ການກໍ່ສ້າງພະທາດສີພູມ ຢູ່ທີ່ເມືອງຊຽງຄານໃນລາດສະການເຈົ້າ ສຸວັນນະບັນລັງ (ແທ່ນຄຳ) ພຣະເຈົ້າແທ່ນຄຳ ຂຶ້ນຄອງລາດຊະສົມບັດນະຄອນຊຽງທອງແທນພຣະລາດຊະບິດາໃນ ຄສ 1487 ຖວາຍນາມວ່າ ພຣະເຈົ້າສຸວັນນະບັນລັງ ໃນໄລຍະຄອງລາດຢູ່ ພຣະອົງໄດ້ມີບັນຊາໃຫ້ສ້າງ ພຣະທາດສີພູມ ຂຶ້ນທີ່ເມືອງຊະນະຄາມ ເພື່ອແຖມສົມພານແດ່ພຣະບິດາ ແລະ ໃຫ້ຊາວເມືອງໄດ້ສັກກາ ລະບູຊາ.
ທາດນີ້ຕັ້ງຢູ່ວັດສິພູມ ບ້ານສີພູມ ເທດສະບານເມືອງຊະນະສົງຄາມ (ຊະນະຄາມ) ມີລວງສູງ 21,50 ແມັດ, ໃນເວລາທີ່ກໍ່ສ້າງພະທາດສີພູມຢູ່ນັ້ນ ໄດ້ມີພຣະຄູໃຫຍ່ສິງທອງ ຊ່ຽວຊານດ້ານສາສະໜາ ລົງມາແຕ່ເມືອງຈຸງເອົາເງິນຄຳຕ່າງໆໃສ່ມາພ້ອມທັງເຄື່ອງຄ້ຳຂອງຄູນຈຳນວນໜຶ່ງ ແລະ ແກ້ວສະເດັດ ປ່ອນໃສ່ບີສິມພຣະທາດ ເພື່ອແຖມສົມພານເຈົ້າໄຊຍະຈັກພັດແຜ່ນແຜ້ວ.
ເມື່ອສ້າງສຳເລັດແລ້ວ ກໍ່ກິນທານສະຫຼອງຢ່າງຄຶ້ກຄື້ນຕາມຮີດຄອງປະເພນີ ແລະ ໄດ້ຂະໜານນາມວ່າມາດສີພູມ (ນາມໂອລົດຂອງພະເຈົ້າສຸວັນນະບັນລັງ) ຜູ້ນຳພາສ້າງພຣະທາດສີພູມ ແມ່ນທະຫານເອກຂອງພຣະອົງຊື່ວ່າ ຈຳປາ ໄດ້ສ້າງຂຶ້ນໃນມື້ 7 ຄ່ຳເດືອນ 9 ປີ ຮ່ວງເຈົ້າ ຈສ 842 (ແຕ່ຈາລຶກໄວ້ໃນພະພຸດທະຮູບຟອກເງິນຟອກຄຳທີ່ຂຸດຄົ້ນໃນບໍລິເວນອ້ອມພະທາດໃນ ຈສ 839) ແລະ ໄດ້ຫົດສົງບູຊາຈາກລຸ້ນສູ່ລຸ້ນ ຈົນເຖິງທຸກວັນນີ້.
ຮຽບຮຽງຂໍ້ມູນຈາກປຶ້ມພູມປັນຍາທ້ອງຖິ່ນ.
ໂດຍ: ນັກຂ່າວເສດຖະກິດ-ການຄ້າ.
ຮູບປະກອບຈາກ ຊາວເມືອງຊະນະຄາມ