ພາຍຫຼັງເຈົ້າໜ້າທີ່ ກອງບັນຊາການ ປກສ ເມືອງທຸລະຄົມ ແຂວງວຽງຈັນ ໄດ້ຮັບແຈ້ງຄວາມຈາກບໍລິສັດມາລີນີ ໃນຄັ້ງວັນທີ 3 ມິຖຸນາ 2016 ວ່າ: ໃນຄ່ຳຄືນຂອງວັນທີ 2-3 ມິຖຸນາ 2016 ນີ້ມີຄົນບໍ່ດີບໍ່ຊາບຈຳນວນງັດປະຕູຫ້ອງການຂອງບໍລິສັດຕົນຈາກນັ້ນເຈົ້າໜ້າທີ່ກອງບັນຊາການ ປກສ ເມືອງທຸລະຄົມ ຈິ່ງຂຶ້ນບັນຊີເປົ້າໝາຍ, ລົງຕິດຕາມ ແລະເລັ່ງຈັບຕົວເປົ້າໝາຍໃຊ້ເວລາ 1 ວັນ ໃນທີສຸດກໍສາມາດຈັບຕົວເປົ້າໝາຍໄດ້ 2 ຄົນຄື: ທ້າວ ຄວາຍ ອາຍຸ 30 ປີ ກຳມະກອນ ແລະທ້າວ ລຸນ ອາຍຸ 38 ປີ ກຳມະກອນຢູ່ບ້ານເກິນໃຕ້ເມືອງທຸລະຄົມ ໃນຄັ້ງວັນທີ 4 ມິຖຸນາ 2016 ຜ່ານມາ ໃນຂໍ້ຫາລັກຊັບຂອງລວມໝູ່.
ຜ່ານການສືບສວນ-ສອບສວນຂອງເຈົ້າໜ້າທີ່ທ້າວຄວາຍໄດ້ໃຫ້ການວ່າ: ໃນເບື້ອງຕົ້ນເວລາປະມານ 24 ໂມງ ຂອງຄືນວັນທີ 2 ຫາວັນທີ 3 ມິຖຸນາ ປີ 2016 ນີ້ ຕົນເອງກັບທ້າວ ລຸນ ຢູ່ ບ້ານດຽວກັນ ໄດ້ພາກັນໄປຊື້ຢາບ້າຈຳ ນວນ 2 ເມັດ ລາຄາ 40 ພັນກີບ ນຳຄົນຢູ່ບ້າດຽວກັນມາເສບ ຫຼັງຈາກນັ້ນຕົນ ເອງ ກໍໄດ້ຊວນ ທ້າວ ລຸນ ໄປຍ່າງເລາະຫຼີ້ນຕາມທາງແຄມນ້ຳງຶ່ມ ເມື່ອຍ່າງໄປຮອດຫ້ອງການບໍລິສັດມາລີນີ ບ້ານເກິນ ກາງ ຕົນເອງກັບທ້າວ ລຸນ ຈິ່ງປີນຮົ້ວກຳ ແພງເຂົ້າໄປໃນບໍລິເວນຫ້ອງການຂອງບໍລິສັດ ແລ້ວຍ່າງເລາະເບິ່ງ ເພື່ອຊອກຫາ ລັກເຄື່ອງຂອງຕ່າງໆເມື່ອແນມເຫັນ ປ້ຳລົມທີ່ຕັ້ງຢູຄອກລົດ ຕົນເອງຈິ່ງຊວນ ທ້າວລຸນໄປຫາມຊ່ວຍ ແຕ່ຍົກບໍ່ຂຶ້ນ ຈິ່ງໄດ້ຈັບເອົາເຫຼັກປ້ອງອ້ອຍຍາວປະມານ 30 ຊັງຕີແມັດ ໄປງັດປະຕູເຂົ້າໄປໃນຫ້ອງການບໍລິສັດ ແລ້ວຈັບເອົາຈໍຄອມ ຜິວເຕີ 2 ໜ່ວຍ, ໂທລະທັດສີ 1 ໜ່ວຍ, ກ່ອງຮັບສັນຍານ 1 ໜ່ວຍ, ສ່ວນທ້າວ ລຸນ ເປັນຜູ້ຕິດຕາມເບິ່ງຄົນຢູ່ດ້ານນອກ ຫຼັງຈາກນັ້ນກໍເອົາເຄື່ອງຈຳນວນດັ່ງກ່າວໜີໄປ ແລ້ວເອົາໄປໄວ້ຢູ່ເຮືອນທ້າວ ອຸໄທ ຕົນເອງໄດ້ເວົ້າກັບທ້າວ ອຸໄທ ວ່າ: ຍັງມີ ເຄື່ອງຫຼາຍຢ່າງຂ້ອຍຈະໄປເອົາອີກ ຈຶ່ງ ໄດ້ຊວນທ້າວ ລຸນ ກັບໄປເອົາ ລຳໂພງ ນ້ອຍ 1 ຄູ່, ເມົ້າ 2 ອັນ, ແປ້ນພິມ 2 ອັນ ສ່ວນທ້າວ ລຸນ ແມ່ນແບກເອົາຕູ້ເຢັນ 1 ໜ່ວຍ ໄປໄວ້ຢູ່ເຮືອນທ້າວ ອຸໄທຄືເກົ່າ ແລ້ວໄປຊອກຕິດຕໍ່ຂາຍແຕ່ບໍ່ທັນໄດ້ຂາຍເທື່ອ.
ໃນປີ 2015 ຕົນເອງກັບທ້າວ ລຸນ ຍັງໄດ້ຮ່ວມກັນລັກລົດຈັກຈຳນວນ 3 ຄັນ ມາແລ້ວ ເຄີຍຖືກດັດສ້າງ 2 ຄັ້ງ ຢູ່ຄ້າຍຄຸມຂັງ ເມືອງທຸລະຄົມ ຂໍ້ຫາລັກຊັບ ພົນລະເມືອງ ນອກນີ້ຕົນເອງຍັງເຄີຍຮ່ວມ ກັບທ້າວ ເພັດ ບ້ານນ້ຳອ່າງ ໄປຊິງຊັບ ຂອງພົນລະເມືອງຈຳນວນ 6 ຄັ້ງ ຄັ້ງທີ 1 ດຶງກະເປົ໋າ ຢູ່ບ້ານໜອງບົວທອງ ນະຄອນຫຼວງວຽງຈັນ ໄດ້ເງິນ 8 ແສນກີບ, ຄັ້ງທີ 2 ດຶງກະເປົ໋າ ຢູ່ທາງເຂົ້າບ້ານໜອງ ບຶກ ນະຄອນຫຼວງວຽງຈັນ ໄດ້ເງິນ 3 ແສນກີບ, ຄັ້ງທີ 3 ດຶງກະເປົ໋າ ຢູ່ບ້ານປາກກະຍຸງ ເມືອງວຽງຄຳ ແຂວງວຽງຈັນ ໄດ້ເງິນ 7 ແສນກີບ, ຄັ້ງທີ 4 ດຶງກະ ເປົ໋າຢູ່ບ້ານທ່າງ່ອນ ເມືອງໄຊທານີ ນະຄອນຫຼວງວຽງຈັນ ໄດ້ເງິນ 2 ແສນກີບແລະອີກ 2 ຄັ້ງ ແມ່ນບໍ່ສຳເລັດການກໍ່ເຫດແຕ່ລະຄັ້ງແມ່ນທ້າວ ເພັດ ເປັນຜູ້ຂັບ ລົດຈັກ ທ້າວ ຄວາຍ ເປັນຜູ້ຊ້ອນທ້າຍ ແລະລົງມືດຶງກະເປົ໋າເງິນ ເງິນທີ່ໄດ້ມາແຕ່ລະຄັ້ງແມ່ນແບ່ງປັນກັນຄົນລະເຄິ່ງ ຈາກນັ້ນກໍເອົາໄປຊື້ຢາບ້າມາເສບ ອີກສ່ວນໜຶ່ງກໍໃຊ້ຈ່າຍຫຼີ້ນກີນຈົນໝົດ.
ຜ່ານການສັງເກດຕີລາຄາຂອງເຈົ້າໜ້າທີ່ຢ່າງຮອບດ້ານ, ຄົບຖ້ວນ ແລະພາວະວິໄສແລ້ວ ເຫັນວ່າການກະທຳຂອງ ທ້າວ ຄວາຍ ແລະທ້າວລຸນ ແມ່ນຄົບອົງປະກອບຂອງການກະທຳຜິດ ທາງອາຍາ ຊຶ່ງມັນໄດ້ສະແດງອອກໃນຄຳຮັບສາລະ ພາບສະບັບລົງວັນທີ 6 ມິຖຸນາ 2016 ແມ່ນໄດ້ລັກຊັບລວມໝູ່ແທ້ ແລະເປັນການ ກະທຳຜິດທີບໍ່ເຂັດຫຼາບ ຊຶ່ງຜິດຕໍ່ກົດໝາຍ ອາຍາໃນມາດຕາ 108 ແຫ່ງ ສປປ ລາວ ການກະທຳດັ່ງກ່າວຍັງໄດ້ສ້າງຄວາມເສຍຫາຍ ແລະເເຕະຕ້ອງເຖິງຊັບສິນ ຂອງລວມໝູ່ ແລະຍັງໄດ້ສ້າງຄວາມບໍ່ ສະຫງົບຄວາມບໍ່ເປັນລະບຽບຮຽບຮ້ອຍ ໃຫ້ແກ່ສັງຄົມ ປະຈຸບັນເຈົ້າໜ້າທີ່ໄດ້ເກັບ ກູ້ເຄື່ອງຂອງກາງຄືນມາໄດ້ທັງໝົດ ແລະໄດ້ມອບສົ່ງຄືນໃຫ້ບໍລິສັດມາລີນີ ເປັນທີ່ຮຽບຮ້ອຍແລ້ວ.
ທີ່ມາ: 