ບັນເທີງຕ່າງແດນ ກັບ ລາວໂພສຕ໌ ວັນນີ້ເຮົາຈະເວົ້າກ່ຽວກັບຂ່າວທີ່ຊ໊ອກວົງການບັນເທີງຂອງເກົາຫຼີໃຕ້ ເມື່ອດາລາຊື່ດັງອີກຄົນໜຶ່ງແຫ່ງວົງການບັນເທີງເກົາຫຼີຢ່າງ ຄິມ ຊອງ ມິນ ໄດ້ຈົບຊີວິດລົງ.
ສຳນັກຂ່າວ ຍອນຮັບ ລາຍງານວ່າ ຄິມ ຊອງ ມິນ ດາລາເກົາຫຼີໃຕ້ໄວອາຍຸ 43 ປີ ເສຍຊີວິດລົງແລ້ວໃນວັນອາທິດ ທີ່ 26 ມິຖຸນາ 2016 ທີ່ໂຮງໝໍ Seoul St. Mary’s Hospital ດ້ວຍພາວະສະໝອງຕາຍ ເມື່ອເຊົ້າຂອງວັນອາທິດທີ່ຜ່ານມາຫຼັງຈາກທີ່ເຂົາຢູ່ໃນອາການໂຄມ່າເຖິງ 2 ວັນ ໃນວັນເກີດເຫດ ຄິມ ຊອງ ມິນ ເກີດມີປາກສຽງກັບເມຍຂອງລາວເອງທີ່ເຮືອນຈົນເຮັດໃຫ້ເມຍຂອງລາວເກັບເຄື່ອງໜີອອກຈາກເຮືອນ ກ່ອນທີ່ລາວຈະຄິດສັ້ນພະຍາຍາມຂ້າຕົວຕາຍໃນຫ້ອງນ້ຳ.
ເມຍ ແລະ ລູກຂອງລາວໄດ້ເຜີຍວ່າ ໃນຂະນະທີ່ ຄິມຊອງມິນ ຍັງມີຊີວິດຢູ່ ລາວຈະມັກເວົ້າສະເໝີວ່າຢາກບໍລິຈາກອະໄວຍະວະໃນຮ່າງກາຍຂອງລາວ ດັ່ງນັ້ນຄອບຄົວຂອງ ຄິມ ຊອງ ມິນ ຈິ່ງຕັດສິນໃຈເຮັດຕາມຈຸດປະສົງຂອງຜູ້ກ່ຽວ ດ້ວຍການບໍລິຈາກຫົວໃຈ, ປອດ, ລຳໃສ້ໃຫຍ່, ໝາກໄຂ່ຫຼັງ, ຕັບ ແລະ ແກ້ວຕາ ແກ່ຄົນປ່ວຍ 5 ຄົນ ເມື່ອຕອນແລງເວລາ 18:00ໂມງ (ວັນທີ 26 ມິຖຸນາ. ຕາມເວລາທີ່ເກົາຫຼີ) ແລະ ຖອດເຄື່ອງຊ່ວຍຫາຍໃຈອອກຫຼັງຈາກການຜ່າຕັດສຳເລັດ ເຊິ່ງພິທີຝັງສົບຂອງ ຄິມຊອງມິນ ແມ່ນໄດ້ຈັດຂຶ້ນໃນວັນນີ້ ວັນທີ 28 ມິຖຸນາ 2016
ຄິມ ຊອງ ມິນ ເຂົ້າສູ່ວົງການເລີ່ມຈາກເປັນນັກສະແດງລະຄອນເວທີເມື່ອປີ 1995 ແລະ ໂດ່ງດັງຈາກຊີຣີ້ເລື່ອງ Mermaid Lady ເຊິ່ງອອກອາກາດທາງຊ່ອງ MBC ເມື່ອປີ 2002 ກ່ອນທີ່ລາວຈະມີຂ່າວຊ໊ອກວົງການບັນເທີງເກົາຫຼີໃຕ້ ດ້ວຍການມີຄະດີຕິດພັນກັບຢາເສບຕິດ ເຖິງ 2 ຄັ້ງ ໃນປີ 2011 ແລະ ຖືກສານຕັດສິນໃຫ້ລົງອາຍາ 4 ປີ ແລະ ເມື່ອປີ 2015 ຖືກສານຈຳຄຸກ 10 ເດືອນ ແລະ ຄິມຊອງມິນ ຫາກໍ່ໄດ້ຮັບອິດສະຫຼະພາບອອກຈາກຄຸກມາເມື່ອເດືອນມັງກອນ 2016 ນີ້ເອງ
