ໃນໂອກາດລົງຢ້ຽມຢາມ ແລະ ພົບປະໂອ້ລົມພະແນກການເງິນ ນະຄອນຫລວງວຽງຈັນ ໃນວັນທີ 10 ມີຖຸນາຜ່ານມານີ້, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ໄດ້ເນັ້ນໃຫ້ນະຄອນຫລວງວຽງຈັນ ເອົາໃຈໃສ່ການຄຸ້ມຄອງ ແລະ ຈັດເກັບລາຍຮັບດ້ວຍການຕິດຕາມ ແລະ ສະຫລຸບລາຍງານໃຫ້ຂັ້ນເທິງເປັນປົກກະຕິ ແຕ່ລະອາທິດ,ຖ້າມີອັນໃດຄົງຄ້າງກໍຊ່ວຍກັນຮີບຮ້ອນແກ້ໄຂໃຫ້ທັນເວລາ ເພື່ອຮັບປະກັນໃຫ້ການຈັດຕັ້ງປະຕິບັດລາຍຮັບລາຍຈ່າຍງົບປະມານມີຜົນດີຂຶ້ນ, ໂດຍສະເພາະໃນ5 ເດືອນທ້າຍສົກງົບປະມານ 2015-2016 ນີ້ ໃຫ້ບັນລຸຕາມແຜນ, ພ້ອມນີ້ ທ່ານຮອງນາຍົກໄດ້ເນັ້ນໃຫ້ນະຄອນຫລວງ ຮີບຮ້ອນແກ້ໄຂບັນດາໜ້າວຽກທີ່ຍັງຄົງຄ້າງໃຫ້ສຳເລັດໂດຍໄວ ແລະ ເພີ່ມທະວີປັບປຸງກົນໄກການຈັດເກັບລາຍຮັບໃນສົກປີໃໝ່ໃຫ້ມີປະສິດທິຜົນກວ່າເກົ່າ.

ໃນໂອກາດດັ່ງກ່າວ ທ່ານ ຄຳພັນ ມາລາບັນດິດ, ຫົວຫນ້າພະແນກການເງິນນະ ຄອນຫລວງວຽງຈັນ ໄດ້ລາຍງານສະພາບການຈັດເກັບລາຍຮັບໃນ 8 ເດືອນ ຕົ້ນສົກປີ 2015-2016, ເຊິ່ງມາຮອດປັດຈຸບັນ ສາມາດປະຕິບັດໄດ້ແລ້ວຫລາຍກວ່າ 537 ຕື້ກີບ, ເທົ່າກັບ 51,61% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 1,13%, ໃນນັ້ນ ສ່ວຍສາອາກອນ ປະຕິ ບັດໄດ້ 489 ຕື້ກວ່າກີບ, ຄຸ້ມຄອງຊັບສິນຂອງລັດ ປະຕິບັດໄດ້ 42ຕື້ກວ່າກີບ, ຄຸ້ມຄອງການເງິນລັດວິສາຫະກິດ ປະຕິບັດໄດ້ຫລາຍກວ່າ 855 ລ້ານກີບ. ສະເພາະມາດຕະການຈຸດສຸມ ໃນ 3 ເດືອນທ້າຍສົກປີ, ວຽກງານສ່ວຍສາອາກອນຈະໄດ້ສຸມໃສ່ປັບປຸງກົນໄກການຄຸ້ມຄອງ, ດັດສົມຖານເກັບລາຍຮັບອາ ກອນຄືນໃຫມ່ຈາກບາງປະເພດ ການຜະລິດ, ທຸລະກິດເພື່ອ ຂະຫຍາຍຖານອາກອນມູນຄ່າເພີ່ມນຳບັນດາຫົວຫນ່ວຍທຸລະກິດ, ໂດຍສະເພາະທຸລະກິດຂະຫນາດໃຫຍ່ ແລະ ກາງ ໃຫ້ຖືກຕ້ອງຕາມລະ ບຽບກົດຫມາຍ ແລະ ສຸມໃສ່ຕິດຕາມກວດກາການເຄື່ອນໄຫວຂອງຫົວຫນ່ວຍຜະລິດ, ທຸລະກິດທີ່ເຄື່ອນໄຫວ 1.543 ຫົວຫນ່ວຍ ທີ່ແຈ້ງບໍ່ມີລາຍຮັບນັ້ນ ໃຫ້ຈະແຈ້ງຕື່ມ; ລົງຕິດຕາມກວດ ກາການເກັບລາຍຮັບຄ່າທຳນຽມ, ຄ່າບໍລິການຈາກບັນດາພະແນກ ແລະ ຂະແຫນງການທີ່ມີລາຍຮັບວິຊາການ ອ້ອມຂ້າງນະຄອນຫລວງ ໃຫ້ສຳເລັດ ແລະ ເລັ່ງຕິດຕາມກວດກາການເຄື່ອນໄຫວໃນ 5 ເຂດເສດຖະກິດພິເສດ ແລະ ເຂດເສດຖະກິດສະເພາະໃຫ້ສຳເລັດໂດຍໄວ.

ຂ່າວຈາກ: ລາວພັດທະນາ