ໃນຕອນແລງວັນທີ 25 ມິຖຸນາ 2016 ຜ່ານມາ ທ່ານ ສົມກົດ ມັງໜໍ່ເມກ ກຳມະການສູນກາງພັກ ເລຂາພັກແຂວງ ເຈົ້າແຂວງໆຊຽງຂວາງ ພ້ອມດ້ວຍຄະນະ ໄດ້ລົງກວດກາໂຄງການກໍ່ສ້າງສູນການຄ້າທັນສະໄໝແຂວງຊຽງຂວາງ ເຊິ່ງເປັນການລົງທຶນຂອງບໍລິສັດເອກະຊົນຊາວຈີນ ຈາກແຂວງເຈີຈຽງ ທີ່ມາລົງທຶນໃນ ສປປ.ລາວ ໂດຍແມ່ນບໍລິສັດຢູຢາວມິງຊຽງພລາສຕິກຈຳກັດ (YUYAO MINGXIANG PLASTIC CO.,LTD).
ໂຄງການກໍ່ສ້າງສູນການຄ້າທັນສະໄໝ ເປັນອາຄານ 9 ຊັ້ນ ຮວມມູນຄ່າການກໍ່ສ້າງ 9 ລ້ານໂດລາສະຫະລັດ ແລະ ເລີ່ມລົງມືການກໍ່ສ້າງມາແຕ່ວັນທີ 25 ພຶດສະພາ 2016 ຄາດວ່າຈະໃຫ້ສຳເລັດໃນປີ 2018 ປັດຈຸບັນ ມີຄວາມຄືບໜ້າແລ້ວ 9% ໃນໂອກາດນີ້ ທ່ານເຈົ້າແຂວງໆຊຽງຂວາງ ກໍໄດ້ປຶກສາຫາລືກັບທ່ານ ຢາງ ຈ້ຽນຮົວ (Yang Jianhua) ປະທານບໍລິສັດຢູຢາວມິງ ຊຽງພລາສຕິກຈຳກັດ ແລະ ໄດ້ໃຫ້ຮູ້ວ່າ ຖ້າໂຄງການນີ້ສຳເລັດ ກໍຈະເຮັດໃຫ້ຊາວຊຽງຂວາງມີສູນການຄ້າທີ່ທັນສະໄໝໃນໂຕເມືອງໂພນສະຫັວນ ເພື່ອເປັນການຕ້ອນຮັບງານມະຫະກຳກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງເປັນເຈົ້າພາບ ກຽມຄວາມພ້ອມຮອງຮັບໄຫຫີນເປັນມໍລະດົກໂລກ ທີ່ຈະມີນັກທ່ອງທ່ຽວເຂົ້າຢ້ຽມຢາມແຂວງຊຽງຂວາງ ແລະ ໄດ້ຈັບຈ່າຍຊື້ວັດຖຸສິ່ງຂອງ ກໍຄືເຄື່ອງທີ່ລະນຶກ ເຮັດໃຫ້ແຂວງຊຽງຂວາງ ມີໂສມໜ້າໃໝ່ທັນສະໄໝກວ່າເກົ່າ.
ຂ່າວ/ພາບ: ບຸນມີ ແສງທຸມມີ (http://www.vtetoday.la/)