ວັນທີ 21 ມີຖຸນາ 2016 ທີ່ຫ້ອງປະຊຸມ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ມີພິທີເຊັນສັນຍາສະໜອງທຶນໃຫ້ໂຄງການຍ່ອຍ 4 ໂຄງການ ລະຫວ່າງ ກອງທຶນປົກປັກຮັກສາສິ່ງແວດລ້ອມແລະຜູ້ຮັບທຶນ
ເປັນກຽດເຂົ້າຮ່ວມເປັນສັກຂີພະຍານ ໂດຍ ທ່ານ ບຸນມີ ພຸດທະວົງ, ຮອງລັດຖະມົນຕີ ກຊສ ມີຜູ້ຕາງໜ້າ ກົມຄຸ້ມແຜນການ ແລະ ການຮ່ວມມື, ກົມຄຸ້ມຄອງຊັບພະຍາກອນປ່າໄມ້, ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງ ບໍລິຄຳໄຊ ແລະ ຕາງໜ້າບັນດາພະແນກຕ່າງໆອ້ອມຂ້າງ ລວມທັງໝົດປະມານ 20 ທ່ານ.
ໃຫ້ກຽດລົງນາມເຊັນສັນຍາໂດຍ ທ່ານ ຄຳປະດິດ ຄໍາມູນເຮືອງ, ຜູ້ອຳນວຍການ ກອງທຶນປົກປັກຮັກສາສິ່ງແວດ ລ້ອມ (ຕາງໜ້າຜູ້ໃຫ້ທຶນ) ແລະ ໂຄງການຍ່ອຍ 4 ໂຄງການດັ່ງນີ້:
1. ໂຄງການ ສ້າງຄວາມເຂັ້ມແຂງໃຫ້ກົມແຜນການ ແລະ ການຮ່ວມມື, ກຊສ ໃນການວາງແຜນ ແລະ ປະສານງານໃນຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ” ລວມມູນຄ່າການຊ່ວຍເຫຼືອທັງໝົດ 498,000 ໂດລາສະຫະລັດ, ໄລຍະຈັດຕັ້ງປະຕິບັດໂຄງການ: ວັນທີ່ 01 ກໍລະກົດ 2015 – 31 ມີຖຸນາ 2020. ຈຸດປະສົງຂອງໂຄງການ ເພື່ອຈັດຕັ້ງປະຕິບັດ ແຜນການ 5 ປີ (2016-2020) ຂອງ ກຊສ ແລະ ປັບປຸງຄວາມສາມາດ ໃນການວາງແຜນ, ການຕິດຕາມກວດກາ ແລະ ການປະສານງານ ຂອງ ກົມແຜນການ ແລະ ການຮ່ວມມື.
2. ໂຄງການ ເສີມສ້າງຄວາມເຂັ້ມແຂງດ້ານສະຖາບັນເພື່ອຄຸ້ມຄອງປ່າສະຫງວນ ແລະ ປ່າປ້ອງກັນ, ອະນຸລັກສັດປ່າ ແລະ ເຮັດການທົບທວນກຳນົດເຂດແດນ 3 ປະເພດປ່າໄມ້ຄືນໃໝ່” ລວມມູນຄ່າການຊ່ວຍເຫຼືອທັງໝົດ 900,000 ໂດລາສະຫະລັດ, ໄລຍະຈັດຕັ້ງປະຕິບັດໂຄງການ: ວັນທີ 21 ມີຖຸນາ 2016 – 30 ມີຖຸນາ 2018. ຈຸດປະສົງ ເພື່ອທົບທວນ ແລະ ກໍານົດເຂດແດນ 3 ປະເພດປ່າຄືນໃໝ່ ຕາມຄວາມເໝາະສົມ ເພື່ອພັດທະນາ ແລະ ສະເໜີ ແຜນແມ່ບົດ ພື້ນທີ່ 3 ປະເພດປ່າໄມ້.
3. ໂຄງການຄວາມສາມາດດ້ານການສຶກສາການປົກປ້ອງສັງຄົມໃຫ້ແກ່ຄະນະວິທະຍາສາດສັງຄົມ, ມະຫາວິທະຍາໄລແຫ່ງຊາດ” ລວມມູນຄ່າການຊ່ວຍເຫຼືອທັງໝົດ 740,000 ໂດລາສະຫະລັດ ໄລຍະຈັດຕັ້ງປະຕິບັດໂຄງການ: ວັນທີ 01 ກໍລະກົດ 2016-30 ທັນວາ 2020. ຈຸດປະສົງ ເພື່ອພັດທະນາຊັບພະຍາກອນມະນຸດທີ່ມີຄຸນນະພາບ ໂດຍຜ່ານການສ້າງຄວາມເຂັ້ມແຂງໃຫ້ແກ່ຄະນະວິທະຍາສາດ ສັງຄົມ ມະຫາວິທະຍາໄລແຫ່ງຊາດ ໃນການປັບປຸງຫລັກສູດຝຶກອົບຮົມ ແລະ ການຄົ້ນຄ້ວາກ່ຽວກັບນະໂຍບາຍການປົກປ້ອງສັງຄົມ, ການປະເມີນຜົນກະທົບຕໍ່ສັງຄົມ ແລະ ການຄຸ້ມຄອງການຍົກຍ້າຍຈັດສັນ.
4. ໂຄງການຄຸ້ມຄອງປ່າສະຫງວນຫ້ວຍງົວ” ລວມມູນຄ່າການຊ່ວຍເຫຼືອທັງໝົດ 79,997 ໂດລາສະຫະລັດ, ໄລຍະຈັດຕັ້ງປະຕິບັດໂຄງການ: ວັນທີ 21 ມີຖຸນາ 2016 – 21 ມີຖຸນາ 2019. ຈຸດປະສົງເພື່ອສ້າງຄວາມເປັນເຈົ້າການຂອງຊຸມຊົນບ້ານອ້ອມຂ້າງປ່າສະຫງວນຫ້ວຍງົວໃນການສະກັດກັ້ນການທໍາລາຍປ່າສະຫງວນຫ້ວຍງົວ ລວມທງການຟື້ນຟູປ່າສະຫງວນຫ້ວຍງົວ ໃຫ້ດີຂື້ນ.
ທີ່ມາ: ສຳນັກຂ່າວສານປະເທດລາວ