ໃນອາທິດທີ່ຜ່ານມາບໍລິສັດ Qualcomm ໄດ້ຍື່ນເລື່ອງຮ້ອງຮຽນທີ່ສານຊັບສິນທາງປັນຍາ ໃນປັກກິ່ງ ວ່າດ້ວຍເລື່ອງທີ່ບໍລິສັດ Meizu ລະເມີດສິດທິບັດຂອງຕົນ. ຈາກລາຍງານໃນຄັ້ງນັ້ນທາງບໍລິສັດ Qualcomm ບໍ່ສາມາດປະເມີນມູນຄ່າຄວາມເສຍຫາຍທີ່ເກີດຂຶ້ນໄດ້ ແຕ່ຂ່າວຫຼ້າສຸດບອກວ່າ ທາງບໍລິສັດ Qualcomm ຕ້ອງການເງິນຈຳນວນ 520 ລ້ານຢວນ ສຳລັບຄວາມເສຍຫາຍທີ່ເກີດຂຶ້ນນີ້. ເຖິງວ່າ Meizu ຈະບໍ່ໄດ້ໃຊ້ງານຊິບເຊັດຂອງ Qualcomm, ແຕ່ບໍລິສັດສັນຊາດອາເມຣິກາໄດ້ກ່າວວ່າ ບໍລິສັດ Meizu ໄດ້ຄົ້ນພົບວິທີທີ່ຈະໃຊ້ສິດທິບັດບາງສ່ວນໄດ້ ໂດຍທີ່ບໍ່ຈຳເປັນຕ້ອງຂໍອະນຸຍາດຫຼືຈ່າຍຄ່າລິຂະສິດໃດໆ.
ທາງບໍລິສັດ Meizu ເອງກໍໄດ້ອອກມາຖະແຫຼງການຢ່າງເປັນທາງການ ເຊິ່ງໄດ້ກ່າວວ່າ: ທາງບໍລິສັດແມ່ນໃຫ້ຄວາມສຳຄັນກັບການຄຸ້ມຄອງຊັບສິນທາງປັນຍາຢູ່ສະເໝີ ແລະບໍ່ເຄີຍປະຕິເສດທີ່ຈະຈ່າຍຄ່າສິດທິບັດຕາມກົດໝາຍ. ນອກນີ້ຍັງກ່າວວ່າ ທາງບໍລິສັດໄດ້ຕິດຕໍ່ກັບ Qualcomm ຫຼາຍຄັ້ງ ແລະຜິດຫວັງທີ່ຕ້ອງຈົບລົງທີ່ສານ. Meizu ບອກວ່າຈະຈັດງານຖະແຫຼງຂ່າວກ່ຽວກັບຄະດີດັ່ງກ່າວໃນວັນອັງຄານ ທີ່ 28 ມິຖຸນານີ້.
ທີ່ມາ:gizmochina,ເດັກລາວ