ທາງແຕ່ 3 ແຍກວົງວຽນຈີ່ນາຍ ໂມ້-ບ້ານຊາຍຟອງຖືເປັນຄວາມຫວັງຂອງປະຊາຊົນທີ່ຄອງຄອຍໃຫ້ມີການປັບປຸງເສັ້ນທາງໃຫ້ດີຂຶ້ນເນື່ອງຈາກຜ່ານມາທາງເສັ້ນດັ່ງກ່າວເປັນທາງປູຢາງ 2 ຊັ້ນ ແລະ ກໍໝົດອາຍຸການໃຊ້ງານ, ພໍຮອດລະດູຝົນກໍ່ເປັນບວກເປັນຂຸມ, ລະດູແລ້ງກໍເປັນຝຸ່ນໃງ່ຈຶ່ງເຮັດໃຫ້ການໄປ-ມາຂອງພໍ່ແມ່ປະຊາຊົນພົບຄວາມຫຍຸ້ງຍາກ, ແຕ່ມາດຽວນີ້ເສັ້ນທາງດັ່ງກ່າວໄດ້ຮັບການກໍ່ສ້າງຢ່າງຂຸ່ນຂ້ຽວແລະຄາດວ່າສຳ ເລັດໃນກາງປີ 2017.
ທ່ານ ຄູນສົມບັດ ເຟື້ອຍມະນີວົງ ຫົວໜ້າໂຄງການກໍ່ສ້າງເສັ້ນທາງແຕ່ 3 ແຍກ ຈີ່ນາຍໂມ້ (ເມືອງສີສັດຕະນາກ) ບ້ານຊາຍຟອງ (ເມືອງຫາດຊາຍຟອງ) ນະ ຄອນຫຼວງວຽງຈັນກ່າວວ່າ: ໂຄງການ ກໍ່ສ້າງເສັ້ນທາງເບຕົງເສີມເຫຼັກແຕ່ 3 ແຍກຈີ່ນາຍໂມ້-ບ້ານຊາຍຟອງຊຶ່ງແມ່ນພະແນກໂຍທາທິການແລະຂົນສົ່ງນະ ຄອນຫຼວງວຽງຈັນ ເປັນເຈົ້າຂອງໂຄງ ການລວມມີຄວາມຍາວທັງໝົດ 14 ກິ ໂລແມັດ, ປູດ້ວຍເບຕົງເສີມເຫຼັກ ແລະ ໜ້າທາງໜາປະມານ 23 ຊັງຕີແມັດ, ເພື່ອຮອງຮັບກັບການຂະຫຍາຍຕົວຂອງ ເຂດດັ່ງກ່າວ ແລະຮອງຮັບນ້ຳໜັກຂອງ ບັນດາລົດບັນທຸກປະເພດຕ່າງໆທີ່ມີການສັນຈອນຫຼາຍໃນແຕ່ລະມື້, ໜ້າທາງມີ ຄວາມກວ້າງ 15 ແມັດ, ທາງຄົນຍ່າງ ເບື້ອງລະ 1,5 ແມັດ ໂດຍແມ່ນບໍລິສັດ ຫາຍຫານການທຸລະກິດ ຈຳກັດ ເປັນຜູ້ ຮັບເໝົາກໍ່ສ້າງ, ໃນມູນຄ່າທັງໝົດ 50,4 ລ້ານໂດລາສະຫະລັດ ຫຼື ປະມານ 403 ຕື້ກີບ, ລວມທັງການມ້າງ ແລະສ້ອມ ແປງສິ່ງປຸກສ້າງຄືນໃຫ້ປະຊາຊົນທີ່ຮັບ ຜົນກະທົບ, ໂຄງການກໍ່ສ້າງເສັ້ນທາງ ດັ່ງກ່າວນີ້ ໄດ້ເລີ່ມລົງມືກໍ່ສ້າງໃນເດືອນ ເມສາ 2016 ເປັນຕົ້ນມາ.
ປະຈຸບັນແມ່ນມີຄວາມຄືບໜ້າແລ້ວ 9,3%, ໃນນັ້ນ ສຳເລັດວຽກງານການ ຍົກເສົາໄຟຟ້າ, ຍົກຍ້າຍທໍ່ນ້ຳປະປາ, ມ້າງ ແລະປົວແປງຄືນສິ່ງປຸກສ້າງຂອງປະຊາ ຊົນທີ່ໄດ້ຮັບຜົນກະທົບ, ວາງທໍ່ລະບາຍ ນ້ຳຂ້າງທາງຈຳນວນໜຶ່ງ, ສຳລັບການ ກໍ່ສ້າງແມ່ນຈະເລັ່ງສ້າງ ແລະເທເບຕົງ ແຕ່ເຂດ 3 ແຍກຈີ່ນາຍໂມ້ຫາ 3 ແຍກ ບ້ານສົມໂຮງກ່ອນ ຊຶ່ງມີຄວາມຍາວ ທັງໝົດ 4 ກິໂລແມັດເພື່ອແນໃສ່ອຳນວຍ ຄວາມສະດວກໃຫ້ກັບປະຊາຊົນ, ສ່ວນ ທີ່ເຫຼືອແມ່ນຈະເລັ່ງເທເບຕົງໜ້າທາງ ໄປພ້ອມກັນກັບວຽກງານອື່ນໆ, ຄາດຈະ ໃຫ້ສຳເລັດໃນເດືອນກໍລະກົດ 2017 (24 ເດືອນ).
ເຖິງຢ່າງໃດກໍຕາມທ່ານຫົວໜ້າໂຄງ ການຍັງໃຫ້ຮູ້ອີກວ່າ: ໄລຍະນີ້ແມ່ນໜ້າ ຝົນ, ສະນັ້ນ ຈຶ່ງເຮັດໃຫ້ທາງເປັນບວກ ເປັນຂຸມ, ພ້ອມທັງມີນ້ຳຖ້ວມຂັງສົ່ງຜົນ ໃຫ້ການໄປມາຂອງປະຊາຊົນມີຄວາມ ລຳບາກບວກກັບທາງກຳລັງມີການກໍ່ ສ້າງ ຈຶ່ງເຮັດໃຫ້ການສັນຈອນໄປ-ມາມີຄວາມລຳບາກ, ດັ່ງນັ້ນ ຈິ່ງຢາກຝາກ ໃຫ້ຜູ້ຊົມໃຊ້ທາງທັງຫຼາຍຈົ່ງມີຄວາມລະ ມັດລະວັງຕື່ມອີກ ແລະທາງໂຄງການ ເອງກໍຈະເລັ່ງແກ້ໄຂ ໂດຍການດຸດປັບປຸງ ໜ້າທາງເພື່ອຊ່ວຍໃຫ້ການສັນຈອນໄປ ມາສະດວກຂຶ້ນ, ແນວໃດກໍດີສຳລັບເສັ້ນ ທາງທີ່ປູດ້ວຍເບຕົງເສັ້ນນີ້ຈະເປັນໃບໜ້າ ອັນໃໝ່ໃຫ້ເມືອງຫາດຊາຍຟອງ ແລະ ເມືອງສີສັດຕະນາກ ໄດ້ເປັນຢ່າງດີ ໂດຍສະເພາະຈະຊ່ວຍຍົກລະດັບຊີວິດການເປັນຢູ່ຂອງປະຊາຊົນ, ຍົກລະດັບການຄ້າແລະການລົງທຶນໃຫ້ມີການເຕີບໃຫຍ່ ຂະຫຍາຍຕົວດີຂຶ້ນກວ່າເກົ່າ.
ທີ່ມາ: 