ປະຈຸບັນນີ້ ການຕົວະຍົວະຫຼອກລວງຂອງກຸ່ມຄົນບໍ່ດີແມ່ນປາກົດເກີດຂຶ້ນມາໃຫ້ ເຫັນເລື້ອຍໆ ຊຶ່ງເມື່ອບໍ່ດົນມານີ້ໄດ້ມີສອງແມ່ລູກຢູ່ບ້ານສຳພັນໄຊ ເມືອງບຸນໃຕ້ ແຂວງຜົ້ງສາລີ ໄດ້ຖືກກຸ່ມຄົນບໍ່ດີຫຼອກເອົາໄປຂາຍຢູ່ຈີນ.
ອີງຕາມຂໍ້ມູນຈາກກອງບັນຊາການ ປກສ ແຂວງຜົ້ງສາລີ ເປີດເຜີຍວ່າ: ນັບແຕ່ວັນທີ 16-21 ພຶດສະພາ 2014 ນາງ ບົວຄຳ ອາຍຸ 38 ປີ ອາຊີບປະຊາຊົນ ປະຈຸບັນ ຢູ່ບ້ານສຳ ພັນໄຊ ເມືອງບຸນໃຕ້ ແຂວງຜົ້ງສາລີ ພ້ອມລູກຊາຍຊື່ ທ້າວ ສຸກສະໄໝ ອາ ຍຸ 6 ປີ, ພວກກ່ຽວທັງສອງຄົນແມ່ນໄດ້ຖືກທ້າວ ອາລີງ ແລະ ໝູ່ໂດຍໄດ້ຖືກແນະນຳໃຫ້ນາງ ບົວຄຳ ໄປເອົາຜົວຄົນຈີນຈະມີຄວາມສຸກສະບາຍໃນອະນາຄົດ ແລ້ວ ນາງ ບົວຄຳ ກໍຕົກລົງກັນໄປພ້ອມລູກຂອງນາງ ໂດຍທ້າວ ອາລີງ ໄດ້ບອກວ່າໃຫ້ເອົາລູກໄປພ້ອມຈະລ້ຽງຊ່ວຍ ແລະ ໂອກາດໜ້າກໍໄປເອົາລູກສາວວຽງຈັນໄປຊອກເອົາຜົວຄົນຈີນອີກກໍໄດ້ ແລະ ເອົາລູກຊາຍໄປຈ້າງຫາກິນນຳຄົນຈີນແລ້ວມື້ຕໍ່ມາສອງແມ່ລູກກໍ ໄດ້ພາກັນຂີ່ລົດຕຸກໆໄປນອນບ້ານພັກບຸນໃຕ້ 1 ຄືນ,ມື້ຕໍ່ມາກໍໄດ້ຂີ່ລົດເມຈີນໄປເມືອງຫຼ້າຈົນຮອດບ່ອນກວດຄົນ ໝູ່ຂອງທ້າວ ອາລີງ ແມ່ນໄປເອົາໃບ ສ່ວນນາງ ບົວຄຳ ພ້ອມກັບລູກແມ່ນທ້າວ ອາລີງ ໄດ້ຈັບແຂນຢ່າງລຽບໄປຕາມທາງລົດໄປຖ້າຢູ່ໂຄ້ງເຄິ່ງທາງກໍຂຶ້ນ ລົດໄປຕໍ່ອີກຈົນໄປຮອດຈຸດທີ່ສອງກໍໄດ້ມີຄົນຂີ່ລົດຈັກມາຕ້ອນ ເອົາໄປນຳກັນ 4 ຄົນ ແລ້ວກໍໄປພັກຢູ່ເຮືອນຜູ້ມາຕ້ອນ 15 ນາທີ ຈາກນັ້ນກໍພາ ນາງ ບົວຄຳ ກັບລູກໄປກິນເຂົ້າຢູ່ຮ້ານອາຫານ ຫຼັງຈາກນັ້ນຮອດເວລາ 12:00 ໂມງ ມີຄົນຂີ່ລົດມາຕ້ອນເອົາໄປພັກຢູ່ບ່ອນໃໝ່ 1 ຄືນ ແລະ ຮອດມື້ຕໍ່ມາປະມານ 18:00 ໂມງແລງ ທ້າວ ອາລີງ ໄດ້ບອກໃຫ້ນາງ ບົວຄຳ ກັບລູກນັ່ງພັກຜ່ອນກໍຈະມີຄົນມາຮັບເອົາໄປຈົນຮອດຈຸດໝາຍດັ່ງກ່າວ ທ້າວ ອາລີງ ກັບໝູ່ແມ່ນໄດ້ກັບບ້ານແລ້ວພ້ອມກັບບອກ ນາງ ບົວຄຳ ແລະ ລູກຢູ່ດີ, ຢູ່ນີ້ໂທລະສັບຫາລາວບໍ່ໄດ້ ແລ້ວນາງ ບົວຄຳ ກໍໄດ້ເອົາໂທລະສັບກັບເຄື່ອງຈຳນວນໜຶ່ງຝາກໃຫ້ແມ່ຢູ່ບ້ານ ແລ້ວຫຼັງຈາກນັ້ນກໍໄດ້ພາຜູ້ເສຍຫາຍໄປໄວ້ຢູ່ສວນຊາປະມານ 3 ວັນ ຈົນຕົກມາຮອດມື້ທີ 4 ນາງ ບົວຄຳ ແມ່ນໄດ້ເຫັນເຂົາລົມໂທລະສັບກັນວ່າຂ້ອຍຊື້ມາແລ້ວຈຳນວນເງິນ 35.000 ຢວນ ເປັນສອງແມ່ລູກແຂງແຮງດີ, ຫຼັງຈາກໄດ້ຍິນແນວນັ້ນແລ້ວ ນາງ ບົວຄຳ ກໍຢູ່ບໍ່ເປັນສຸກແລ້ວແລ່ນໄປຖາມແມ່ເຖົ້າຢູ່ສວນຊາວ່າຄົນຈີນ ຜູ້ນີ້ມີເມຍແລ້ວບໍ່? ແມ່ເຖົ້າຕອບວ່າມີແລ້ວແມ່ນເຈົ້າມາເຮັດຫຍັງເຈົ້າຕາຍແທ້ໆທັງ ບອກໃຫ້ຮີບໜີໄປໄວໆ ແຕ່ນາງ ບົວຄຳ ບໍ່ຮູ້ຈະໄປທາງໃດ ແມ່ເຖົ້າຈິ່ງແຕ້ມແຜນທີ່ໃຫ້ພໍແລ່ນມາຮອດເຄິ່ງທາງ ນາງ ບົວຄຳ ກໍນັ່ງຮ້ອງໄຫ້ບໍ່ຮູ້ຊິໄປທາງໃດ ແລະ ໂຊກດີມີຊາຍຄົນໜຶ່ງຂີ່ລົດຈັກຜ່ານມາກໍເລີຍຖາມວ່າເຈົ້າຊິໄປ ໃສ ແລ້ວນາງ ບົວຄຳ ກໍເອົາປຶ້ມສຳມະໂນຄົວຍື່ນໃຫ້ເບິ່ງແລ້ວລາວກໍພາໄປສ່ົງໃຫ້ ຫ້ອງການຕຳຫຼວດ.
ຢ່າງໃດກໍຕາມ ຜ່ານການສັງເກດການຂອງເຈົ້າໜ້າທີ່ວິຊາການໃນຄະດີຖືກເຄາະຮ້າຍ ລາຍນີ້ເຫັນວ່າ ນາງ ບົວຄຳ ພ້ອມດ້ວຍລູກພວກກ່ຽວທັງສອງແມ່ນໄດ້ຖືກພວກຄົນບໍ່ດີຕົວະຍົວະ ຫຼອກລວງໄປຂາຍຢູ່ ສປ ຈີນ ແຕ່ໂຊກດີຜູ້ ກ່ຽວຮູ້ທັນເລ່ລ່ຽມຂອງພວກກຸ່ມຄົນບໍ່ດີ ແລະ ຖືປຶ້ມສຳມະໂນຄົວໄປຂໍຄວາມຊ່ວຍເຫຼືອຈາກຕຳຫຼວດ ສປ ຈີນ, ປະຈຸບັນຜູ້ເຄາະຮ້າຍ ແລະ ລູກຊາຍແມ່ນໄດ້ຮັບການຊ່ວຍເຫຼືອກັບຄືນມາສູ່ພູມລຳເນົາຢ່າງປອດໄພ ແລ້ວ.
ຂອບໃຈບົດຈາກ: sedthakid.la