ຖ້າໄດ້ທ່ຽວແຂວງ ໄຊຍະບູລີ ຢ່າລືມມາທີ່ນີ້ ນີ້ເປັນອີກໜຶ່ງສະຖານທີ່ໃນການທ່ອງທ່ຽວທີ່ພວກເຮົາຂໍນຳສະເໜີ ຖໍ້າອຸດຕຸມຄຳ ຫຼື “ຖ້ຳພໍ່ບົວ” ບ້ານຂິ່ງ ເມືອງ ຊຽງຮ່ອນ ແຂວງໄຊຍະບູລີ ຖ້າແຫ່ງນີ້ນອກຈາກຈະມີຄວາມສວຍງາມ ແລະ ຄວາມອຸດົມສົມບູນທາງທຳມະຊາດແລ້ວ ຍັງເປັນຖ້ຳທີ່ມີຄວາມສັກສິດ ຜູ້ຄົນໃຫ້ຄວາມເຄົາລົບນັບຖື ແລະ ສັກກາລະບູຊາ

ຕາມຄຳບອກຂານວ່າຖ້ຳແຫ່ງນີ້ມີຄວາມເປັນມາຄືເປັນເວລາດົນນານມາແລ້ວ ມີພະບົວລຽບປັດສະໂຖພ້ອມດ້ວຍ ສຳມະເນນ 3 ອົງ ຄື: ສຳມະເນນ ອິນເຫຼົາ, ສຳມະເນນຄຳ ແລະ ສຳມະເນນກັນນິຖາ ພາກັນໄປຈຳສິນພາວະນາຢູ່ໃນ ປ່າ, ສ່ວນພະບົວລຽບປັດສະໂຖ ໄດ້ຈຳສິນຢູ່ພາຍໃນຖ້ຳແຫ່ງນີ້ເພາະເຫັນວ່າເປັນສະຖານທີ່ສະຫງົບເຊິ່ງເຫມາະແກ່ການປະຕິບັດທຳກຳມະຖານຂອງພະພິກຂຸສົງ ແລະ ດິນແດນແຫ່ງນີ້ຍັງເປັນບ່ອນທີ່ສັກສິດທີ່ປະຊາຊົນເຄົາລົບນັບຖືສັກກາລະບູຊາຕະຫລອດມາ,ການທີ່ມີພະສົງໄປຈຳສິນພາວະນາ ສຶກສາຮ່ຳຮຽນວິໄນສົງຢູ່ເຂດນັ້ນກໍ່ເລີຍມີອອກຕົນຍາດໂຍມພາຍໃນບ້ານຂິ່ງ ແລະ ບ້ານຄ້ຳ ພາກັນ ມາບູລະນະປະຕິສັງຂອນຖ້ຳແຫ່ງນີ້ດ້ວຍການປຸກສ້າງກຸດຕິ, ກໍ່ພະທາດເຈດີ ແລະ ໄດ້ນຳເອົາພະພຸດທະຮູບໄປປະດິດສະຖານເພື່ອສັກກາລະບູຊາ. ບຸນປີໃໝ່ລາວຂອງທຸກໆປີ ປະຊາຊົນໄດ້ພ້ອມພາກັນໄປຫົດສົງພະພຸດທະຮູບ ແລະ ເປັນການພາຄອບຄົວຍາດພີ່ນ້ອງໄປພັກຜ່ອນທ່ຽວຊົມທຳມະຊາດທີ່ມີຄວາມສວຍສົດງົດງາມອີກດ້ວຍ

ຖໍ້າອຸດຕຸມຄຳ ຫຼື “ຖ້ຳພໍ່ບົວ” ຕັ້ງຢູ່ບ້ານຂິ່ງ ຫ່າງຈາກເທດສະບານຂອງເມືອງ ຊຽງຮ່ອນ ແຂວງໄຊຍະບູລີປະມານ 5 ກິໂລແມັດ, ນັກທ່ອງທ່ຽວສາມາດໄປພັກຜ່ອນທ່ຽວຊົມຖ້ຳພໍ່ບົວດ້ວຍການຂີ່ລົດ

ຂອບໃຈຂໍ້ມູນດີໆຈາກ:ອົງການພັດທະນາການທ່ອງທ່ຽວແຂວງໄຊຍະບູລີ ແລະ ເຟສບຸກ: ຊຽງຮອນບ້ານເຮົາ