ວັນທີ 22 ມິຖຸນາຜ່ານມາ ພະແນກແຜນການ-ການລົງທຶນ ແຂວງບໍລິຄຳໄຊສົມທົບກັບບໍລິ ສັດທີເຄກຼຸບ (TK GROUP) ຈຳກັດຜູ້ດຽວ ໄດ້ຈັດພິທີເຊັນບົດບັນທຶກຄວາມເຂົ້າໃຈສຶກສາຄວາມເປັນໄປໄດ້ພັດທະນາເຂດການຄ້າ ແລະບໍລິການຢູ່ເຂດບ້ານກ້ວຍອຸດົມ ເມືອງປາກຊັນ, ຊຶ່ງ ນອນຢູ່ໃນເຂດໂຄງການພັດທະນາເສດຖະກິດສົ້ນຂົວຂ້າມນ້ຳ ຂອງແຫ່ງທີ 5 ທີ່ແຂວງບໍລິຄຳໄຊ ໂດຍການເຊັນສັນຍາໃນຄັ້ງນີ້ ຕາງໜ້າໃຫ້ແຂວງບໍລິຄຳໄຊເຊັນ ໂດຍທ່ານ ສົນທອງ ວີບຸນກວ້າງ ຮອງຫົວໜ້າພະແນກແຜນການ-ການລົງທຶນແຂວງ ແລະບໍລິສັດເຊັນ ໂດຍທ່ານ ທັດນະຄອນ ທຳມະວົງ ປະທານບໍລິສັດທີເຄກຼຸບ (TK GROUP) ຈຳກັດຜູ້ດຽວ, ໂດຍມີຫົວຫນ້າພະແນກອຸດສາຫະກຳ ແລະການຄ້າ, ຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງ ແລະທີ່ປຶກສາຂອງບໍລິສັດເຊັນຮ່ວມເປັນສັກຂີພະຍານ ໂດຍຊ້ອງໜ້າ ທ່ານ ບຸນເສັງ ປະທຳມະວົງ ຮອງເຈົ້າແຂວງ-ແຂວງບໍລິຄຳໄຊ, ຫົວໜ້າພະແນກການທີ່ກ່ຽວຂ້ອງ, ພະນັກງານ, ວິຊາການທັງສອງຝ່າຍເຂົ້າຮ່ວມ.
ໂຄງການສຳຫຼວດສຶກສາຄວາມເປັນໄປໄດ້ພັດທະນາເຂດການຄ້າ ແລະ ບໍລິການຢູ່ເຂດບ້ານກ້ວຍອຸດົມ ເມືອງປາກຊັນ, ຊຶ່ງຢູ່ໃນເຂດໂຄງການພັດທະນາເສດຖະກິດສົ້ນຂົວຂ້າມນ້ຳຂອງແຫ່ງທີ່ 5 ຢູ່ແຂວງບໍລິຄຳໄຊ ແມ່ນນອນຢູ່ໃນ 6 ຈຸດຂອງແຜນພັດທະນາເສດຖະກິດ ສັງຄົມຂອງແຂວງ, ຊຶ່ງເຂດນີ້ແຂວງໄດ້ກຳນົດແຜນພັດທະນາໄວ້ເປັນ 3 ໂຊນ ຄື: ໂຊນອຸດສາຫະກຳປຸງແຕ່ງ, ໂຊນຂົນສົ່ງຜ່ານແດນແລະໂຊນການຄ້າ-ບໍລິການຜ່ານມາແຂວງແມ່ນໄດ້ເຊັນ MOU ໂຊນການຂົນສົ່ງຜ່ານແດນແລ້ວ ຢູ່ໃນຂັ້ນຕອນໄລ່ລຽງຄ່າຊົດເຊີຍ ປະຈຸ ບັນກໍ່ໄດ້ເຊັນ MOU ໂຊນການຄ້າ-ບໍ ລິການ ສະນັ້ນກໍ່ຖືວ່າຍັງແຕ່ໂຊນອຸດສາຫະກຳປຸງແຕ່ງທີ່ຈະໄດ້ສືບຕໍ່ໃນການຊອກຫາຜູ້ລົງທຶນເຂົ້າມາພັດທະນາ.
ການສຶກສາສຳຫຼວດຄວາມເປັນໄປໄດ້ໃນການພັດທະນາໂຊນການຄ້າ-ບໍລິການຂອງບໍລິສັດທີເຄກຼຸບ (TK GROUP) ຈຳກັດຜູ້ດຽວ ແມ່ນຕັ້ງຢູ່ເຂດບ້ານກ້ວຍອຸດົມ ເມືອງປາກຊັນ ແຂວງບໍລິຄຳໄຊ ຫ່າງຈາກນະຄອນຫຼວງວຽງຈັນ 140 ກິໂລແມັດ ແລະ ຫ່າງຈາກເທສະບານແຂວງປະມານ 13 ກິໂລແມັດ, ມີຂອບເຂດເນື້ອທີ່ປະມານ 74 ເຮັກຕາ ເພື່ອນຳໃຊ້ເຂົ້າໃນກິດຈະ ການຕ່າງໆເຊັ່ນ: ລະບົບສາງເກັບສິນຄ້າ ແລະການຂົນສົ່ງສິນຄ້າ, ຮ້ານຄ້າປອດພາສີ, ການເກັບຄ່າທຳນຽມ, ການໃຊ້ບໍລິການຂ້າມດ່ານໂດຍບຸກຄົນ ແລະ ພາຫະນະ, ໂຮງແຮມ, ຮ້ານອາຫານ ແລະການບໍລິການອື່ນໆທີ່ສອດຄ່ອງຕາມແຜນຍຸດທະສາດການພັດທະນາຂອງແຂວງ ແລະຖືກຕ້ອງຕາມລະບຽບກົດໝາຍຂອງ ສປປ ລາວ.
ບໍລິສັດ ທີເຄກຼຸບ (TK GROUP) ຈຳກັດຜູ້ດຽວ ເປັນຜູ້ລົງທຶນໃນການລົງສຳຫຼວດເກັບກຳຂໍ້ມູນທາງດ້ານເສດຖະກິດ-ສັງຄົມ, ຂຽນບົດວິພາກເສດຖະກິດ ແລະຄິດໄລ່ຜົນຕອບແທນທາງດ້ານເສດຖະກິດ ຖ້າມີຄວາມເປັນໄປໄດ້ບໍລິສັດດັ່ງກ່າວ ຈະສືບຕໍ່ລົງທືນພັດທະນາໃນການກໍ່ສ້າງຕໍ່ໄປ ໂດຍໄລຍະໃນການຈັດຕັ້ງປະຕິບັດ (MOU) ແມ່ນ 180 ວັນ.
ທີ່ມາ: 