ທ່ານ ສີສະຫວາດ ພະນັດດາ ຫົວໜ້າຂະແໜງອະນາໄມ ແລະ ສົ່ງເສີມສຸຂະພາບທີ່ຂຶ້ນກັບພະແນກສາທາລະນະສຸກແຂວງຄຳມ່ວນ ໃຫ້ຮູ້ວ່າ: ກ່ຽວກັບການຕ້ານ ແລະປ້ອງກັນພະຍາດທີ່ຈະ ເກີດຂຶ້ນໃນຊ່ວງໄລຍະລະດູຝົນນີ້ ເພື່ອປ້ອງກັນພະຍາດທີ່ມັກເກີດຕາມລະດູການພະແນກສາທາລະນະສຸກແຂວງກໍຄືພາກ ສ່ວນກ່ຽວຂ້ອງ ແມ່ນໄດ້ເລີ່ມປະຕິບັດຕໍ່ມາດຕະການ ໂດຍສະເພາະກໍແມ່ນໄດ້ອອກຄຳສັ່ງແນະນຳຂອງທ່ານຫົວໜ້າພະແນກສາທາລະນະສຸກ, ຫ້ອງການສາທາລະນະສຸກເມືອງ, ກະກຽມອຸປະກອນ, ເຄື່ອງຟົ່ນຢາ, ຊາຍອາເບດ ແລະສື່ໂຄສະນາຕ່າງໆ, ແຕ່ງຕັ້ງທີມງານຕອບໂຕ້ ໄວລົງປະຈຳແຕ່ລະຈຸດຂອງບ້ານທີ່ມີ ຄວາມສ່ຽງເພື່ອຟົ່ນຢາຂ້າຍຸງລາຍ, ພ້ອມທັງໂຄສະນາອະທິບາຍໃຫ້ພໍ່ແມ່ປະຊາຊົນໄດ້ເຂົ້າໃຈເຖິງພະຍາດໄຂ້ຍຸງລາຍສ່ວນເບື້ອງປິ່ນປົວແມ່ນໄດ້ສຳເລັດການອົບຮົມ ໃຫ້ແກ່ພະນັກງານແພດໝໍຂັ້ນແຂວງ, ຂັ້ນເມືອງ.
ສະເພາະແຂວງຄຳມ່ວນມາຮອດປະຈຸບັນມີພະຍາດໄຂ້ຍຸງເກີດຂຶ້ນ 41 ກໍລະນີ, ເກີດຂຶ້ນຫຼາຍກວ່າໝູ່ແມ່ນເຂດເມືອງຫີນບູນ ແລະເມືອງທ່າແຂກຕໍ່ກັບສະພາບການດັ່ງກ່າວພວກເຮົາແມ່ນໄດ້ແຕ່ງຕັ້ງທີມງານຕອບໂຕ້ໄວລົງປະຈຳການ ເປັນທີ່ຮຽບຮ້ອຍແລ້ວ.
ສ່ວນພະຍາດອື່ນໆເຊັ່ນ: ພະຍາດຖອກທ້ອງ, ເບື່ອອາຫານແມ່ນຢູ່ໃນເກນປົກກະຕິ ມາຮອດປະຈຸບັນພະຍາດໄຂ້ຍຸງລາຍແມ່ນມີທ່າອຽງຈະລະບາດຍ້ອນຖືກຮອບວຽນຂອງພະຍາດໄຂ້ຍຸງ.
ທ່ານ ສີສະຫວາດ ຍັງໄດ້ຮຽກຮ້ອງມາຍັງພໍ່ແມ່ປະຊາຊົນຈົ່ງເປັນເຈົ້າການໃນການຕ້ານພະຍາດໄຂ້ຍຸງລາຍ ດ້ວຍການອະນາໄມຂອບເຂດເຮືອນຂອງຕົນຕາມປ່າຮົກເຮື້ອ ແລະເປັນເຈົ້າການປະຕິບັດ 5 ປ ໃນການປາບປາມ, ໄຂ້ຍຸງລາຍ ສ່ວນຜູ້ທີ່ສົງໄສວ່າຕົນເປັນໄຂ້ຍຸງລາຍແມ່ນໃຫ້ຮີບພາກັນມາປິ່ນປົວຢູ່ໂຮງໝໍ ຫຼີກລຽງການຊື້ຢາມາກິນເອງ ແລະປິ່ນປົວຕາມຄລີນິກເພື່ອເຮັດແນວ ໃດຄົນເຈັບຈະໄດ້ຮັບການບົ່ງມະຕິ ແລະ ປິ່ນປົວໄດ້ທັນກັບສະພາບການ.
ທີ່ມາ: 