ກະຊວງໂຍທາທິການ ແລະ ຂົນສົ່ງ ໄດ້ດຳເນີນການປັບປຸງສ້ອມແປງ ເສັ້ນທາງ ໜອງບຶກ-ໜອງພະຍາ-ຕານມີໄຊ ເພື່ອໃຫ້ປະຊາຊົນ ກໍຄື ຜູ້ນຳໃຊ້ລົດໃຊ້ຖະໜົນ ໄດ້ສັນຈອນໄປມາສະດວກສະບາຍຂຶ້ນກວ່າເກົ່າ. ເພື່ອລໍຖ້າລັດຖະບານຄົ້ນຄວ້າພິຈາລະນາອະນຸມັດໃຫ້ມີການກໍ່ສ້າງເສັ້ນທາງດັ່ງກ່າວ ໃຫ້ມີມາດຕະຖານໃນອະນາຄົດອັນໃກ້ນີ້.
ກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: ຕາມແຜນການຂອງລັດຖະບານ ໃນເບື້ອງຕົ້ນແມ່ນໂຄງການດຽວກັນ ກັບໂຄງການກໍ່ສ້າງທາງ ແຕ່ສີ່ແຍກໄຟອຳນາດດົງໂດກ (ທາງ13 ໃຕ້) ຫາສາມແຍກສີເກີດໜອງບຶກ (ເສັ້ນທາງ 13 ເໜືອ) ແຕ່ດ້ວຍເຫດຜົນທາງດ້ານງົບປະມານ ຈຶ່ງບໍ່ສາມາດດຳເນີນການ
ໄດ້ຕາມແຜນ, ມີພຽງການກໍ່ສ້າງໂຄງການໄລຍະ 1 ແຕ່ສີ່ແຍກໄຟອຳນາດດົງໂດກ ຫາ ສີ່ແຍກໄຟອຳນາດຕານມີໄຊ ມີຄວາມຍາວເກືອບ 3 ກິໂລແມັດ. ສ່ວນທີ່ເຫລືອແຕ່ສີ່ແຍກໄຟອຳນາດຕານມີໄຊ ຫາສາມແຍກໜອງບຶກ ໃນແຕ່ລະປີກໍມີການປັບປຸງສ້ອມແປງ ຫລັງຈາກລະດູຝົນໄດ້ສິ້ນສຸດລົງ, ແຕ່ໃນປີນີ້ ເສັ້ນທາງສາຍນີ້ໄດ້ມີການເປ່ເພໜັກກວ່າທຸກປີ ຍ້ອນມີພາຫະນະທຽວຫລາຍຂຶ້ນ ອັນໄດ້ສ້າງຄວາມຫຍຸ້ງ ຍາກໃຫ້ປະຊາຊົນ ທັງເກີດມີຫາງສຽງຈົ່ມວ່າຕະຫລອດມາ.
ການສ້ອມແປງຄັ້ງນີ້ ຈະຊ່ວຍໃຫ້ການສັນຈອນໄປມາໄດ້ສະດວກຂຶ້ນກວ່າເກົ່າ, ພ້ອມຮຽກຮ້ອງເຖິງຜູ້ໃຊ້ລົດ ໃຊ້ຖະໜົນໃຫ້ຂັບຂີ່ດ້ວຍຄວາມລະມັດລະວັງຄ່ອຍໄປຄ່ອຍມາ ແລະ ຂໍໃຫ້ປະຊາຊົນ ຈົ່ງອົດໃຈລໍ, ເນື່ອງຈາກລັດຖະບານ ພວມຄົ້ນຄວ້າຫາແຫລ່ງທຶນມາກໍ່ສ້າງເສັ້ນທາງດັ່ງກ່າວໃຫ້ມີມາດຕະຖານດີ.
ທີ່ມາ: ລາວພັດທະນາ