ໃນວັນທີ 20 ມິຖຸນາ 2016 ຜ່ານມານີ້ ໄດ້ມີພິທີມອບ ໂຄງການປັບປຸງລະບົບນ້ຳໃຊ້ ຢູ່ສູນເສຍອົງຄະພິເສດ 790, ໂດຍການເຂົ້າຮ່ວມຂອງ ທ່ານ ປອ ຄຳແກ້ວ ສານບຸນຄູນໄຊ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ຫົວໜ້າກົມນະໂຍບາຍ, ຫົວໜ້າ ກົມຊັບສິນກະຊວງການ ເງິນ,ຫົວໜ້າກົມເຄຫາ-ຜັງເມືອງ ກະຊວງໂຍທາ ແລະ ຂົນສົ່ງ, ຕ່າງໜ້າຈາກກະຊວງແຜນການ, ສູນເສຍອົງຄະພິເສດ 790 ແລະ ຄະນະຮັບຜິດຊອບໂຄງ ການເຂົ້າຮ່ວມ.
ກ່າວມອບໂຄງການປັບປຸງລະບົບນຳ້ໃຊ້ ໃນຄັ້ງນີ້ ໂດຍແມ່ນ ທ່ານ ບຸນປອນ ໄຊຍະເສນ ຫົວໜ້າກົມນະໂຍບາຍຕໍ່ຜູ້ມີຜົນງານ ແລະ ທ່ານ ຄຳຫຼ້າ ຫົວໜ້າ ສູນເສຍອົງຄະພິເສດ 790 ເປັນຜູ້ກ່າວຮັບ ໂຄງການໃນຄັ້ງນີ້ , ຍ້ອນພັກ ແລະ ລັດຖະບານ ໄດ້ເອົາໃຈໃສ່ຕາມຄວາມຮຽກຮ້ອງຕ້ອງການ ຕໍ່ຜູ້ທີ່ມີຄຸນງາມຄວາມດີອັນໃຫຍ່ຫຼວງຕໍ່ປະເທດຊາດພວກເຮົາ ສູນເສຍອົງຄະພິເສດ 790 ຈຶ່ງໄດ້ຊົມໃຊ້ນຳ້ສະອາດ, ກົມນະໂຍບາຍຕໍ່ຜູ້ທີ່ມີຜົນງານ ກະຊວງແຮງງານ ແລະ ສະຫວັດດີການສັງຄົມ ຈຶ່ງໄດ້ຄົ້ນຄວ້າພິຈາລະນາຄວາມເປັນໄປໄດ້ ເພື່ອຕອບສະໜອງນຳ້ໃຊ້ທີ່ມີຄວາມສະ ດວກໃຫ້ກັບເຂົາເຈົ້າ, ໂຄງການດັ່ງກ່າວແມ່ນເລີ່ມຕົ້ນ ເດືອນພະຈິກ ປີ2015 ຈົນຮອດ ເດືອນ ມິຖຸນາ 2016, ບໍລິສັດ ອິນໂຟສເທັກ ຈຳກັດໄດ້ເປັນຜູ້ຊະນະໃນການປະມູນ ແລະ ຖືກຮັບຮອງຈາກ ຄະນະນຳກະຊວງ ໃຫ້ບໍລິສັດ ດັ່ງກ່າວເປັນຜູ້ຮັບເໝົາກໍ່ສ້າງ ແລະ ປັບປຸງລະບົບນຳ້ໃຊ້ ຢູ່ສູນ 790 ລວມມູນຄ່າໂຄງການກໍ່ສ້າງ ປະມານ 2,8 ຕື້ກວ່າກີບ, ເງື່ອນໄຂການຊຳລະແມ່ນຕາມສົກຫງົບປະມານລະບຽບ ກະຊວງການເງິນ ວາງອອກ ຕາມການລາຍງານ: ກົມນະໂຍບາຍຕໍ່ຜູ້ທີມີຜົນງານ
ທີ່ມາ: ຂ່າວສານ ແຮງງານ ແລະ ສະຫວັດດີການສັງຄົມ