ປະເທດລຸກຊຳບວກຢືນຢັນຈະເພີ່ມງົບປະມານຊ່ວຍເຫລືອ ສປປ ລາວປະມານ 60 ລ້ານ ເອີໂລເພື່ອນຳໃຊ້ເຂົ້າໃນວຽກງານສາທາລະນະສຸກ,ພັດທະນາຊົນນະບົດ, ການພັດທະນກາສຶກສາ ແລະ ການປົກຄອງຈົນເຖິງປີ 2020 ເຊິ່ງການປະກາດເຊື່ອເຫລືອຄັ້ງນີ້ໄດ້ມີຂຶ້ນໃນໂອກາດສະຫລອງວັນສ້າງຕັ້ງສາຍພົວພັນການທູດລະຫວ່າງລາວ ແລະ ລຸກຊຳບວກຄົບຮອບ 19 ປີ ໃນວັນທີ 22 ມິຖຸນາ ທີ່ນະຄອນຫຼວງວຽງຈັນ.
ເຊິ່ງໃນອານາຄົດແຜນງານຮ່ວມມືສະບັບທີ 4 ມີແນວໂນ້ມວ່າຈະເພີ່ມງົບປະມານ 60 ລ້ານ ເອີໂລເພື່ອນຳໃຊ້ໃນການປັບປຸງວຽກງານສາທາລະນະສຸກ,ພັດທະນາຊົນນະບົດ, ການສຶກສາວິຊາຊີບ ແລະ ການປົກຄອງຈົນເຖິງປີ 2020.
ທ່ານ ໂຣເບີດ ລໍເອີຣ, ເອກອັກຄະລະຊະທູດລຸກຊຳບວກປະຈຳບາງກອກ ພ້ອມ ທ່ານ ໂຄລດ ເຢີນເຊັນ,ອຸປະທູດລຸກຊໍາບວກ ປະຈຳ ສປປ ລາວໄດ້ຮ່ວມກັນຈັດງານລ້ຽງເພື່ອສະເຫລີມສະຫລອງວັນຊາດລຸກຊຳບວກ ແລະ ວັນສ້າງຕັ້ງສາຍພົວພັນການທູດລະຫວ່າງລຸກຊໍາບວກ ແລະ ສປປ ລາວ ໂດຍໃຫ້ກຽດເຂົ້າຮ່ວມຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ສປປ ລາວ, ທ່ານ ນາງ ແສງເດືອນ ຫຼ້າຈັນທະບູນ,ລັດຖະມົນຕີກະຊວງສຶກສາທິການ ແລະ ກິລາ, ບັນດາທູດຕານຸທູດ ແລະ ອົງການຈັດຕັ້ງສາກົນ.
ທ່ານ ໂຣເບີດ ລໍເອີຣ ໄດ້ກ່າວລະຫວ່າງພິທີສະຫລອງງານດັ່ງກ່າວວ່າ: ສປປ ລາວເປັນປະເທດຄູ່ຮ່ວມພັດທະນາ ກັບ ປະເທດລຸກຊຳບວກນັບຕັ້ງແຕ່ສອງຝ່າຍໄດ້ສ້າງຕັ້ງສາຍພົວພັນການທູດໃນປີ1997 ບົນເນື້ອໃນຈິດໃຈເພື່ອການຫລຸດຜ່ອນຄວາມທຸກຍາກ, ລັດຖະບານລຸກຊຳບວກໄດ້ໃຫ້ການຊ່ວຍເຫລືອ ແລະ ສະໜັບສະໜູນ ລັດຖະບານລາວໃນຫລາຍໂຄງການແນ່ໃສ່ເພື່ອໃຫ້ບັນລຸເປົ້າໝາຍສະຫະສະວັດດ້ານການພັດທະນາ ແລະ ເປົ້າໝາຍສູ້ຊົນຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020. ບັນດາການຊ່ວຍເຫລືອຈາກລັດຖະບານລຸກຊຳບວກແມ່ນຕິດພັນກັບນະໂຍບາຍ ແລະ ຍຸດທະສາດແຫ່ງຊາດ ອີງຕາມຂອບເຂດໜ້າວຽກຂອງແຜນພັດທະນາເສດ ຖະກິດ-ສັງຄົມແຫ່ງຊາດ. ສະນັ້ນການສະຫລອງວັນສ້າງຕັ້ງສາຍພົວພັນການທູດ ທີ່ນະຄອນຫລວງວຽງຈັນຄັ້ງນີ້ໄດ້ສະແດງໃຫ້ເຫັນຂີດໝາຍການພົວພັນແໜ້ນແຟ້ນລະຫວ່າງສອງປະເທດ, ໄລຍະຜ່ານມາການຮ່ວມມືສອງຝ່າຍໄດ້ມີຜົນສຳເລັດໃນຫລາຍດ້ານເປັນຕົ້ນສາທາລະນະສຸກ, ການສຶກສາ, ການພັດທະນາທ້ອງຖິ່ນ ແລະ ຊົນນະບົດ ເຊິ່ງບັນດາຜົນສຳເລັດເຫລົ່ານັ້ນແມ່ນຍ້ອນຄວາມເອົາໃຈໃສ່ຂອງບັນດາພາກສ່ວນທີ່ກ່ຽວຂ້ອງ, ແຕ່ເຖິງຢ້າງໃດກໍ່ຕາມ ບັນດາວຽກງານໃນຂະແໜງການດັ່ງກ່າວຍັງຕັອງສືບຕໍ່ພັດທະນາ. ທ່ານຍັງແຈ້ງໃຫ້ຮູ້ວ່າ ລັດຖະບານລຸກຊຳບວກຍັງຄົງມຸ້ງໜັ້ນໃຫ້ການຊ່ວຍເຫລືອສະໜັບສະໜູນ ສປປ ລາວ ໃນນັ້ນການຊ່ວຍເຫລືອດ້ານການພັດທະນາຈາກລຸກຊຳບວກທີ່ມີ ຕໍ່ ສປປ ລາວ ແມ່ນຈະເພີ່ມຂຶ້ນເປັນລຳດັບ.
5 ປີຜ່ານມາ, ລັດຖະບານລຸກຊຳບວກໄດ້ສະໜອງທຶນຫລາຍກ່ວາ 50 ລ້ານເອີໂລເພື່ອສະໜັບສະໜູນວຽກງານພັດທະນາໃນລາວ.
ທີ່ມາ: ສຳນັກຂ່າວສານປະເທດລາວ