ໃນວັນທີ 16 ມິຖຸນາ 2016 ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະໄດ້ເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງອັດຕະປື, ໂດຍໄດ້ພົບປະໂອ້ລົມພະນັກງານການນຳ, ພະນັກງານຫຼັກແຫຼ່ງພາຍໃນແຂວງເພື່ອທົບທວນຄວາມເຂົ້າໃຈຕື່ມກ່ຽວກັບແນວທາງປ່ຽນແປງໃໝ່ຂອງພັກລັດ ໂດຍສະເພາະ ແມ່ນແຜນການສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະການຈັດຕັ້ງປະຕິບັດມະຕິຄຳສັ່ງເລກທີ 15/ນຍ, ລົງ ວັນທີ 13 ພຶດສະພາ 2016 ໃຫ້ກ້າວໄປສູ່ຄຸນນະພາບໃໝ່ທີ່ມີຄວາມເຂັ້ມແຂງ, ເດັດຂາດ, ຮັບປະກັນການຄຸ້ມຄອງລັດໃນລະດັບທ້ອງຖິ່ນໃຫ້ເກີດປະສິດທິຜົນ ແລະມີຜົນປະໂຫຍດເພື່ອປະຊາຊົນຢ່າງແທ້ຈິງ.
ໃນການເດີນທາງມາເຮັດວຽກຢູ່ແຂວງອັດຕະປືຄັ້ງນີ້ພາຍຫຼັງທີ່ທ່ານ ທອງລຸນ ສີສຸລິດ ພ້ອມຄະນະສຳເລັດການຢ້ຽມຢາມໂຄງການລົງທຶນຂອງຕ່າງປະເທດເຊັ່ນ: ບໍລິສັດ ໂຮງງານປຸງແຕ່ງໄມ້ສຳເລັດຮູບ ຫຼັກ 18 ແລະໄປຢ້ຽມຢາມແຫຼ່ງທ່ອງທ່ຽວທາງດ້ານວັດທະນະທຳ (ວັດທາດພະເຈົ້າໄຊຍະເສດຖາທິລາດ) ທີ່ເມືອງໄຊເສດຖາແລ້ວ ຈາກນັ້ນ ພ້ອມຄະນະຂອງທ່ານໄດ້ເຂົ້າພົບປະໂອ້ລົມພະນັກງານຫຼັກແຫຼ່ງ ແລະພະນັກງານສະມາຊິກພັກ ທີ່ຫໍປະຊຸມໃຫຍ່ຂອງແຂວງ ຊຶ່ງກ່ອນອື່ນທ່ານໄດ້ຮັບຟັງການລາຍງານໂດຍຫຍໍ້ຈາກ ທ່ານ ນາມ ວິຍະເກດ ເຈົ້າແຂວງໆອັດຕະປື ກ່ຽວກັບສະພາບການພັດທະນາເສດຖະກິດສັງຄົມຂອງແຂວງ ໃຫ້ແກ່ຄະນະຂອງທ່ານນາຍົກລັດຖະມົນຕີໄດ້ຮັບຊາບ ຊຶ່ງສະພາບໂດຍລວມໃນຕະຫຼອດໄລຍະທີ່ຜ່ານມາເຫັນວ່າ ພາຍໃນແຂວງອັດຕະປື ມີສະຖຽນລະພາບໜັກແໜ້ນທາງດ້ານການເມືອງ, ສັງຄົມມີຄວາມສະຫງົບ, ປອດໄພໂດຍພື້ນຖານ ພະນັກງານສະມາຊິກພັກ, ກຳລັງປະກອບ ອາວຸດຕະຫຼອດຮອດປະຊາຊົນບັນດາເຜົ່າມີຄວາມເຊື່ອໝັ້ນຕໍ່ການນຳພາຂອງພັກ, ການພັດທະນາເສດຖະກິດສັງຄົມຂອງແຂວງສືບຕໍ່ຂະຫຍາຍຕົວຢ່າງຕໍ່ເນື່ອງ, ການຜະລິດເປັນສິນຄ້າຂອງປະຊາຊົນເຫັນວ່າ ມີບັນຍາກາດດີ, ຊີວິດການເປັນຢູ່ຂອງປະຊາ ຊົນມີການຫັນປ່ຽນຢ່າງຈະແຈ້ງອັດຕາ ຄວາມທຸກຍາກຂອງປະຊາຊົນຫຼຸດລົງ ເທື່ອລະກ້າວ.
ໃນໂອກາດດັ່ງກ່າວ ທ່ານນາຍົກລັດຖະມົນຕີໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດທີ່ທາງອົງຄະນະພັກແຂວງສາມາດຍາດມາໄດ້ໃນຕະຫຼອດໄລຍະທີ່ຜ່ານມາ ພ້ອມນີ້ທ່ານກໍຍັງໄດ້ເນັ້ນໃນບາງຂົງເຂດວຽກງານທີ່ຈະຕ້ອງໄດ້ເອົາໃຈໃສ່. ໃນນັ້ນ ທ່ານໄດ້ຍົກໃຫ້ເຫັນເຖິງວຽກງານວັດທະນະທຳສັງຄົມໃຫ້ພໍ່ແມ່ປະຊາຊົນຮັກສາມູນເຊື້ອຮີດຄອງປະເພນີອັນດີງາມ, ຮັກສາມູນ ເຊື້ອຄວາມດຸໝັ່ນ, ຫັນປ່ຽນວິຖີທາງດຳ ລົງຊີວິດແກ້ໄຂຄວາມທຸກຍາກຂອງພໍ່ແມ່ປະຊາຊົນໃຫ້ດີຂຶ້ນກວ່າເກົ່າ, ຂົງເຂດເສດຖະກິດແມ່ນໃຫ້ເອົາໃຈໃສ່ເພີ່ມທະວີສູ້ຊົນ ຊອກແຫຼ່ງລາຍຮັບ, ການເກັບພາສີອາກອນເຂົ້າງົບປະມານຂອງລັດໃຫ້ບັນລຸຕາມແຜນການ, ການຄຸ້ມຄອງລາຍຈ່າຍ ແລະການເບີກຈ່າຍເງິນເດືອນໃຫ້ພະນັກ ງານຕ້ອງທ່ວງທັນກັບເວລາຢ່າງເຂັ້ມງວດ, ຄຽງຄູ່ກັນນັ້ນກໍໃຫ້ເອົາໃຈໃສ່ເພີ່ມທະວີວຽກງານປ້ອງກັນຊາດປ້ອງກັນຄວາມສະຫງົບເອົາໃຈໃສ່ບັນຫາການລັກລອບຕັດໄມ້ ແລະການສົ່ງອອກໄມ້ທີ່ບໍ່ຖືກຕ້ອງຕາມລະບຽບກົດໝາຍ.
ທ່ານນາຍົກໄດ້ຢ້ຳຄືນໃຫ້ພະນັກງານ ການນຳຂອງແຂວງອັດຕະປືຕ້ອງໃຫ້ເອົາ ໃຈໃສ່ຕໍ່ການຕິດຕາມກວດກາການຈັດຕັ້ງປະຕິບັດຄຳສັ່ງເລກທີ 15/ນຍ, ລົງ ວັນທີ 13 ພຶດສະພາ 2016 ຫ້າມບໍ່ໃຫ້ ອະນຸຍາດເຄື່ອນຍ້າຍໄມ້ທ່ອນຢູ່ສະໜາມ 1, ສະໜາມ 2 ຫຼື ໄມ້ຕີຕັບ, ໄມ້ແປຮູບທີ່ທາງໂຮງງານໄດ້ປຸງແຕ່ງໃນທົ່ວແຂວງ ສົ່ງອອກຢາງເດັດຂາດ, ລັດຖະບານໄດ້ ແຕ່ງຕັ້ງຄະນະສະເພາະກິດສົມທົບກັບ ແຂວງ ເພື່ອຕິດຕາມກວດກາ ແລະເຄັ່ງ ຄັດບໍ່ໃຫ້ບຸກຄົນພາຍນອກລັກລອບເຂົ້າມາຊື້ຈ້າງ, ຈອບອອຍພະນັກງານ ຫຼື ປະຊາຊົນ ກໍລະນີພົບເຫັນພະນັກງານ, ເຈົ້າໜ້າທີ່ ຫຼື ທຸກພາກສ່ວນຖ້າມີການລະເມີດການລັກລອບໄມ້ບໍ່ຖືກຕ້ອງແມ່ນໃຫ້ຢຶດເປັນຂອງລັດ ແລະຈັດຕັ້ງປະຕິບັດຕາມຂັ້ນຕອນຂອງລະບຽບກົດໝາຍ.
ທີ່ມາ: 