ້ມີຄວາມສອດຄ່ອງ, ພ້ອມທັງໄດ້ຢ້ຳເຖິງຄວາມຈຳເປັນທີ່ວົງຄະນາຍາດສາກົນ ຕ້ອງໄດ້ໃຫ້ການສະໜັບສະໜູນຊ່ວຍເຫລືອແກ່ປະເທດດ້ອຍພັດທະນາ ເພື່ອໃຫ້ສາມາດບັນລຸເປົ້າໝາຍການພັດທະນາຂອງຕົນ. ທີ່ປະຊຸມຍັງໄດ້ຮັບຟັງການບັນລະຍາຍຈາກຜູ້ຊ່ຽວຊານ ກ່ຽວກັບຮູບແບບ ແລະ ແນວທາງໃນການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ແລະ ຂະບວນການພັດທະນາ ເພື່ອຫລຸດພົ້ນອອກຈາກສະຖານະພາບປະເທດດ້ອຍພັດທະນາ ເຊິ່ງເປັນໂອກາດອັນດີໃຫ້ແກ່ຜູ້ເຂົ້າຮ່ວມໄດ້ສະແດງຂໍ້ຄິດເຫັນ ແລະ ຫາລືເຖິງສິ່ງທ້າທາຍຕ່າງໆ.

ແຜນດຳເນີນງານອິດສະຕັນບູນ ຖືກຮັບຮອງເອົາໂດຍກອງປະຊຸມ ສະຫະປະຊາຊາດ ວ່າດ້ວຍປະເທດດ້ອຍພັດທະນາຄັ້ງທີ 4 ເມື່ອທ້າຍປີ 2011 ທີ່ນະຄອນຫລວງ ອິດສະຕັນບູນ ປະເທດຕວກກີ ເຊິ່ງມີເປົ້າໝາຍລວມ ຊ່ວຍເຫລືອບັນດາປະເທດດ້ອຍພັດທະນາ ໃຫ້ສາມາດບັນລຸເງື່ອນໄຂການຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃຫ້ໄດ້ເຄິ່ງໜຶ່ງ ໃນປີ 2020 ໂດຍການປະຕິບັດ 8 ຂົງເຂດບູລິມະສິດ ຄື: ຄວາມສາມາດດ້ານການຜະລິດ, ກະສິກຳ ໂພຊະນາການ ແລະ ການພັດທະນາຊົນນະບົດ, ການຄ້າ, ການຜະລິດສິນຄ້າ, ການພັດທະນາຊັບພະຍາກອນມະນຸດ ແລະ ສັງຄົມ, ການຮັບມືກັບວິກິດການ ແລະ ສິ່ງທ້າທາຍຕ່າງໆທີ່ເກີດຂຶ້ນ, ດ້ານແຫລ່ງທຶນ ແລະ ການປົກຄອງທີ່ດີ.

ທີ່ມາ: ລາວພັດທະນາ