ໃນຕອນບ່າຍວັນທີ 22 ມິຖຸນາ ທີ່ຜ່ານມາ ໄດ້ມີການຖະແຫຼງຂ່າວເປີດຮັບສະໝັກນາງສາວລາວ 2016 ແລະ ມອບລົດໃຫ້ແກ່ ນາງສາວລາວ 2015, ທີ່ສະຖານີໂທລະພາບ ທີວີລາວ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ດຣ. ຫົງຄໍາ ສຸວັນນະວົງ ປະທານສະຖານີໂທລະພາບ ທີວີລາວ, ທ່ານ ນາງ ປານີ ກິນດາວົງ ຈາກສູນກາງຊາວໝຸ່ມປະຊາຊົນປະຕິວັດລາວ, ທ່ານ ນາງ ລິນດາ ພົນພິລັດ ຜູ້ຈັດກອງປະກວດນາງສາວລາວ ພ້ອມດ້ວຍ ນາງສາວລາວ 2015 ແລະ ບັນດາສື່ມ່ວນຊົນ.

ທ່ານ ນາງ ອຸທອນທິບ ສຸວັນນະວົງ ຮອງປະທານສະຖານີໂທລະພາບທີວີລາວໃນນາມຜູ້ຮັບຜິດ ຊອບຈັດງານປະກວດນາງສາວລາວ ໄດ້ຖະແຫຼງວ່າ: ການເປີດຮັບສະໝັກນາງສາວລາວປີນີ້ ຈະແຕກຕ່າງຈາກປີທີ່ຜ່ານມາ ເຊິ່ງໄດ້ເພີ່ມເຂດຮັບສະໝັກອີກສອງແຂວງ ຄື: ໄຊຍະບູລີ ແລະ ສະຫວັນນະເຂດ. ສຳລັບການເປີດຮັບສະໝັກແມ່ນໄດ້ເລີ່ມມາແຕ່ວັນທີ 01 ພຶດສະພາ ຈົນເຖິງວັນທີ 22 ກໍລະກົດ 2016 ໃນນັ້ນ, ໄດ້ແບ່ງອອກເປັນ 3 ພາກ ຄື:
ພາກເໜືອ:ແຂວງຫຼວງພະບາງ ທີ່ໂຮງແຮມເມືອງທອງ ໃນວັນທີ 04 ກໍລະກົດ ແລະ ແຂວງໄຊຍະບູລີ ທີ່ໂຮງແຮມອຸທຸມພອນ ວັນທີ 07 ກໍລະກົດ 2016.

ພາກໃຕ້: ແຂວງສະຫວັນນະເຂດ ທີ່ໂຮງແຮມດາວສະຫວັນ ໃນວັນທີ 14 ກໍລະກົດ ແລະ ແຂວງຈຳປາສັກ ທີ່ໂຮງແຮມຈຳປາສັກແກຣນ ວັນທີ 17 ກໍລະກົດ 2016.

ພາກກາງ: ແມ່ນຈະໄດ້ຄັດເລືອກທີ່ນະຄອນຫຼວງວຽງຈັນ ໃນວັນທີ 23 ກໍລະກົດ 2016 ທີ່ໃກ້ຈະມາເຖິງນີ້.
ພາຍຫຼັງທີ່ມີການຄັດເລືອກຈາກແຕ່ລະເຂດແລ້ວ ໃນເດືອນສິງຫາ ກໍ່ຈະໄດ້ມີການຖະແຫຼງຂ່າວປະກາດຜົນ 20 ຄົນສຸດທ້າຍ ພ້ອມທັງເປີດໂຕມຸງກຸດ ແລະ ຈັບສະຫຼາກນຳເບີຂອງນາງສາວ.

ນາງສາວລາວທີ່ໄດ້ເຂົ້າຮອບ 20 ຄົນ ກໍ່ຈະໄດ້ເກັບໂຕເຮັດກິດຈະກຳຮ່ວມກັນເປັນເວລາ 19 ມື້ ທີ່ນະຄອນຫຼວງວຽງຈັນ, ເລີ່ມແຕ່ວັນທີ 05 ຫາ 23 ກັນຍາ 2016 ເພື່ອເຂົ້າປະກວດຮອບຕັດສິນໃນວັນທີ 24 ກັນຍາ 2016.
ຜູ້ທີ່ເຂົ້າສະໝັກໃນນະຄອນຫຼວງວຽງຈັນ ສາມາດຮັບໃບສະໝັກດ້ວຍຕົນເອງໄດ້ທີ່ ສະຖານີໂທລະພາບທີວີລາວ ແລະ ຕ່າງແຂວງສາມາດດາວໂຫລດແບບຟອມສະໝັກໄດ້ທີ່ Facebook page: Miss Laos ນາງສາວລາວ, ແລ້ວສົ່ງໃບສະໝັກຕາມວັນທີທີ່ລະບຸໄວ້ຂ້າງເທິງ.