ງານມະຫະກຳການທ່ອງທ່ຽວແບບອະນຸຮັກອາຊຽນຄັ້ງປະຫວັດສາດ ກໍຄືຄັ້ງທີ່ມີຄວາມໝາຍຄວາມສຳຄັນຂອງ ສປປ ລາວ ໂດຍສະເພາະແມ່ນຂະແໜງການທ່ອງທ່ຽວຂອງແຂວງຈຳປາສັກເຂດດິນແດນແຫ່ງມົນສະເໜ່ທຳມະຊາດ ໄດ້ເປີດຂຶ້ນຢ່າງເປັນທາງການທ່າມກາງຄວາມສົນໃຈຈາກພາກທຸລະກິດລັດ, ເອກະຊົນໃນຂະແໜງການທ່ອງທ່ຽວ ແລະທຸລະກິດທີ່ກ່ຽວພັນກັບການບໍລິການທ່ອງທ່ຽວຂອງບັນດາສະມາຊິກອາຊຽນເຂົ້າຮ່ວມວາງສະແດງ 80 ກວ່າຮ້ານ.
ພິທີເປີດງານມະຫະກຳການທ່ອງທ່ຽວແບບອະນຸຮັກອາຊຽນປີ 2016 ໄດ້ຈັດຂຶ້ນໃນຕອນເຊົ້າຂອງວັນທີ 22 ມິຖຸນາຜ່ານມານີ້, ທີ່ໂຮງແຮມຈຳປາສັກແກຣນ ເມືອງປາກເຊ ແຂວງຈຳປາສັກ, ໂດຍການເຂົ້າຮ່ວມເປັນປະທານຂອງທ່ານ ບໍ່ແສງຄຳ ວົງດາຣາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ທ່ານ ລິມ ຮົງຮິນ ຮອງເລາຂາທິການໃຫຍ່ອາຊຽນ, ທ່ານ ຊູຈິງ ຫົວໜ້າຄະນະກຳມາທິການພາກພື້ນອາຊີ-ປາຊິຟິກ, ອົງການທ່ອງທ່ຽວໂລກ, ມີບັນດາລັດຖະມົນຕີ, ຮອງລັດຖະມົນຕີການທ່ອງທ່ຽວ, ຜູ້ຕາງໜ້າຂອງປະເທດອາຊຽນ ພ້ອມດ້ວຍບັນດາທ່ານແຂກຜູ້ໃຫຍ່ທີ່ກ່ຽວຂ້ອງ, ບັນດານັກທຸລະກິດຈາກພາກລັດ ແລະພາກເອກະຊົນອາຊຽນເຂົ້າຮ່ວມ.
ທັງນີ້ ແມ່ນໜຶ່ງໃນບັນດາກອງປະຊຸມ ແລະກິດຈະກຳທີ່ສຳຄັນພາຍໃຕ້ເສົາຄ້ຳ ເສດຖະກິດອາຊຽນ, ໃນໄລຍະ ສປປ ລາວ ເປັນປະທານອາຊຽນ, ຊຶ່ງຈັດໂດຍກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພາຍໃຕ້ຫົວຂໍ້ “ອາຊຽນປາສະຈາກພົມແດນ, ແນວທາງຍຸດທະສາດທີ່ກ້າວໄປສູ່ການທ່ອງທ່ຽວອະນຸຮັກ ແລະເຊື່ອມໂຍງເສັ້ນທາງທ່ອງທ່ຽວ” ຈຸດປະສົງແມ່ນເພື່ອປຶກສາຫາລື ແລະ ຊອກຫາແນວທາງນຳໃຊ້ຊັບພະຍາກອນ ທຳມະຊາດໃຫ້ມີຄວາມຢືນຍົງ, ນຳເອົາຜົນປະໂຫຍດທາງດ້ານເສດຖະກິດໃຫ້ແກ່ປະຊາຊົນໃນທ້ອງຖີ່ນ, ໃນເຂດຊົນນະບົດເພື່ອເສີມຂະຫຍາຍເຄືອຂ່າຍການພັດທະນາການທ່ອງທ່ຽວອະນຸຮັກໃຫ້ເຊື່ອມໂຍງກັບເສັ້ນທາງພາກໃນອະນຸພາກພື້ນ.
ທ່ານ ບຸນຖອງ ດີວິໄຊ ກ່າວວ່າ: ແຂວງຈຳປາສັກມີຄວາມສົມບູນທາງດ້ານການທ່ອງທ່ຽວທາງປະຫວັດສາດ, ທຳມະຊາດ ແລະວັດທະນະທຳເຖິງ 2016 ແຫ່ງ, ແຫຼ່ງທ່ອງທ່ຽວທີ່ມີຊື່ສຽງໃນລະດັບພາກພື້ນ ແລະສາກົນ ແມ່ນມໍລະດົກ ໂລກວັດພູຈຳປາສັກ, ນ້ຳຕົກຕາດຄອນພະເພັງ, ບັນດາເກາະດອນນ້ອຍໃຫຍ່ສະ ຫຼັບຊັບຊ້ອນຢັງຢາຍຕາມລຳແມ່ນ້ຳຂອງ ເຖິງ 4000 ພັນດອນ, ຈົນໄດ້ຮັບຂະໜາມນາມວ່າ “ມະຫະນາທີສີພັນດອນ ຫຼື ໄຂ່ມຸກແຫ່ງແມ່ນ້ຳຂອງ” ສະນັ້ນ ການຈັດງານມະຫະກຳການທ່ອງທ່ຽວອະນຸຮັກອາຊຽນຄັ້ງນີ້ ຈະເປັນໂອກາດອັນດີໃຫ້ແຂວງຈຳປາສັກໄດ້ປັບປຸງ ແລະພັດທະນາວຽກງານທ່ອງທ່ຽວ-ແຫຼ່ງທ່ອງທ່ຽວ ແລະສິ່ງຮອງຮັບເພື່ອອຳນວຍ ຄວາມສະດວກໃຫ້ແກ່ການທ່ອງທ່ຽວ, ການສົ່ງເສີມການມີສ່ວນຮ່ວມຂອງຊຸມຊົນ ແລະຜູ້ປະກອບການເຂົ້າໃນການພັດທະນາການທ່ອງທ່ຽວ, ດ້ວຍການຈັດງານມະຫະກຳການທ່ອງທ່ອງທ່ຽວດ້ານຕ່າງໆທີ່ເໝາະສົມ ແລະດີຂຶ້ນເປັນກ້າວໆ.
ທ່ານ ບໍ່ແສງຄຳ ວົງດາຣາ ກ່າວວ່າ: ກະຊວງຮູ້ສຶກເປັນກຽດຢ່າງຍິ່ງທີ່ໄດ້ເປັນເຈົ້າພາບຈັດງານຄັ້ງທີ I ເທື່ອນີ້, ນັບຕັ້ງແຕ່ການສ້າງຕັ້ງເປັນປະຊາຄົມເສດຖະກິດອາຊຽນ, ສປປ ລາວ ເປັນປະທານອາຊຽນໃນປີ 2016 ຈະສືບຕໍ່ມຸ່ງມາດປາຖະໜາຂອງອາຊຽນພາຍໃຕ້ຫົວຂໍ້ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ຊຶ່ງເຫັນວ່າໂອກາດທີ່ເໝາະສົມສຳລັບປະເທດອາຊຽນ ເພື່ອຮ່ວມມືກັນຢ່າງໃກ້ຊິດໃນບັນລຸວິໄສທັດໃໝ່ຂອງອາຊຽນ 2025 ແລະແຜນຍຸດທະສາດ ການທ່ອງທ່ຽວ 2016-2025 , ຊຶ່ງເມື່ອຮອດປີ 2025 ອາຊຽນຈະເປັນຈຸດໝາຍປາຍທາງການທ່ອງທ່ຽວທີ່ມີຄຸນນະພາບ, ໂດຍມີເອກະລັກ, ມີປະສົບການອາຊຽນທີ່ຫຼາກຫຼາຍ ແລະຈະໄດ້ປະຕິບັດຕາມພາລະໜ້າທີ່ໃນການພັດທະນາການທ່ອງທ່ຽວແບບມີຄວາມຮັບຜິດຊອບ, ມີຄວາມຢຶນຍົງ, ແບບມີສ່ວນຮ່ວມ ແລະມີຄວາມສົມດຸນ, ເພື່ອປະກອບສ່ວນສຳຄັນເຂົ້າໃນການສ້າງຄວາມຢູ່ດີກິນດີ ດ້ານເສດຖະກິດ-ສັງຄົມຂອງປະຊາຊົນອາຊຽນ.
ທີ່ມາ: 