ເພື່ອເປັນການຮອງຮັບການເຊື່ອມໂຍງກັບບັນດາປະເທດໃນພາກພື້ນ ແລະສາກົນໃນອະນາຄົດ ເປັນຕົ້ນແມ່ນຮັບປະກັນດ້ານຄວາມປອດໄພ, ຄຸນນະພາບການບໍລິການ ແລະອຳນວຍຄວາມສະດວກ, ລັດຖະບານ ຈິ່ງໄດ້ຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ ເພື່ອຮອງຮັບກັບການເຊື່ອມໂຍງ, ຊຶ່ງໂຄງການດັ່ງກ່າວໄດ້ເລີ່ມລົງມືຈັດຕັ້ງປະຕິບັດໃນທ້າຍປີຜ່ານມາໂດຍຮອດປະຈຸບັນມີຄວາມຄືບໜ້າແລ້ວ 2,28%.
ວັນທີ 28 ມິຖຸນາຜ່ານມາ ຄະນະການນຳຂອງກະຊວງໂຍທາທິການ ແລະຂົນສົ່ງໄດ້ລົງຢຽ້ມຢາມໂຄງການກໍ່ສ້າງຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ ຊຶ່ງນຳໂດຍທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ພ້ອມດ້ວຍຫົວໜ້າກົມການບິນ, ທີ່ປຶກສາໂຄງການ, ຜູ້ຮັບເໝົາ ແລະຄະນະຄຸ້ມຄອງໂຄງການ.
ໂຄງການດັ່ງກ່າວ ໄດ້ເລີ່ມດຳເນີນການກໍ່ສ້າງຕັ້ງແຕ່ວັນທີ 9 ທັນວາ 2015 ເປັນຕົ້ນມາ, ມາຮອດປະຈຸບັນການກໍ່ ສ້າງມີຄວາມຄືບໜ້າ 2,28% ໂດຍຕາມແຜນແມ່ນ 2,29%, ໃນນັ້ນ ໜ້າວຽກທີ່ສຳເລັດມີດັ່ງນີ້: ການຮື້ຖອນອາຄານສາງສິນຄ້າ, ການຕອກເສົາເຂັມບໍລິເວນທີ່ຈະກໍ່ສ້າງອາຄານເຊື່ອມຕໍ່ເຮືອບິນ (Concours) ແລະສ່ວນຕໍ່ຂະຫຍາຍອາຄານຜູ້ໂດຍສານສາກົນເບື້ອງທິດເໜືອ, ການຂຸດລອດໜ້າດິນບໍລິເວນທີ່ຈະກໍ່ສ້າງທາງກິ້ງ D (Taxiway D) ແລະລານຈອດລົດຊົ່ວຄາວໜ້າອາຄານຜູ້ໂດຍສານພາຍໃນ.
ສຳລັບໜ້າວຽກທີ່ກຳລັງດຳເນີນການກໍ່ສ້າງຢູ່ປະຈຸບັນລວມມີ: ກໍ່ສ້າງຮາກຖານອາຄານຜູ້ໂດຍສານສາກົນເບື້ອງຕໍ່ຂະຫຍາຍດ້ານທິດເໜືອ, ບົດອັດຊັ້ນດິນຢູ່ບໍລິເວນທີ່ຈະກໍ່ສ້າງ Taxiway D ແລະລານຈອດລົດ A ທ້າຍສຸດແມ່ນກະກຽມພື້ນທີ່ຈະກໍ່ສ້າງອາຄານຜູ້ໂດຍສານພາຍໃນຊົ່ວຄາວ ແລະອາຄານສ້ອມແປງສະໜາມບິນ, ໂຄງການດັ່ງກ່າວຈະດຳເນີນການກໍ່ສ້າງເປັນເວລາ 32 ເດືອນ, ໂດຍໃຊ້ງົບປະມານກໍ່ສ້າງທັງໝົດ 7,53 ຕື້ເຢນ ຫຼື ປະມານ 61 ລ້ານໂດລາສະຫະລັດ, ພາຍຫຼັງທີ່ໂຄງການສຳເລັດແລ້ວ, ນອກຈາກຈະສາມາດອຳນວຍຄວາມສະດວກໃຫ້ແກ່ການດຳເນີນວຽກງານການບິນແລ້ວ, ຄາດວ່າຈະເປັນການປະກອນສ່ວນສຳຄັນໃນການພັດທະນາເສດຖະກິດ-ສັງຄົມຂອງ ສປປ ລາວ ເປັນຕົ້ນແມ່ນດ້ານການຄ້າ, ການທ່ອງທ່ຽວ, ການລົງທຶນຂອງສາກົນ ແລະອື່ນໆ.
ຫຼັງຈາກນັ້ນ ຄະນະດັ່ງກ່າວໄດ້ຖືໂອກາດນີ້ ຢ້ຽມຢາມພື້ນທີ່ໂຄງການທົ່ວສະໜາມບິນ, ຮອ່ງລະບາຍນ້ຳ, ສູນດັບເພີງ ແລະຕຶກ VIP ຜູ້ໂດຍສານ, ເພື່ອກະກຽມຄວາມພ້ອມໃນການຮອງຮັບການເປັນເຈົ້າພາບກອງປະຊຸມສຸດຍອດອາຊຽນທີ່ຈະຂຶ້ນໃນທ້າຍປີນີ້.
ທີ່ມາ: 